އަޒަރުބައިޖާން އެއަރލައިނުން ރާއްޖެއަށް އަލަށް ދަތުރުތައް ފަށަނީ

އަޒަރުބައިޖާން އެއަރލައިނުން މުޅިން އަލަށް ރާއްޖެއަށް ދަތުރުތައްފަށަން ނިންމައިފިއެވެ. މި ދަތުރުތައް ފެށުމަށް ހަމަޖެހިފައިވަނީ އަންނަ ނޮވެމްބަރ މަހުގެ ތެރޭގައެވެ.

އަޒަރުބައިޖާން އެއަރލައިނުން ރާއްޖެއަށް ދަތުރުފަށާއިރު މި ދަތުރުތައް ކުރާނީ އަޒަރުބައިޖާންގެ ވެރިރަށް ބަކޫއިން ވެލާނާ އިންޓަނޭޝަނަލް އެއަރޕޯޓަށެވެ. މި ދަތުރުތައް ފެށުމަށް ހަމަޖެހިފައިވަނީ ނޮވެމްބަރ މަހުގެ 8 ވަނަ ދުވަހުއެވެ.

އަޒަރުބައިޖާން އެއަރލައިނުން ހަފްތާއަކު 2 ދަތުރު ރާއްޖެއަށް ކުރާނެކަމަށް އެ އެއަރލައިނުން ވަނީ ބުނެފައެވެ. މި ދަތުރުތަކުގައި އެ އެއަރލައިނުން ބޭނުންކުރާނީ ބޮއިންގ 787 ޑްރީމްލައިނަރ އެއަރކްރާފްޓެވެ. މި ދަތުރުގެ ދިގުމިނަކީ ގާތްގަނޑަކަށް 6 ގަޑިއިރެވެ.

މިއީ އަޒަރުބައިޖާން އެއަރލައިނުން ރާއްޖެއަށް ދަތުރުތައް ފަށާ ފުރަތަމަ ފަހަރަށް ވުމާއެކު މި ދަތުރުތަކުގެ ސަބަބުން އެ ޤައުމުން ރާއްޖެއަށް އަންނަ ފަތުރުވެރިންގެ ޢަދަދު އިތުރުވުމަށް އެހީތެރިވެދޭނެއެވެ. ރާއްޖެއަށް މިހާރުވެސް ބައިނަލްއަޤްވާމީ ގިނަ އެއަރލައިންތަކަކުން ދަނީ ދަތުރުކުރަމުންނެވެ.

ފަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާގޮތުން ރާއްޖެއަށް މިވަގުތު ބައިނަލްއަޤްވާމީ 42 އެއަރލައިނަކުން ދަނީ ދަތުރުކުރަމުންނެވެ. އަދި ސެޕްޓެމްބަރ ދޭއްގެ ނިޔަލަށް ރާއްޖެއަށް 1.3 މިލިއަން ފަތުރުވެރިން ވަނީ އައިސްފައެވެ.