ރާއްޖޭގެ ބަޔޯޑައިވަރސިޓީ ޙިމާޔަތްކުރުމަށް ބައިނަލްއަޤްވާމީ އެއްބާރުލުން މުހިންމު: ވަޒީރު ޠާރިޤު

ރާއްޖޭގެ ބަޔޯޑައިވަރސިޓީ ޙިމާޔަތްކުރުމަށް ބައިނަލްއަޤްވާމީ އެއްބާރުލުން މުހިންމުކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ ކޮލަމްބިއާގައި ކުރިއަށްދާ ކޮޕް 16 ގެ ހަވާސާގައި، ކޮންވެންޝަން އޮން ބަޔޮލޮޖިކަލް ޑައިވަރސިޓީ (ސީބީޑީ) ގެ އެގްޒެކެޓިވް ސެކްރެޓަރީ އަސްޓްރިޑް ޝޯމޭކަރއާ ބައްދަލުކުރައްވައި ދެއްކެވި ވާހަކަފުޅުގައެވެ.

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ވިދާޅުވީ މި ބައްދަލުވުމުގައި، ކުންމިންގ-މޮންޓްރިއަލް ގްލޯބަލް ބަޔޯޑައިވަރސިޓީ ފްރޭމްވަރކް ތަންފީޒުކުރުމުގައި ހުރި ކުރިއެރުންތަކާއި ގޮންޖެހުންތަކާ ބެހޭގޮތުން މަޝްވަރާކޮށްފައިވާކަމަށެވެ.

މި ބައްދަލުމުގައި ވަޒީރު ޠާރިޤު އިބްރާހީމް ވަނީ، ދިވެހިރާއްޖެއިން ބަޔޯޑައިވަރސިޓީ ރައްކާތެރިކުރުމަށް ކުރަމުންދާ މަސައްކަތްތަކާއި، މި ދާއިރާއިން ކުރިމަތިވެފައިވާ ގޮންޖެހުންތަކުގެ މައްޗަށް އަލިއަޅުއްވާލައްވާފައެވެ. އަދި ބަޔޯޑައިވަރސިޓީ ޙިމާޔަތްކުރުމަށް ބައިނަލްއަޤްވާމީ މުޖުތަމަޢުގެ އެއްބާރުލުން މުހިންމުކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހިމް ވަނީ ވިދާޅުވެފައިއެވެ.

މީގެ އިތުރުން ވަޒީރުގެ މި ދަތުރުފުޅުގައި ވަނީ ތިމާވެށީގެ ޕްރޮގްރާމް (ޔޫ.އެން.އީ.ޕީ) ގެ އެގްޒެކެޓިވް ޑިރެކްޓަރ އިންގަރ އެންޑަރސަންއާ ބައްދަލުކުރައްވާ ދިވެހިރާއްޖޭގެ ބަޔޯޑައިވަރސިޓީ ރައްކާތެރިކުރުމާއި، މޫސުމަށް އަންނަ ބަދަލުތަކާ ގުޅިގެން ކުރެވިދާނެ މަސައްކަތްތަކާ ގުޅޭގޮތުން މަޝްވަރާކޮށްފައެވެ.

މި ބައްދަލުވުމުގައި، ދިވެހިރާއްޖެއާއި ޔޫ.އެން.އީ.ޕީ އާ ދެމެދު ކުރިއަށްދާ މަސައްކަތްތަކާއި، ކުރިމަގުގައި އިތުރަށް ގުޅިގެން މަސައްކަތްކުރެވިދާނެ ދާާއިރާތަކާ ބެހޭގޮތުން ވަނީ މަޝްވަރާކުރައްވާފައެވެ. މިއީ ވަރަށް ފައިދާހުރި ބައްދަލުވުމެއްކަމަށް ވަޒީރު ވަނީ ވިދާޅުވެފައެވެ. އަދި ރާއްޖެއަކީ ތިމާވެށި ރައްކާތެރިކުރުމަށް ގިނަގުނަ މަސައްކަތްތަކެއް ކުރަމުންދާ ޤައުމެއްކަމަށާއި، ޔޫ.އެން.އީ.ޕީ އަކީ މި މަސައްކަތުގައި ރާއްޖެއަށް އެހީތެރިވަމުންދާ މުހިންމު ބައިވެރިއެއްކަމަށެވެ.

