އަލިފާން ރޯވި ދޫހިމެރިގެ ތަޅާލުމުގެ މަސައްކަތް ފަށައިފި

އަލިފާނުގެ ހާދިސާ ހިނގި ހ.ދޫހިމެރިގޭ ތަޅާލުމުގެ މަސައްކަތް ސިޓިތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާއިން ވިދާޅުވެއްޖެއެވެ.

އެ ހާދިސާގައި ދޫހިމެރިގޭގެ އިމާރާތް ބޭނުން ނުކުރެވޭވަރަށް ވަނީ އަނދާފައެވެ. އިމާރާތް ތަޅާލާ, ހާދިސާ ހިނގި ސަރަޙައްދު ސާފުކުރުމުގެ މަސައްކަތް ޕަބްލިކް ވަރކްސް ޑިޕަރޓްމަންޓުން ވަނީ ފަށާފައެވެ.

ދޫހިމެރިގޭގެ އިތުރުން އެގެއާއި އިންވެގެން ހުރި 2 ފަންގިފިލާގެ އިމަރާތަށްވެސް އަލިފާނުގެ އަސަރުކޮށްފައިވެއެވެ. އަދި ކައިރީގެ ގެތަކަށް ދުމުގެ އަސަރު ވަރަށް ބޮޑަށް ކުރިއެއެވެ.

މި ހާދިސާއާއި ގުޅިގެން ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ދަނީ 37 މީހަކަށް އިންސާނީ އެހީތެރިކަން ފޯރުކޮށްދެމުންނެވެ. އޭގެތެރޭގައި ހިމެނެނީ 22 ދިވެހިންނާ 15 ބިދޭސީންނެވެ. މުޅިން އަނދާ ހުލިވި ދޫހިމެރިގޭގައި ދިރިއުޅުނު 15 ބިދޭސީންނަށް 7 ދުވަހުގެ ވަގުތީ ބޯހިޔާވަހިކަން ވަނީ ފޯރުކޮށްދީފައެވެ. އެންޑީއެމްއޭއިން ވިދާޅުވީ އެ ފަރާތްތަކާ ހަވާލުވެފައިވާ ކުންފުނިން ދާއިމީ އިންތިޒާމް ހަމަޖައްސަމުންދާކަމަށެވެ.

ދިވެހި އާއިލާތަކުގެ ތެރޭގައި ހިމެނެނީ ރޯވި އިމާރާތާ އިންވެގެން ހުރި ރީފްވިއު ގޭގެ މީހުންނާ އަދި ކައިރި ގެތަކުން ކަރަންޓު ކަނޑާލަންޖެހުމުގެ ސަބަބުން ވަގުތީ ބޯހިޔާވަހިކަން ބޭނުންވި އާއިލާތަކެވެ. އެ މީހުންވެސް އާއްމު ދިރިއުޅުމަށް ރުޖޫޢަވުމުގެ އިންތިޒާމްތައް ދަނީ ހަމަޖައްސަމުންނެވެ.

މި އަލިފާނުގެ ހާދިސާގައި އެއްވެސް މީހަކަށް ޞިއްޙީ ބޮޑު ގެއްލުމެއް ވެފައެއް ނުވެއެވެ. ނަމަވެސް ދުމުގެ އަސަރުކޮށްގެން 2 ބިދޭސީންނަށް ހޮސްޕިޓަލުގައި ފަރުވާދީފައިވެއެވެ.

އަލިފާން ރޯވީ ދޫހިމެތިގޭގެ ތިރީ ފަންގިފިލާގައި ހިންގަމުން އައި ކެފޭއެއްގައެވެ. އެތަނުގައި ޓިނުން ހަދާފައިވާ މަތީ ދެ ފަންގިފިލާ ބޭނުންކުރަމުންދިޔައީ ބިދޭސީ އެކަމަޑޭޝަން ބްލޮކެއްގެ ގޮތުގައެވެ. އެތަނުގައި ގިނަ އަދަދެއްގެ ބިދޭސީން ދިރިއުޅެމުން ގޮސްފައިވެއެވެ.