ގެސްޓު ހައުސްއަކަށް މީހަކު ވައްދާ ފޭރުނު މައްސަލައެއްގައި ދެ މީހުންނަށް ދައުވާކުރަން ފޮނުވައިފި

މާލޭގައި ގެސްޓު ހައުސްއަކަށް މީހަކު ވައްދާ ފޭރުނު މައްސަލައިގައި ހައްޔަރުކުރި ދެ މީހުންގެ މައްޗަށް ދައުވާކުރަން ފޮނުވައިފިއެވެ.

މިއީ ޖުލައި 19 ވަނަ ދުވަހު މާލެ، ޔެލޯ ލައިޓް ސްޓޭ ގެސްޓު ހައުސްއަށް ދިވެހި ފިރިހެނަކު ވައްދައި، އެ މީހާއަށް ތޫނު އެއްޗިހިން ބިރުދައްކައި، އޮރިޔާންކޮށް، އޭނާގެ ވޮލެޓުގައި ހުރި ފައިސާ ނަގައި އެކައުންޓުގައި ހުރި ފައިސާ ޓްރާސްފަރކޮށް ފޭރުނުކަމަށް ތުހުމަތުކުރެވޭ މައްސަލައެވެ.

މި މައްސަލައިގެ ތަޙުޤީޤު ނިންމައި ދައުވާކުރުމަށް ފޮނުވާފައިވަނީ ގ. އޯލްޕެރިސް، އަޙްމަދު މިހާދު (44އ) އަދި ގ. ރަނައުރާގެއާގެ، ރިމާނާ މޫސާ (39އ) މައްޗަށެވެ.

މައްސަލައިގެ ތަޙުޤީޤު ނިންމައި ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީ މި މަހުގެ 12 ވަނަ ދުވަހުއެވެ.