އަންނަ އަހަރު ބޯންމެރޯ ޓްރާންސްޕްލާންޓް ހަދަން ފޮނުވާ ތެލެސީމިއާ ކުދިން ސްކްރީންކުރަން ފަށައިފި

ބޯންމެރޯ ޓްރާންސްޕްލާންޓް ހެދުމަށް އަންނަ އަހަރު ފޮނުވާ ކުދިން ސްކްރީން ކުރަން ފަށާފައިވާކަމަށް ސިއްޙަތާ ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ވަޒީރު ނާޒިމް މިފަދައިން ވިދާޅުވީ ތެލެސީމިއާ މާސްޓަރ ޕްލޭން އިފްތިތާހްކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ތެލެސީމިއާ ޕްރިވެންޝަން އެންޑް ކޮންޓްރޯލް މެނޭޖްމަންޓް މާސްޓަރ ޕްލޭން އިފްތިތާހް ކުރުމުގެ ރަސްމިއްޔާތުގައި ސިއްޙަތާ ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވީ ތެލެސީމިއާގެ ހާލަތު ރަނގަޅު ކުރުމަށް ވޭތުވެދިޔަ 10 މަސް ތެރޭގައި ސަރުކާރުން ގިނަ މަސައްކަތްތަކެއް ކުރެއްވިކަމަށެވެ.

އެގޮތުން ތެލެސީމިއާ ކުދިން ސްކްރީނު ކުރުމާއި ސްކޫލް ކުދިން ބައްޔަށް ހޭލުންތެރިކުރުވުމުގެ މަސައްކަތްތައްވެސް ކުރިއަށް ގެންދިޔަ ކަމަށް ވިދާޅުވިއެވެ. އަދި 4 ތަނެއްގައި ބްލަޑް ބޭންކް ޤާއިމުކޮށްފައިވާކަމަށެވެ.

މީގެ އިތުރުން މެދުކެނޑިފައިއޮތް ބޯންމެރޯ ޓްރާންސްޕްލާންޓުކުރުމުގެ ފުރުޞަތު މިއަހަރު އަލުން ފަށައި މިހާތަނަށް 14 ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ފޮނުވާފައިވާ ކަމަށާއި، އަންނަ 2025 ވަނަ އަހަރު ބޯންމެރޯ ތްރާންސްޕްލާންޓް ހަދަން ފޮނުވާ ކުދިން ސްކްރީންކުރުމުގެ ކަންކަން ފަށާފައިވާކަމަށް ވަޒީރު ވިދާޅުވިއެވެ.

ސަރުކާރުން ޢަމާޒުހިފާފައިވަނީ ކޮންމެ އަހަރަކުވެސް ވަކި ޢަދަދަކަށް ކުދިން ބޯންމެރޯ ހަދަން ފޮނުވުމަށެވެ. ބޯންމެރޯ ހެދުމަށް ޝަރުތު ހަމަވާ 40 ކުދިން މިވަގުތުވެސް ލިސްޓްކުރެވިފައިވާ ކަމަށް ޞިއްޙަތާ ބެހޭ ވުޒާރާއިން ހާމަކުރެއެވެ. އެ ކުދިންނަކީ އާއިލާގެ ތެރެއިން، ބޯންމެރޯ ޑޯނަރެއް ލިބިފައިވާ ކުދިންނެވެ.

ރާއްޖެއިން ބޭރުން ބޯންމެރޯ ހެދުންފަދަ ޚިދުމަތްތައް ހޯދަން އާއިލާތަކުން އެތައް ތަކުލީފުތަކެއް އުފުލަންޖެހެއެވެ. މިފަދަ ފަރުވާތަށް ރާއްޖޭގައި ތިބެގެން ލިބޭނެ އިންތިޒާމު ހަމަޖެއްސުމަށް ސަރުކާރުން ކުރައްވާ މަސައްކަތްތަކުގެ ތެރެއިން، ރައީސްގެ ވައުދުފުޅާއެއްގޮތަށް ހުޅުމާލޭގައި ތަރައްޤީކުރާ ތެލެސީމިއާ ހޮސްޕިޓަލުގައި ބޯންމެރޯ ހެދޭނެ އިންތިޒާމް ހަމަޖެހިފައި ހުންނާނެކަމަށް ސިއްޙަތާ ބެހޭ ވުޒާރާއިން ވަނީ ވިދާޅުވެއްޖެއެވެ.

ރާއްޖޭގައި ތެލަސީމިއާ ބަލިމީހުންގެ ގޮތުގައި 943 މީހަކު ދަފްތަރުކޮށްފައިވެއެވެ. އޭގެތެރެއިން މިވަގުތު ދުނިޔޭގައި ތިބީ 655 ތެލަސީމިއާ މީހުންނާއި ކުދިންނެވެ. ތެލަސީމިއާ ބަލިމީހުންނަކީ އެމީހުންގެ ހަށިގަނޑުގައި ދަގަނޑުގެ ބައި ދަށްކުރުމަށް ދާއިމަށް، ފަރުވާ ހޯދަންޖެހޭ ބައެކެވެ. ތެލަސީމިއާ ބައްޔަށް އޮތް ދާއިމީ ފަރުވާއަކީ، ބޯންމެރޯ ހެދުމެވެ.