ހުޅުމާލޭގައި ހުންނަ ހުރަވީ ސްކޫލުގެ ދަރިވަރަކު ކުއްލިގޮތަކަށް ނިޔަވުމާގުޅިގެން އެ ދަރިވަރުގެ އާޢިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
އެ ދަރިވަރު ނިޔާވުމާ ގުޅިގެން އާޢިލާއަށް ތަޢުޒިޔާ ދަންނަވާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ހުރަވީ ސްކޫލްގައި ތަޢުލީމު ހާސިލުކުރަމުންދިޔަ އުމުރުން 13 އަހަރުގެ ފާޠިމަތު ޝިމާ މުޙައްމަދު، ކުއްލި ގޮތަކަށް މިއަދު ނިޔާވި ޚަބަރު އަޑު އެހީ، ނުހަނު ފުން އަސަރާއި ކަންބޮޑުވުމާއިއެކުކަމަށެވެ. އަދި ލޮބުވެތި ދަރިވަރުގެ ބެލެނިވެރީންނަށާއި ޢާއިލާއަށް، އަދި ރަޙްމަތްތެރީންނަށާއި އެކުގައި ކިޔަވާ ކުދީންނަށް، އަދި ހުރަވީ ސްކޫލުގެ ހުރިހާ ދަރިވަރުންނަށާއި މުވައްޒަފުންނަށް ކުރިމަތިވި މި އުނދަގޫ ވަގުތުގައި ކެތްތެރިކަން މިންވަރުކޮށް ދެއްވުން އެދި ދުޢާކުރެއްވިއެވެ.
އަދި މާތްﷲގެ ތަނަވަސް ރަޙްމަތާއި ނިޢުމަތުގައި، އެ މަޢުޞޫމް ދަރިވަރު ލެހެއްޓެވުން އެދި ކުރާ އިޚްލާޞްތެރި ދުޢާތައް ތަކުރާރުކުރަމަށް ރައީސް ވިދާޅުވިއެވެ.
إِنَّا لِلَّٰهِ وَإِنَّا إِلَيْهِ رَاجِعُونَ
— Dr Mohamed Muizzu (@MMuizzu) October 17, 2024
ޢުމުރުން 13 އަހަރުގެ އަންހެން ދަރިވަރު ފާޠިމަތު ޝިމާ މުޙައްމަދު، ހުރަވީ ސްކޫލުގައި ތަޢުލީމު ޙާޞިލްކުރަމުން ދަނިކޮށް، ކުއްލި ގޮތަކަށް މިއަދު ނިޔާވި ޚަބަރު އަޅުގަނޑު އަޑު އެހީ، ނުހަނު ފުން އަސަރާއި ކަންބޮޑުވުމާއިއެކުއެވެ.
ލޮބުވެތި…
ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަތީފްވެސް ވަނީ ހުރަވީ ސްކޫލުގައި ތަޢުލީމު ޙާސިލުކުރަމުން ދިޔަ ދަރިވަރު، ފާތިމަތު ޝިމާ މުޙައްމަދު ނިޔާވުމާއި ގުޅިގެން ތަޢުޒިޔާ ވިދާޅުވެފައެވެ.
ސޯޝަލް މީޑީއާގައި ޙިއްސާކުރެއްވި ޕޯސްޓެއްގައި ނާއިބު ރައީސް ވިދާޅުވީ ހުރަވީ ސްކޫލުގައި ތަޢުލީމު ޙާސިލުކުރަމުން ދިޔަ ދަރިވަރު، ފާތިމަތު ޝިމާ މުޙައްމަދު ނިޔާވި ޚަބަރު އެހީ ކުއްލި ހައިރާން ކަމާއި ފުން ހިތާމައާއެކުކަމަށާއި، މަރްޙޫމާގެ ޢާއިލާއަށް ތަޢުޒިޔާ ދަންނަވާކަމަށެވެ.
ފާތިމަތު ޝިމާ މުޙައްމަދު ނިޔާވުމާއި ގުޅިގެން ތަޢުލީމާ ބެހޭ ވުޒާރާއިން ވެސް ވަނީ އެ ކުއްޖާގެ އާއިލާއަށް ތަޢުޒިޔާގެ މެސެޖްއެއް ފޮނުއްވަވާފައެވެ. މީގެ އިތުރުން ސަރުކާރުގެ ވަޒީރުންނާއި އިސް ފަރާތްތަކުގެ އިތުރުން ގިނަ އަދަދެއްގެ ބަޔަކުވަނީ ޝިމާގެ އާއިލާއަށް ތަޢުޒިޔާ ފޮނުވާފައެވެ.
ދިވެހި ފުލުހުންގެ ޚިދުމަތުން ވިދާޅުވީ، ހުރަވީ ސްކޫލުގެ ދަރިވަރަކަށް ސިއްޙީ ހާލަތެއް މެދުވެރިވެގެން ހުޅުމާލެ ހޮސްޕިޓަލަށް ގެންދިޔަކަމުގެ ރިޕޯޓު މިއަދު ހެނދުނު ލިބިފައިވާ ކަމަށާއި އެ ކުއްޖާ ހޮސްޕިޓަލަށް ގެންދިޔައިރުވެސް ނިޔާވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށެވެ. ފުލުހުން ވިދާޅުވި ގޮތުގައި ނިޔާވެފައިވަނީ 13 އަހަރުގެ އަންހެން ކުއްޖެކެވެ. މި މައްސަލަ ފުލުހުން ދަނީ އިތުރަށް ތަޙުޤީޤު ކުރަމުންނެވެ.