ބެސްޓް ކަލިނަރީ ޓްރެއިނިން އިންސްޓިޓިއުޓްގެ އެވޯޑު 3ވަނަ ފަހަރަށް ޤައުމީ ޔުނިވާސިޓީއަށް

ކެއްކުމުގެ ދާއިރާއިން ދުނިޔޭގައި ދެވޭ އެންމެ ޝަރަފްވެރި އެއް އެވޯޑުކަމަށްވާ "ބެސްޓް ކަލިނަރީ ޓްރެއިނިން އިންސްޓިޓިއުޓް"ގެ އެވޯޑު 3 ވަނަ ފަހަރަށް ދިވެހިރާއްޖޭގެ ޤައުމީ ޔުނިވާސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް)އަށް ލިބިއްޖެއެވެ. މި އެވޯޑަކީ ކެއްކުމުގެ ދާއިރާގައި ހަރަކާތްތެރިވާ ފަރާތްތަކަށް ބައިނަލްއަޤްވާމީ ގޮތުން ދޭ އެންމެ ޝަރަފުވެރި އެއް އެވޯޑެވެ.

ދިވެހިރާއްޖޭގެ ގައުމީ ޔުނިވާރސިޓީއަށް މި އެވޯޑް 2021 ވަނަ އަހަރު އަދި 2023 ވަނަ އަހަރު ވަނީ ލިބިފައެވެ. އަދި މިއަހަރުވެސް މި އެވޯޑު ހާސިލްކޮށްފައިވަނީ، ދުނިޔޭގެ މަޝްހޫރު އެހެނިހެން އިންސިޓިއުޓްތަކާއި ވާދަކޮށްގެންނެވެ.

މި އެވޯޑު އެފް.އެޗް.ޓީ.އެސްއަށް ލިބުނީ ޖުމެއިރާ އަލް ނަސީމް ސަމަރސޯލްޓް، ދުބާއީ، ޔުނައިޓެޑް އަރަބް އެމިރޭޓްސްގައި ބޭއްވި ރަސްމިއްޔާތުގައި ވޯރލްޑް ކަލިނަރީ އެވޯޑްސްގެ "އިންޑިއަން އޯޝަން" ކެޓެގަރީންނެވެ.

މި އެވޯރޑު ރާއްޖެއަށް ލިބިފައިވަނީ، ކެއްކުމުގެ ދާއިރާއިން މީހުން ބިނާކުރުމުގައި ކުރާ މަސައްކަތާއި، އެދާއިރާއިން ހޯދާފައިވާ ކާމިޔާބީއާއި، ކުރިއެރުންތަކަށް ބަލާފައެވެ. އެގޮތުން ކެއްކުމުގެ ދާއިރާގެ ތަފާތު ކޯސްތައް ހިންގުމާއި، ދުނިޔޭގެ ފެންވަރުގަޔާއި، ޤައުމީ ފެންވަރުގައި ބޭއްވޭ ތަފާތު ކެއްކުމުގެ މުބާރާތްތަކުގައި ބައިވެރިވުންވެސް ހިމެނެއެވެ.

ޤައުމީ ޔުނިވާސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްއަށް މި އެވޯޑު ލިބުމާއި ގުޅިގެން، އެ ފެކަލްޓީގެ ޑީން ޒީނަތު ޞާލިޙް ވިދާޅުވީ، ތިންވަނަ ފަހަރަށް މި އެވޯޑް ލިބުމަކީ އެ ފެކަލްޓީއަށް ލިބުނު ވަރަށް ބޮޑު ޝަރަފެއްކަމަށެވެ. އަދި މިއީ އެ ފަކަލްޓީގެ ގާބިލުކަން ހުރި މިންވަރު ދައްކުވައިދޭކަމެއްކަން އޭނާ ފާހަގަކުރެއްވިއެވެ.

"އަޅުގަނޑުމެންނަށް މީގެ ކުރިން 2021 އަދި 2023 ވަނަ އަހަރު މި އެވޯޑް ލިބިފައިވާއިރު، ތިންވަނަ ފަހަރަށް 2024 ވަނަ އަހަރު އަނެއްކާވެސް ލިބުމަކީ ވަރަށް ބޮޑު ޝަރަފުވެރިކަމެއް. އަޅުގަނޑުމެންގެ ފެކަލްޓީގެ މޮޅުކަން ފާހަގަކޮށްލަން އަސްލު. އަޅުގަނޑުމެންގެ ފެކަލްޓީއަށް މި ފާހަގަކޮށްލެވޭ ކާމިޔާބީ ހާސިލްކުރުމުގައި އެހީތެރިވެދެއްވި އަޅުގަނޑުމެންގެ ވޯޓަރުންނަށް ޝުކުރުދައްނަވަން" ޒީނަތު ޞާލިޙް ވިދާޅުވިއެވެ.

ވޯރލްޑް ކަލިނަރީ އެވޯރޑަކީ 1994 ވަނަ އަހަރުން ފެށިގެން ދެމުން އަންނަ ވޯރލްޑް ޓްރެވަލް އެވޯރޑްސް ސިލްސިލާގެ ބައެކެވެ. ވޯރލްޑް ކަލިނަރީ އެވޯރޑްސް ދޭން ފަށާފައިވަނީ 2020 އަހަރުން ފެށިގެންނެވެ. ވޯރލްޑް ކަލިނަރީ އެވޯރޑަކީ ކެއްކުމުގެ ދާއިރާގެ ކުރިއެރުންތަށް ދުނިޔޭގެ ފެންވަރުގައި ފާހަގަކުރުމުގެ ގޮތުން ދެވޭ އެވޯރޑެކެވެ.

ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްއަކީ 1987 ވަނަ އަހަރުން ފެށިގެން ފަތުރުވެރިކަމުގެ ދާއިރާއިން މީހުން ބިނާކުރަމުން އަންނަ، ރާއްޖޭގެ އެންމެ ދުވަސްވީ އެއް މުއައްސަސާއެވެ. މިފެކަލްޓީގައި މި ދާއިރާއިން އެތަކެއް ދަރިވަރުނެއް ދަނީ މިހާރުވެސް ތައުލީމު ހާސިލްކުރަމުންނެވެ.