މޫސުމަށް އަންނަ ބަދަލުތަކުން ފަތުރުވެރިކަން ރައްކާތެރިކުރުމަށް މަސައްކަތްތަކެއް ދަނީ ކުރަމުން: ވަޒީރު ޠާރިޤު

މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެރިކަން ރައްކާތެރިކުރުމަށް ގިނަ މަސައްކަތްތަކެއް ކުރަމުންދާކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ މޫސުމަށް އަންނަ ބަދަލުތަކާގުޅޭ އ.ދގެ މުއާހަދާގެ 29 ވަނަ ބައްދަލުވުން، ކޮޕް29ގެ ހަވާސާގައި، ފަތުރުވެރިކަމުގެ ދާއިރާގައި މޫސުމަށް އަންނަ ބަދަލުތަކާއި ދެކޮޅަށް ކުރާ މަސައްކަތްތައް ހަރުދަނާކުރުމާއި ގުޅޭ މިނިސްޓީރިއަލް ބައްދަލުވުމުގައި ވާހަކަފުޅުދައްކަވަމުންނެވެ.

މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤު އިބްރާހީމްގެ ވާހަކަފުޅުގައިވަނީ މޫސުމަށް އަންނަ ބަދަލުތަކާ ދެކޮޅަށް ދެމެހެއްޓެނެވި ފަތުރުވެރިކަން ކުރިއަރުވާ ތަރައްގީކުރުމަށް ރާއްޖެއިން ކުރަމުންގެންދާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ. ވަޒީރު ވިދާޅުވީ މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެެރިކަމަށް ނޭދެވޭ އަސަރުތަކެއް ކުރާކަމަށާއި މިކަން ހައްލުކުރުމަށް މަސައްކަތްތަކެއް ކުރަން ނިންމަވާފައިވާކަމަށެވެ. އެގޮތުން ކަނޑޫފާފަދަ ކާބަން ހިފަހައްޓާ މާހައުލުތައް ރައްކާތެރިކޮށް އާލާކުރުމަށް ރާއްޖޭން ކުރަމުންގެންދާ މަސައްކަތްތައް ފާހަގަކުރެއްވިއެވެ.

އެގޮތުން ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ރަށު ފެންވަރުގައި ކުރަމުންގެންދާ އެކި މަސައްކަތްތައް ވަޒީރު ފާހަގަކުރެއްވިއެވެ. ކޮޕްގެ ހަވާސާގައި ބޭއްވި މި ބައްދަލުވުމަކީ ފަތުރުވެރިކަމާއި މޫސުމަށް އަންނަ ބަދަލުތަކާ ގުޅޭ ގޮތުން މިނިސްޓީރިއަލް ފެންވަރުގައި ބޭއްވި ފުރަތަމަ ބައްދަލުވުމެވެ.

ކޮޕް-29ގަައި ދިވެހިރާއްޖޭގެ ފުރަތަމަ ބައިއެނުއަލް ޓްރާންސްޕޭރަންސީ ރިޕޯޓު (ބީޓީއާރު) އދ.ގެ މޫސުމަށް އަންނަ ބަދަލުތަކާ ބެހޭ އޮނިގަނޑު (ޔޫއެންއެފްސީސީސީ) އަށް ވަނީ ހުށަހަޅާފައެވެ. މިއީ ޕެރިސް އެއްބަސްވުމުގެ ދަށުން ހަރުދަނާކުރެވިފައިވާ އޮނިގަނޑުގެ ދަށުން ދިވެހިރާއްޖޭން އަދާކުރަންޖެހޭ ޒިންމާއެކެވެ.

ކުދި ޖަޒީރާ ޤައުމުތަކުގެ ތެރެއިން ދިވެހިރާއްޖެއަކީ މި ރިޕޯޓު ހުށަހެޅި ތިންވަނަ ޤައުމެވެ. މިރިޕޯޓުގައި ދިވެހިރާއްޖޭގައި ގްރީންހައުސް ގޭސް ބޭރުކުރާ މިންވަރާއި، މޫސުމަށް އަންނަ ބަދަލުތަކުގެ އަސަރު ކުޑަކުރުމަށާއި އެ ބަދަލުތަކަށް ހޭނުމަށް ކުރެވޭ މަސައްކަތްތަކުގެ ތަފްސީލްވަނީ ހިމަނާފައެވެ. މީގެ އިތުރުން، ޤައުމީ ފެންވަރުގައި ކަނޑައަޅާފައިވާ އަމާޒުތައް (އެންޑީސީ) ހާސިލުކުރުމަށް ކުރެވޭ މަސައްކަތްތަކުން ހާސިލްކުރެވޭ ކުރިއެރުމާއި، މޫސުމަށް އަންނަ ބަދަލުތަކާ ގުޅޭ ހަރަކާތްތައް ހިންގުމަށް ބޭނުންވާ އެހީއާއި ލިބިފައިވާ އެހީގެ މަޢުލޫމާތުވެސް މިރިޕޯޓުގައި ހިމަނާފައިވެއެވެ.

މިރިޕޯޓު ހުށަހެޅުމަކީ ދިވެހިރާއްޖޭން މޫސުމަށް އަންނަ ބަދަލުތަކާ ގުޅޭ ގޮތުން ކުރަމުންދާ މަސައްކަތްތަކުގެ މުހިންމު ސަފްހާއެއް ކަމުގައި ސަރުކާރުން ވިދާޅުވެއެވެ. އަދި މި ރިޕޯޓުން ދިވެހިރާއްޖެއަކީ މޫސުމަށް އަންނަ ބަދަލުތަކާ ގުޅޭ ގޮތުން އަޅަންޖެހޭ ފިޔަވަޅުތައް އެޅުމުގައި އިސްނަގައިގެން މަސައްކަތްކުރާ ޤައުމެއްކަން ދައްކުވައިދޭ ކަމަށްވެސް މޫސުމީ ބަދަލުތަކާއި ބެހޭ ވުޒާރާއިން ވިދާޅުވެއެވެ.

މި ރިޕޯޓު ހުށަހެޅުމާ ގުޅިގެން، ދިވެހިރާއްޖެއަށް ވަނީ ބީޓީއާރު ޗެމްޕިއަން ސެޓްފިކެޓް ލިބިފައެވެ. މިއީ މޫސުމަށް އަންނަ ބަދަލުތަކާ ގުޅޭ ގޮތުން ބައިނަލްއަޤްވާމީ ފެންވަރުގައި އަޅަންޖެހޭ ފިޔަވަޅުތައް އެޅުމަށާއި، އެކަމާ ގުޅޭ މަޢުލޫމާތު ހާމަކުރުމަށް ދޭ އަހައްމިއްޔަތުކަން ފާހަގަކޮށް ދޭ ޝަރަފެކެވެ.