އަންނަ އަހަރަށް ލަފާކުރާ ދައުލަތުގެ ބަޖެޓު މިމަސް ނިމުމުގެކުރިން ހުށައަޅާނަން: މާލީ ވުޒާރާ
-
އޮކްޓޯބަރ ނިމުމުގެ ކުރިން ބަޖެޓް ހުށައަޅަންޖެހޭ
-
2024 ވަނަ އަހަރަށް ފާސްކޮށްފައިވަނީ 49.8 ބިލިޔަން ރުފިޔާގެ ބަޖެޓެއް
އަންނަ އަހަރަށް ލަފާކުރާ ދައުލަތުގެ ބަޖެޓު ތައްޔާރުކުރުމުގެ މަސައްކަތް ކުރިއަށްދާކަމަށާއި، މި މަސް ނިމުމުގެ ކުރިން ރައްޔިތުންގެ މަޖިލީހަށް ބަޖެޓް ހުށައަޅުއްވާނެކަމަށް މާލީ ވުޒާރާއިން ވިދާޅުވެއްޖެއެވެ. ޤާނޫނުގައިވާގޮތުގެ ކުރިއަށްއޮތް އަހަރަށް ލަފާކުރާ ދައުލަތުގެ ބަޖެޓް އަހަރު ނިމުމުގެ ދެ މަސްދުވަސް ކުރިން ރައްޔިތުންގެ މަޖިލީހަށް ހުށައަޅަންޖެހެއެވެ.
މާލީ ވުޒާރާއިން ވިދާޅުވީ، އަންނަ އަހަރަށް ލަފާކުރާ ދައުލަތުގެ ބަޖެޓް އެކުލަވާލުމުގެ މަސައްކަތްކަމަށް މިހާރު ކުރިއަށްދާކަމަށެވެ. އެގޮތުން ދައުލަތުގެ އެކިއެކި ވުޒާރާތަކާއި ރައީސުލްޖުމްހޫރިއްޔާގެ އޮފީހާއި ގުޅިގެން މި މަސައްކަތް މިހާރު ކުރެވެމުންދާކަން އެވުޒާރާއިން ފާހަގަކުރައްވައެވެ.
ކުރިއަށްއޮތް އަހަރުގެ ދައުލަތުގެ ބަޖެޓް ހުށައަޅާއިރު ދައުލަތުގެ ޕީއެސްއައިޕީ މަޝްރޫޢުތަކުގެ އަޕްޑޭޓުތައް ބަލައި، އެކަންކަން ފައިނަލްކުރުމުގެ މަސައްކަތްތަކާއި، އަންނަ އަހަރު އަލަށް ހިންގާނެ މަޝްރޫޢުތަކާއި ޕްރޮގްރާމްތައް ހިމަނާނެއެވެ. އަންނަ އަހަރަށް ލަފާކޮށް ހުށައަޅުއްވާނީ ކިހާ ޢަދަދެއްގެ ބަޖެޓެއްކަމެއް މާލީ ވުޒާރާއިން އަދި ހާމަކުރައްވާފައެއްނުވެއެވެ.
މިއަހަރަށް ދައުލަތުން ފާސްކޮށްފައިވަނީ 49.8 ބިލިޔަން ރުފިޔާގެ ބަޖެޓެކެވެ.
ހިނގަމުންދާ އަހަރުގެ ބަޖެޓަކީ ނިމިދިޔަ ސަރުކާރުގައި އެކުލަވާލާފައިވާ ބަޖެޓެކެވެ. އެ ބަޖެޓުގައި މަޝްރޫޢުތަކަށް ފައިސާ ހިމަނާފައިވާގޮތުން، ތަރައްޤީގެ މަޝްރޫޢުތައް ހިންގުމަށް ދަތިވާކަން ސަރުކާރުން ފާހަގަކުރައްވައެވެ. އެގޮތުން ޢުމްރާނީ ބޮޑެތި މަޝްރޫޢުތަކަށް އެކަށީގެންނުވާ ޢަދަދުތައް ހިމަނާފައިވާކަން ސަރުކާރުން ފާހަގަކުރައްވައެވެ.
ނަމަވެސް ސަރުކާރުން އަންނަ އަހަރަށް އެކުލަވާ ދައުލަތުގެ ބަޖެޓުގައި މަޝްރޫޢުތައް ފުރިހަމައަށް ކުރިއަށްގެންދޭވެނެ މިންވަރަށް ފައިސާ ހިމަނާނެކަމަށް ސަރުކާރުން ވިދާޅުވެއެވެ.