ސަރުކާރުން ގާއިމުކުރާ އައިސްޕްލާންޓުތައް 2 އަހަރުގެ ތެރޭގައި އަޅައި ނިމޭނެ: ވަޒީރު ޝިޔާމް
-
14 އައިސްޕްލާންޓެއް އެޅުމަށް ވަނީ ހަމަޖެހިފައި
-
މިހާރުވެސް 4 އައިސްޕްލާންޓެއްގެ މަސައްކަތް ދަނީ ކުރިއަށް
މިސަރުކާރުން ރަށްރަށުގައި ޤާއިމްކުރާ އައިސްޕްލާންޓްތައް 2 އަހަރުގެ ތެރޭގައި ގާއިމްކޮށް ނިމޭނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
މަސްވެރިންނަށް އައިސް ލިބުމުގައި ހުރި ދަތިތައް ހައްލުކޮށްދެއްވުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ރާއްޖޭގެ އެކި ސަރަހައްދުތަކުގައި އައިސްޕްލާންޓްތައް ގާއިމްކުރުމުގެ މަސައްކަތަކީ ފާހަގަކޮށްލެވޭ މަސައްކަތެކެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، މިސަރުކާރުން ވެރިކަމާ ހަވާލުވެވަޑައިގެންނެވިއިރު މިފްކޯގެ ދަށުން ހިންގަމުން އައި އައިސްޕްލާންޓްތައް ފެނަކައާއި ހަވާލުކޮށްފައިވާކަމަށެވެ. ނަމަވެސް އެ އައިސްޕްލާންޓްތައް ހިންގުމުގެ ހަކަތަ ފެނަކައިގައި އެއިރު ނެތްކަމަށެވެ. އެހެންކަމުން ގިނަ އައިސްޕްލާންޓްތަކުގެ އޮޕަރޭޝަން ހުރީ ހުއްޓިފައިކަމަށެވެ. ނަމަވެސް މި ސަރުކާރުން މިހާރު މިއައިސްޕްލާންޓްތައް އަލުން އޮޕަރޭޝަނަށް ގެނެސްފައިވާކަމަށެވެ.
"މިދިޔަ ސަރުކާރުގައި އައިސްޕްލާންޓްތައް މިހަވާލުކުރެވުނީ މިފްކޯގެ ދަށުގައި ހުރި އައިސްޕްލާންޓްތައް ފެނަކައާ. ފެނަކައިގެ ހާލަތު އަޅުގަނޑުމެންނަށް އެބައިނގޭ. ފެނަކައިން އިތުރުކަމެއް ކުރާކަށް ހަކަތައެއް ނުއެއްހުރޭ. ނަތީޖާއަކަށް ވެގެންދިޔައީ އޮޕަރޭޝަންގައި ހުރި އައިސްޕްލާންޓްތަކުގެ ތެރެއިންވެސް ވަރަށް ގިނަ އައިސްޕްލާންޓްތައް އޮޕަރޭޝަނުން ބޭރުވި. އޮޕަރޭޓްނުކުރެވި ހުރީ އަޅުގަނޑުމެންނާއި ހަމައަށް އައިއިރުގައި. އަދި ފެނަކައަށް ތަރައްޤީކުރަން ހަވާލުކޮށްފައި އޮތް 17 އައިސްޕްލާންޓެއްވެސް ކުރިއަށް ނުގޮސް އޮތީ." ވަޒީރު ވިދާޅުވިއެވެ.
ވަޒީރު ޝިޔާމް ވިދާޅުވީ މިސަރުކާރުން އިތުރު އައިސްޕްލާންޓްތައް އެޅުމުގެ މަސައްކަތްވެސް ކުރަމުންދާކަމަށެވެ. އެގޮތުން މިހާރުވެސް 4 އައިސްޕްލާންޓެއްގެ މަސައްކަތް ކުރިއަށްދާކަމަށެވެ. އަދި އަންނަ އަހަރު މަސައްކަތް ފެށުމަށް 5 އައިސްޕްލާންޓެއް ބިޑަށް ހުޅުވާލާފައިވާކަމަށާއި އަންނަ އަހަރުގެ ބަޖެޓްގައި އިތުރު 5 އައިސްޕްލާންޓްގެ މަސައްކަތް ހިމަނާނެކަމަށެވެ. މި ސަރުކާރުގެ 2 އަހަރުގެ ތެރޭގައި ސަރުކާރުން އަޅަން ކަނޑައަޅާފައިވާ ހުރިހާ އައިސްޕްލާންޓްތަކެއްގެ މަސައްކަތް ނިންމާލާނެކަމަށް ވަޒީރު ވިދާޅުވިއެވެ.
"އަންނަ އަހަރުގެ ކުރީކޮޅު އެ 5 އައިސްޕްލާންޓްގެ މަސައްކަތްވެސް އަޅުގަނޑުމެންނަށް ފެށޭނެ. ދެން ޑިމާންޑް ހުރި ހިސާބުތަކަށް ބަލާއިރުގައި އިތުރު 5 އައިސްޕްލާންޓެއްގެ މަސައްކަތް އިރާދަކުރެއްވިއްޔާ މިއަންނަ އަހަރުގެ ބަޖެޓްގައި ހިމަނައިގެން އަޅުގަނޑުމެންނަށް ކުރިއަށްގެންދެވޭނެ. އަޅުގަނޑުމެން ރަށްރަށުގައި ޤާއިމްކުރަންޖެހޭ އައިސްޕްލާންޓްތައް އިރާދަކުރެއްވިއްޔާ މި 2 އަހަރުގެ ތެރޭގައި." ވަޒީރު ވިދާޅުވިއެވެ.
މަސްވެރި މޫސުމުގައި މަސްވެރިން އައިސްއަށް ޖެހޭ ޖެހުމަށް ހައްލު ގެނައުމަށްޓަކައި ދޯނިފަހަރުގައި ލޮނުފެނުން މަސް ފިނިކުރާ ނިޒާމް ނުވަތަ އާރުއެސްޑަބްލިއު ސިސްޓަމް ހަރުކުރުމަށް ލޯނަށް އެދުމަށްވެސް ސަރުކާރުން މިހާރު ވަނީ ހުޅުވާލާފައެވެ. އަދި މިހާތަނަށް ބައެއް ފަރާތްތަކަށް ލޯނުވެސް ވަނީ ދޫކޮށްފައެވެ. މިއީ ސަރުކާރަކުން މިހާތަނަށް ދޫކުރާނެ މިފަދަ އެންމެ ލުއި ފެސިލިޓީކަމަށް މަސްވެރިކަމާ ބެހޭ ވުޒާރާއިން ވަނީ ވިދާޅުވެފައެވެ.