ތޮއްޑޫ ދަނޑުވެރިންގެ މާރުކޭޓަށް ކުރިމަތިލި 17 ފަރާތެއް ޝަރުތުހަމަވޭ، ގުރުލުން އަންނަ ހަފްތާގައި

ބިޒްނަސް ސެންޓަރ ކޯޕަރޭޝަން، ބީސީސީއިން އއ. ތޮއްޑޫގައި ޤާއިމްކުރާ ދަނޑުވެރިންގެ މާރުކޭޓަށް ކުރިމަތިލާފައިވާ ފަރާތްތަކުގެ ތެރެއިން 17 ފަރާތެއް ޝަރުތު ހަމަވާކަމަށް އެ ކުންފުނިން ވިދާޅުވެއްޖެއެވެ.

ބީސީސީއިން ތޮއްޑޫ ދަނޑުވެރިންގެ މާރުކޭޓަށް ކުރިމަތިލުމަށް ހުޅުވާލީ އޮގަސްޓް މަހުގެ 6 ވަނަ ދުވަހުއެވެ. އަދި 18 އޮގަސްޓްގައި ވަނީ ކުރިމަތިލުމުގެ މުއްދަތު ހަމަވެފައެވެ.

ތޮއްޑޫ ދަނޑުވެރިންގެ މާރުކޭޓަކީ އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާގެ އިސްނެންގުވުމާއެކު ބީސީސީއިން ތަރައްޤީކުރާ ތަނެކެވެ. މިތަނުން ދޫކުރުމަށް ހަމަޖެހިފައިވަނީ 10 ކިއޮސްކެކެވެ.

މި 10 ކިއޮސްކަށް 17 ފަރާތަކުން ޝަރުތުހަމަވާއިރު މި މީހުންގެ މެދުގައި ގުރުއަތުލުން އަންނަ ހަފްތާގައި ކުރިއަށްދާނެކަމަށް ބީސީސީއިން ވަނީ ބުނެފައެވެ. އަދި މިމަހުގެ ފަހުކޮޅު މިތަން ހުޅުވުމަށް ބީސީސީއިން ދަނީ ތައްޔާރުވަމުންނެވެ.

ބީސީސީއިން ވިދާޅުވީ، މި ކިއޮސްކްތައް ދޫކުރާނީ 2 އަހަރުގެ މުއްދަތަކަށް ކަމަށެވެ. ކިއޮސްކެއްގެ އަގަކީ 3500 ރުފިޔާއެވެ. މި ކިއޮސްކްތައް ދޫކުރާނީ 18 އަހަރުން މަތީގެ ތޮއްޑޫ ރައްވެހިންނަށް އެކަންޏެވެ.

ބީސީސީއިން ވިދާޅުވީ، މިފަދަ މާރުކޭޓެއް ޤާއިމުކުރުމުގެ މައިގަނޑު މަޤުޞަދަކީ ދަނޑުވެރިކަމުގެ ދާއިރާއިން ވިޔަފާރި ކުރާ ފަރާތްތަކަށް ބާޒާރު ހޯދައިދިނުމާއި، މި ވިޔަފާރިތައް އިތުރު ހަރުފަތަކަށް ގެންދިއުމަށް އެހީތެރިވެދިނުންކަމަށެވެ.

ތޮއްޑޫއަކީ ރާއްޖޭގައި ދަނޑުވެރިކަމަށް މަޝްހޫރު ރަށެކެވެ. އެރަށުގެ ބިމުގެ ބޮޑުބައެއް ބޭނުންކުރަނީ ދަނޑުވެރިކަމަށެވެ. އަދި މާލޭގެ ބާޒާރަށް ގެންނަ ދަނޑުވެރިކަމުގެ ގިނަ ބާވަތްތައްވެސް ހިއްސާކުރަނީ ތޮއްޑޫއިންނެވެ.