ސަރުކާރުގެ މަސައްކަތުން ދިވެހިން ބޭނުންވާ މިސްރާބަށް އިގްތިސާދު ގެންދެވޭނެ: މަމްދޫޙް

ރާއްޖޭގެ އިގްތިސާދު އަލުން ކޮޅަށް ޖެހުމަށް ސަރުކާރުން ކުރައްވަމުންދާ މަސައްކަތްތަކުން ދިވެހި ރައްޔިތުން ބޭނުންވާ މިސްރާބަށް އިގްތިސާދު ގެންދެވޭނެ ކަމުގެ ޔަގީންކަން އެބައޮތް ކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު މުޙައްމަދު މަމްދޫޙް ވިދާޅުވެއްޖެއެވެ.

މަމްދޫޙް މިހެން ވިދާޅުވީ ފަތުރުވެރިކަމުގެ ދާއިރާއިން ނަގާ ޓެކްސްއާއި ފީތަކަށް ބަދަލު ގެނައުމަށް ސަރުކާރުން ހުށަހަޅުއްވާފައިވާ ބިލުތަކާ ގުޅޭގޮތުން ޕީއެސްއެމް ނިއުސްގެ "ބާބު" ޕްރޮގްރާމުގައި ވާހަކަދައްކަވަމުންނެވެ.

ފުނަދޫ ދާއިރާގެ މެންބަރު މުޙައްމަދު މަމްދޫޙް ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ޤައުމުގެ އިގްތިސާދު އޮތީ ވަރަށް ބޮޑަށް ދަށްވެފައި ކަމަށާ އިގްތިސާދު ކޮޅަށްޖެހުމަށް އެމަނިކުފާނު ކުރައްވަނީ މުހިންމު މަސައްކަތްތަކެއް ކަމަށެވެ. އެގޮތުން، ސަރުކާރުގެ ފަރާތުން މިހާރު މަޖިލީހަށް ހުށަހަޅުއްވާފައިވާ 3 ބިލަކީ އެ މަސައްކަތުގައި މުހިންމު ބިލުތަކެއް ކަމަށް މަމްދޫޙް ވިދާޅުވިއެވެ.

ސަރުކާރުގެ ފަރާތުން މަޖިލީހަށް ހުށަހަޅުއްވާފައިވަނީ ޓީޖީއެސްޓީ ބޮޑުކުރުމަށާއި އެއާޕޯޓް ޑިވެލޮޕްމަންޓް ފީ ބޮޑުކުރުމަށާއި ދިވެހިރާއްޖޭގެ ޓޫރިޒަމާބެހޭ ޤާނޫނަށް އިސްލާހު ގެނައުމުގެ ބިލެވެ. މި ބިލުތަކުން ރައްޔިތުންނަށް ދަތިނުވެ، ޤައުމުގެ އިގްތިސާދަށް ފައިދާވެގެންދާނެ ކަމަށް މަމްދޫޙް ވިދާޅުވިއެވެ.

މަމްދޫޙް ވިދާޅުވީ މި ސަރުކާރާއި އެހެން ސަރުކާރުތަކުގެ ތަފާތަކީ މި ސަރުކާރުން ކަންކަން ނިންމަވަނީ ކަމާގުޅުންހުރި ފަރާތްތަކާ މަޝްވަރާކުރުމަށްފަހު ރައްޔިތުންނަށް ދަތިނުވާގޮތަށް ކަމަށްވާތީ ކަމަށެވެ.

"އަޅުގަނޑުމެންގެ ހުރިހާ ވިސްނުމަކީ އާންމު ދިވެހި ލޮބުވެތި ރައްޔިތުންނަށް ދަތިނުވާނެގޮތަށް ދައުލަތް ހިންގުން. އަދި ޚަރަދުތައް ވީހާވެސް ކުޑަކޮށްގެން ދައުލަތް ހިންގުން. އެކަންކަމުގެ އިތުރަށް އާމްދަނީ އިތުރުކުރުމަށް އެކި ކަންކަމުގެ ތެރެއިން ދިވެހި އެއްވެސް ރައްޔިތެއްގެ ޖީބު ތެރެއަށް، ނިމިދިޔަ އެމްޑީޕީގެ ސަރުކާރުން އަތްލިހެން އަތްނުލައި ކަންތައްތައް ބައްޓަންކުރުން،" މަމްދޫޙް ވިދާޅުވިއެވެ.

މަމްދޫޙް ވިދާޅުވީ ސަރުކާރުގެ ފަރާތުން ބިލުތައް މަޖިލީހަށް ހުށަހެޅުއްވި ނަމަވެސް މަޖިލީހުގައިވެސް އެ ބިލުތަކާ ގުޅިގެން މަޝްވަރާތައް ކުރެވޭ ކަމަށެވެ. އެގޮތުން، މިހާރު ހުށަހަޅުއްވާފައިވާ ބިލުތަކަށްވެސް ކޮމިޓީ މަރުހަލާގައި ބަދަލުތައް ގެންނަން މެންބަރުންނަށް ފެންނަ ނަމަ އެ ބަދަލުތައް ގެންނާނެ ކަމަށާ، ނަމަވެސް އެ ބަދަލުތައްވާނީ ރައްޔިތުންނާއި ޤައުމަށް ފައިދާވާނެ ބަދަލުތަކަކަށް ކަމަށް މަމްދޫޙް ވިދާޅުވިއެވެ.