ކޮލޮމްބިއާގެ ކަލީ ސިޓީގައި މިއަހަރުގެ އޮކްޓޫބަރު 21 އިން ނޮވެމްބަރު 1 އަށް ކުރިއަށްދާ ކޮންވެންޝަން އޮން ބަޔޮލޮޖިކަލް ޑައިވާރސިޓީގެ 16 ވަނަ ކޮންފަރަންސް އޮފް ދަ ޕާރޓީސްގައި ބައިވެރިވެވަޑައިގަތުމަށްޓަކައި ވަޒީރު ޠާރިޤު ފުރާވަޑައިގަތީ މިމަހުގެ 24 ގައެވެ.

މި މުއާހަދާއަކީ ދިރޭތަކެތީގެ ނަސްލުތައް ރައްކާތެރިކޮށް ޙިމާޔަތްކުރުމުގެ މަޤްޞަދުގައި އެކުލަވާލާފައިވާ ބައިނަލްއަޤްވާމީ އެއްބަސްވުމެކެވެ. ސީބީޑީ ކޮޕް 16 ގައި ދުނިޔޭގެ 196 ޤައުމުން ބައިވެރިވެއެވެ.

މި ބައްދަލުވުމުގައި މުއާހަދާ ތަންފީޒުކުރަމުންދާ ގޮތް ރިވިއުކޮށް، ބައިނަލްއަޤްވާމީ ގޮތުން ދިރޭތަކެތީގެ ނަސްލުތައް ޙިމާޔަތްކުރުމަށް ކުރަންޖެހޭ ކަންކަމާ ގުޅޭގޮތުން މަޝްވަރާކުރެވޭނެކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއިން ވިދާޅުވެއެވެ. އަދި 2022 ވަނަ އަހަރު އެކުލަވާލި ކުންމިން-މޮންޓްރިއަލް ގްލޯބަލް ބަޔޯޑައިވަރސިޓީ ފްރޭމްވާރކް ރިވިއުކޮށް، މުއާހަދާގައި ބައިވެރިވެފައިވާ ގައުމުތަކުގެ ނޭޝަނަލް ބަޔޯޑައިވާރސިޓީ ސްޓްރެޓަޖީ އެންޑް އެކްޝަން ޕްލޭން ތަންފީޒުކުރުމުގައި މި ފްރޭމްވާރކްއާ ގުޅުވާލުމަށް މަސައްކަތްކުރާނެއެވެ.

މީގެއިތުރުން، ދިރޭތަކެތީގެ ނަސްލުތައް ޙިމާޔަތްކުރުމަށް ކުރާ މަސައްކަތްތައް މޮނިޓަރކުރާނެ ނިޒާމެއް ގާއިމުކުރުމާއި، މި މަސައްކަތަށް ކުރާ ހޭދަ އިތުރުކުރުމާ ގުޅޭގޮތުން މަޝްވަރާކުރެވޭނެކަމަށައި. އަދި ޑިޖިޓަލް ސީކުއެންސް އިންފޯމޭޝަނުން ލިބޭ ނަފާ ހަމަހަމަ ގޮތެއްގައި ބެހުމަށް އެކުލަވާލާ މަލްޓިލެޓަރަލް ނިޒާމު ނިންމައި، އޭގެ ތަންފީޒު ފެށުމަށް މަސައްކަތްކުރުންވެސް ހިމެނޭކަމަށް އެ ވުޒާރާއިން ވިދާޅުވެއެވެ.