ކުއްލި ޙާލަތުގައި ފޯރުކޮށްދޭ ފުރަތަމަ އެހީންވެސް ފުރާނަ ސަލާމަތްކުރެވޭ!

ފުރަތަމަ އެހީ ނުވަތަ ފަސްޓް އެއިޑް ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ސެޕްޓެމްބަރ މަހުގެ ދެވަނަ ހޮނިހިރު ދުވަހެވެ. މި ދުވަހުގެ މަޤްޞަދަކީ ފުރާނަ ސަލާމަތްކުރުމުގައި ފަސްޓް އެއިޑްގެ މުހިންމުކަން ފާހަގަކުރުމެވެ.

ފަސްޓް އެއިޑް ނުވަތަ ފުރަތަމަ އެހީއަކީ ކުޑަ ނުވަތަ ބޮޑު ބައްޔެއް ނުވަތަ އަނިޔާއެއް ލިބިފައިވާ މީހަކަށް ދެވޭ ފުރަތަމަ އަދި ވަގުތުން ދެވޭ އެހީތެރިކަމެވެ. މިއީ ފުރާނަ ސަލާމަތްކުރުމަށް، ޙާލަތު އިތުރަށް ގޯސްވިޔަ ނުދިނުމަށް، ނުވަތަ ސިއްޙީ ޚިދުމަތްތައް އަންނަންދެން ރަނގަޅުވުމަށް އެހީތެރިވުމަށް ދެވޭ ފަރުވާއެކެވެ. ފަސްޓް އެއިޑް އާންމުކޮށް ދެނީ އަސާސީ މެޑިކަލް ނުވަތަ ފުރަތަމަ އިޖާބަދޭ ތަމްރީނު ލިބިފައިވާ މީހެކެވެ.

ފަސްޓް އެއިޑްގެ ހުނަރުތައް އެނގިފައިހުރުމުގެ މުހިންމުވަނީ، ސިއްޙީ އަވަސް އެހީ އަންނަންދެން އެފަދަ މީހުންނަށް އެހީތެރިވެދެވޭނެތީއެވެ. ފަސްޓް އެއިޑްގެ ހުނަރުތައް ގޭގައާއި، މަސައްކަތްކުރާ ތަނުގައާއި އަދި އާންމު ތަންތަނުގައި ބޭނުންކުރެވިދާނެއެވެ.

ބައިނަލްއަޤްވާމީގޮތުން ފަސްޓް އެއިޑް ނުވަތަ ފުރަތަމަ އެހީގެ ދުވަހެއް ފާހަގަކުރުމުގެ ބޭނުމަކީ ފަސްޓް އެއިޑްގެ ޓެކްނިކްތައް ދަސްކޮށް އަމަލީގޮތުން ބޭނުންކުރުމަށް ހިތްވަރުދިނުމެވެ.

ފަސްޓް އެއިޑް ދޭއިރު ސަމާލުވާންވީ ކަންތައްތަކެއް ހުރެއެެވެ. އެގޮތުން އަނިޔާވެފައިވާ މީހާއަށް އިތުރަށް ގެއްލުމެއް ނުވާނެ ގޮތަކަށް ކަންތައް ކުރުން ހިމެނެއެވެ. ކިތަންމެ ކުޑަކަމެއްވިއަސް ފަސްއެއިޑް ދޭނަމަ އަބަދުވެސް އެ އަނިޔާވާ މީހާއަށް އަވަހަށް ފަރުވާއެއްލިބި ލުއިވާނެގޮތަކަށް ކަންތައް ކުރުންވެސް މުހިންމެވެ.

ފަސްޓް އެއިޑްއަކީ ސިއްޙީ ކުއްލި ޙާލަތުގައި އެންމެ ފުރަތަމަ ދެވޭ ފަރުވާއަށް ވީހިނދު، އެއީ އެމީހެއްގެ ފުރާނައާވެސް ގުޅުންހުރި ފަރުވާއެކެވެ. ވުމާއެކު ޙާދިސާތަކާއި ޞިއްޙީ ކުއްލި ޙާލަތްތަކުގައި ފުރާނަ ސަލާމަތްކުރުމަށް އެ ހުނަރުތައް އެނގުން ކޮންމެހެން މުހިންމެވެ.

ރާއްޖޭގައި އިންސާނީ ހައްގުތަކާއި އަދި އެކި ކާރިސާތަކުގައި އެންމެ ކުރީސަފުގައި މަސައްކަތްކުރާ މޯލްޑިވްސް ރެޑް ކްރެސެންޓުން ފާހަގަކުރާ ގޮތުގައި ފަސްޓް އެއިޑްގެ ތަމްރީނު ކޮންމެ ފަރުދަކަށްވެސް ލިބިފައި ހުރުމަކީ ވަރަށް މުހިންމު ކަމެކެވެ. ސަބަބަކީ ފަހަކަށް އައިސް އެކްސިޑެންޓުތައް އިތުރުވަމުން ދިޔުމުގެ ސަބަބުން ހާދިސާއެއް ހިނގާވަގުތު އެތަނުގައި ފަސްޓް އެއިޑްގެ ކޮންމެވެސް މިންވަރެއް އެނގިފައި ހުރި މީހަކު ހުރެއްޖެނަމަ މީހެއްގެ ފުރާނަ ސަލާމަތް ކުރުމަށް އޮތް ފުރުސަތު ބޮޑުވެގެން ދާނެތީއެވެ.

"ފަސްޓް އެއިޑް އެނގުމުން ފުރާނަ ސަލާމަތް ކުރުމުގައި ވަރަށް ބޮޑު އެހީތެރިކަމެއް އެބަ ލިބިގެންދޭ. އެގޮތުން އަޅުގަނޑު ގަބޫލްކުރާ ގޮތުގައި މާލެ ސަރަހައްދުގައި މިހިނގާ އެކްސިޑެންޓްތަކުގައިވެސް ވަރަށް ބޮޑުބައި އަޅުގަނޑުމެންނަށް ކަވަރ ކުރެވޭނެ އެމީހާ އުފުލުމުގައި. ހާއްސަކޮށް މިވާގޮތަކީ އެކްސިޑެންޓް ހާލަތުގައި އެކްސިޑެންޓް ވެފައި އޮންނަ މީހާ އުފުލާލާ ގޮތަކުންވެސް ފުރާނައަށް ނުރައްވާ ހިސާބައް އެބަދޭ. އަޅުގަނޑު ގަބޫލްކުރާ ގޮތުގައި ރައްޔިތުންނަށް މި މައުލޫމާތު ލިބުމާއި މި ތަމްރީނު ލިބުމަކީ ވަރަށް މުހިންމު ކަމެއް" ފަސްޓް އެއިޑްގެ ހުނަރުހުރި ތަޖުރިބާކާރަކު ވިދާޅުވިއެވެ.

އެހެންކަމުން މުޖުތަމަޢުގައި ފަސްޓް އެއިޑްގެ ސެޓްފިކެޓް ލިބިފައިވާ މީހުން ގިނަވުމަކީ އެ މުޖުތަމަޢުއެއް ރައްކާތެރިވުމަށް އެޅޭ ބާރަކަށް ވާނެކަމެކެވެ.