ޓެކްސް އެޕީލް ޓްރައިބިއުނަލްގެ ރައީސަކަށް ކުރީގެ ފަނޑިޔާރު އަބްދުލްޣަނީ

ޓެކްސް އެޕީލް ޓްރައިބިއުނަލްގެ ރައީސް ކަމުގެ މަޤާމަށް އަލްއުސްތާޛު ޢަބްދުލްޣަނީ މުޙައްމަދު އަދި ނައިބު ރައީސްގެ މަޤާމަށް ޙަސަން ޒުހައިރު މުޙައްމަދު ކަނޑައަޅައިފިއެވެ.

ޓެކްސް ނެގުމާބެހޭ އިދާރީ ޤާނޫނުގައިވާ ގޮތުގެ މަތިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޓެކްސް އެޕީލް ޓްރައިބިއުނަލަށް 4 މެންބަރުން ޢައްޔަނުކުރައްވާފައިވަނީ މިމަހުގެ 24 ވަނަ ދުވަހުގައެވެ.

ޓެކްސް އެޕީލް ޓްރައިބިއުނަލުގެ ރައީސް އަދި ނައިބް ރައީސްގެ މަޤާމު ހޮވަނީ ޓެކުސް ނެގުމާއި ބެހޭ އިދާރީ ޤާނޫނުގެ ދަށުން، އެ ޓްރައިބިއުނަލްގެ މެންބަރުންގެ މެދުގައި ސިއްރު ވޯޓަކުންނެވެ. އެގޮތުން އެ ޓްރައިބިއުނަލްގެ ހުސްވެފައިވާ 4 މެންބަރުންގެ މަޤާމަށް ދާދި ފަހުން ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ ވަނީ މެންބަރުން އައްޔަން ކުރައްވާފައެވެ.

ޓެކްސް އެޕީލް ޓްރައިބިއުނަލްގެ އައު ރައީސްގެ މަޤާމަށް ހޮވާފައިވަނީ، ކޮށްފައިވަނީ، ހައިކޯޓުގެ ކުރީގެ ފަނޑިޔާރު އަލްއުސްތާޛު ޢަބްދުލްޣަނީ މުޙައްމަދު އެވެ. އެ ޓްރައިބިއުނަލްގެ ނައިބް ރައީސްގެ މަޤާމަށް ހޮވާފައިވަނީ ޙަސަން ޒުހައިރު މުޙައްމަދު އެވެ.

ޓެކްސް އެޕީލް ޓްރައިބިއުނަލަށް މެންބަރުން އައްޔަންކޮށްފައިވަނީ ކުރީގެ މެންބަރުންގެ މަޤާމުން ވަކިކުރުމާއި ގުޅިގެންނެވެ. ޓްރައިބިއުނަލްގައި ކުރިން ތިއްބެވި ހަތަރު މެންބަރުން ވަކިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ މަޖިލީހުން އެގޮތަށް ސަރުކާރަށް ލަފާ ދެއްވުމުންނެވެ. މަޖިލީހުން އެގޮތަށް ފާސްކުރީ ޓެކްސް އެޕީލް ޓްރައިބިއުނަލްގައި މައްސަލަތަކެއް ހުރިކަން ފާހަގަކޮށް ރައްޔިތުންގެ މަޖިލީހުގެ އިދާރާއަށް ހުށައެޅި ސިޓީއަކާ ގުޅިގެން ޖުޑީޝަރީ ކޮމިޓީން އެ މައްސަލަ ދިރާސާކުރުމަށްފަހުއެވެ.