ރާއްޖޭގެ ރީތިކަމާއި ސަޤާފަތް ދައްކުވައިދޭގޮތަށް ލޭންޑް މާރކް ފަރުމާކުރުމުގެ މުބާރާތެއް ބާއްވަނީ

ރާއްޖޭގެ ރީތިކަމާއި ސަޤާފަތް ދައްކުވައިދޭގޮތަށް ލޭންޑް މާރކް ފަރުމާކުރުމުގެ މުބާރާތުގައި ބައިވެރިވުމުގެ ފުރުސަތު މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ހުޅުވާލައިފިއެވެ. މިމުބާރާތް ހުޅުވާލާފައިވަނީ ދިވެހިންނަށެވެ.

ލޭންޑް މާރކް ބެހެއްޓުމަށް ހަމަޖެހިފައިވަނީ ރާއްޖޭގެ ހިތްގައިމު މަންޒިލްތަކުގެ ތެރެއިން ވެލާނާ އިންޓަރނޭޝަނަލް އެއަރޕޯޓް، މާލެ ސިޓީ، ކަނޑުއަޑި އަދި ގްރޭޓަރ މާލެ ސަރަޙައްދުގެ އިތުރުން ރާއްޖޭގެ ތިން ސަރަހައްދެއްގައެވެ. މިއީ ރާއްޖޭގެ ހިތްގައިމުކަން ދައްކުވައިދިނުމާއި، ދިވެހިންގެ ފަންނުވެރިކަން ދައްކާލުމަށާއި ފަތުރުވެރިންނަށް ރާއްޖެއިން ލިބެންހުރި ތަފާތު ތަޖުރިބާތައް އިތުރުކުރުމުގެ މަގުސަދުގައި ބާއްވާ މުބާރާތެއްކަމަށް އެމްއެމްޕީއާރުސީން ވަނީ ބުނެފައެވެ.

މިމުބާރާތުގައި 18 އަހަރުން މަތީގެ ކޮންމެ ދިވެއްސަކަށްވެސް ބައިވެރިވެވޭނެއެވެ. އަދި މިމުބާރާތުގައި ބައިވެރިކުރާ ފަރުމާތައް ވާންވާނީ އެކިއެކި ރަށްތަކާއި ސަރަޙައްދުތަކުގެ މުއްސަނދި ތަރިކައާއި ސަޤާފަތާއި ހިތްގައިމު ގުދުރަތީ ރީތިކަން ދައްކުވައިދޭ ފަރުމާތަކަކަށް ކަމަށް އެމްއެމްޕީއާރްސީން ބުނެއެވެ.

މިމުބާރާތަށް ހުށަހަޅާ އެންމެ މޮޅު 10 ފަރުމާ ހޮވާނީ ފަންނީ ޖަޖުންގެ ޕެނަލެއްގެ އިވެލުއޭޝަނާއި އާންމުންގެ ވޯޓާ އެއްކޮށްނެވެ. މުބާރާތުގެ އެންމެ މަތިން މާކްސް ލިބޭ 10 ފަރާތަކަށް 20،000 ރުފިޔާގެ ފައިސާގެ އިނާމަކާއި ސްޕޮންސަރުންގެ ހެޔޮ އެދުންތަކާއެކު ގިފްޓް ޕެކެއްވެސް ހަދިޔާކުރާނެވެ. މީގެ އިތުރުން، ހޮވޭ އެންމެ މޮޅު 10 ފަރުމާ އެފަރުމާކުރި ފަރާތްތަކަށް ކްރެޑިޓް ދީގެން އެމްއެމްޕީއާރުސީގެ މާކެޓިންގ ހަރަކާތްތަކުގައި ބޭނުންކުރުމަށް ހަމަޖެހިފައިވާ ކަމަށް އެމްއެމްޕީއާރްސީން ހާމަކުރެއެވެ.

އެމްއެމްއާރްސީން ހާމަކޮށްފައިވާގޮތުގައި ދެމެހެއްޓެނިވި ތަކެތި ބޭނުންކޮށްގެން ފަރުމާތައް ހަދަންވާނީ އުސްމިނުގައި 20 ފޫޓު ހުންނަ ގޮތަށެވެ. ކޮންމެ ލޭންޑްމާކަކުން ވެސް ފަރުމާކުރަންވާނީ، ދިވެހި ތާރީޚާއި، އެ ރަށެއް ނުވަތަ ސަރަޙައްދެއްގެ ތަފާތު ސިފަތައް ހިމަނައިގެންނެވެ. އުފެއްދުންތެރިކަމާއި ރައްކާތެރިކަމާއި ވިޝުއަލް އެޕީލް އަދި ދިގު މުއްދަތަކަށް ދެމިހުންނާނެފަދަ ޑިޒައިންތަކަށް ޖަޖިންގ ޕެނަލްއިން އިސްކަން ދޭނެކަމަށް އެމްއެމްޕީއަރްސީންވަނީ ބުނެފައެވެ.

މިމުބާރާތުގައި ބައިވެރިވުމުގެ ސުންގަޑިއަކީ އަންނަ ނޮވެމްބަރުމަހުގެ 30ވަނަ ދުވަހެވެ. ކޮންމެ ބައިވެރިއަކަށް ވެސް ހުށަހެޅޭނީ އެއް ފަރުމާއެވެ.