ފަތުރުވެރިކަމަށް އަހަރަކު 200 މިލިޔަން ރުފިޔާ ދޫކުރަން ދަނީ މަސައްކަތް ކުރަމުން: ވަޒީރު ފައިޞަލް

ފަތުރުވެރިކަން ނެތް ސަރަހައްދުތަކުގައި ފަތުރުވެރިކަން ތަރައްޤީކުރުމަށް، 200 މިލިޔަން ރުފިޔާ ޚާއްސަކޮށް ބޭންކުތައް މެދުވެރިކޮށް ދޫކުރެވޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ވަޒީރު ފައިޞަލް މިހެން ވިދާޅުވީ، އައްޑޫ ސިޓީގެ ފަތުރުވެރިކަމުގެ ބްރޭންޑް ލޯންޗުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މި ރަސްމިއްޔާތުގައި ވާހަކަދައްކަވަމުން ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވަނީ، ފަތުރުވެރިކަން ނެތް ސަރަހައްދުތަކުގައި ފަތުރުވެރިކަން ތަރައްޤީ ކުރުމަށް ހުރި ގޮންޖެހުންތަކުގެ މައްޗަށް އަލިއަޅުވާލެއްވިއެވެ. އެގޮތުން އެ ސަރަހައްދުތަކަށް ދަތުރުކުރުމުގައި ހުރި ގޮންޖުހުންތަކުގެ އިތުރުން، ފަތުރުވެރިކަމުގެ ދާއިރާއިން ނަގާ ޓެކްސްތައް ފަތުރުވެރިކަން އަލަށް ފަށާ ސަރަހައްދުތަކުން ނެގުން ފާހަގަކުރެއްވިއެވެ. މީގެ އިތުރުން މި މަސައްކަތް ފެށުމަށް ބޭނުންވާ މާލީ އެހީތެރިކަން ލިބުމުގައި ހުރި ގޮންޖެހުންތައް ވަޒީރު ފާހަގަކުރައްވާފައިވެއެވެ.

މިއާއެކު މިފަދަ މަސައްކަތެއް ފަށައިގަތުމަށް މާލީ އެހީތެރިކަން ބޭންކުތައް މެދުވެރިކޮށް ފޯރުކޮށްދެވޭނެ ގޮތަށް އިންތިޒާމުތައް ހަމަޖެއްސުމަށް މަސައްކަތް ކުރަމުންދާކަމަށް ފަތުރުވެރިކަމާ ބެހޭ ވަޒީރު ވިދާޅުވިއެވެ.

"ފަންޑްސް މިއަންނަ އަހަރުތެރޭގައި، ބީއެމްއެމްއެލް، އެސްޑީއެފްސީ އަދި އެމްއައިބީ މެދުވެރިކޮށް އެކަށީގެންވާ އަދަދަކަށް [ހަމަޖެހޭނެކަމަށް]. އަޅުގަނޑު މިބަލަނީ ކޮންމެ އަހަރަކުވެސް 100 ނުވަތަ 200 މިލިއަނެއްހާ ރުފިޔާ މިގޮތަށް ޓުއަރިޒަމް ޑިވެލޮޕްމެންޓަށް އެލޮކޭޓް ކުރެވޭނެ ގޮތްތަކެއް މި ބޭންކުތައް މެދުވެރިކޮށް" ވަޒީރު ވިދާޅުވިއެވެ.

ވަޒީރު ވިދާޅުވީ ރަނގަޅު އިންޓްރެސްޓް ރޭޓެއްގައި މާލީ އެހީތެރިކަން މިގޮތަށް ފޯރުކޮށްދެވިއްޖެނަމަ، ފަތުރުވެރިކަމަށް އިތުރު އެނދުތަކެއް ނެރުމަށް މަގުފަހިވެގެންދާނެ ކަމަށެވެ.

ފަތުރުވެރިކަމާ ބެހޭ ވަޒީރު ވަނީ ރާއްޖެއަކީ ފަތުރުވެރިންގެ މެދުގައި މަޤުބޫލު މަންޒިލެއްކަން ފާހަގަކޮށް، ދަތުރުފަތުރުގެ ނިޒާމުގައި މިވަގުތު ހުރި ގޮންޖެހުންތަކާއެކުވެސް ރާއްޖޭގެ ސަރަހައްދުތައް ރަނގަޅަށް ޕްރޮމޯޓް ކުރެވިއްޖެނަމަ، ފަތުރުވެރިން އެ ސަރަހައްދުތަކަށް ޒިޔާރަތް ކުރާ މިންވަރު އިތުރުކުރެވޭނެ ކަމަށް ވިދާޅުވެފައެވެ.

ވަޒީރު ވިދާޅުވީ، މިހާރު އެންމެ ބޮޑު އަމާޒަކީ ފަތުރުވެރިކަމުގެ އެނދުތައް ރާއްޖޭގެ އެކި ސަރަހައްދުތަކުގައި އިތުރުކޮށް މި ދާއިރާއަށް ޒުވާނުން ނެރުން ކަމަށެވެ. އެގޮތުން ރެސްޓޯރެންޓް، ލޯންޑަރީ އަދި ވޯޓާ ސްޕޯޓްސް ވަކި ވިޔަފާރިތަކަށް ހަދާ މި ވިޔަފާރިތަކަށް ގިނަ ޒުވާނުން ނެރުމަކީ އަމާޒެއް ކަމަށް ވަޒީރު ވިދާޅުވިއެވެ.

ރާއްޖޭގެ ފަތުރުވެރިކަން ނެތް ސަރަހައްދުތަކުގައި ފަތުރުވެރިކަން ތަރައްޤީކުރުމަކީ ސަރުކާރުގެ އަމާޒެކެވެ. އެގޮތުން ރާއްޖޭގެ ކޮންމެ އަތޮޅެއް ވަކިން ފަތުރުވެރިކަމަށް ޕްރޮމޯޓް ކުރުމަށް ނިންމައި އެކަމާ ގުޅޭ މަސައްކަތްތައް ސަރުކާރުން ވަނީ ފަށާފައެވެ.