ދިވެހި ޤައުމިއްޔަތުގެ އިސްވަރު މުސްތަޤްބަލުގައި ވާނީ ޤާނޫނުން ބާރުލިބިދޭ ތަރިކައިގެ ކޮލެޖަކަށް: ރައީސް

މުސްތަޤުބަލުގައި ދިވެހި ޤައުމިއްޔަތުގެ އިސްވަރު ވާނީ ޤާނޫނުން ބާރުލިބިދޭ ދިވެހި ޤައުމީ ތަރިކައިގެ ކޮލެޖަކަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ޤައުމީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.

ދިވެހި ޤައުމިއްޔަތުގެ އިސްވަރު އިފްތިތާހުކޮށްފައިވަނީ ޤައުމީ ދުވަހުގެ ރަސްމީ ޖަލްސާގައެވެ. މި ޖަލްސާގައި ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ، ދިވެހި ޤައުމިއްޔަތު އިޢާދަކުރުމުގެ މަސައްކަތަކީ މުހިންމު މަސައްކަތެއްކަމަށެވެ.

މި ފާއިތުވި 9 މަސް ދުވަހުގެ ތެރޭ ދިވެހި ތަރިކަ ދިރާސާކުރާ ޤައުމީ މަރުކަޒުގެ ވިލަރެސްވެރީން ދުނިޔޭގެ 180 އަށްވުރެ ގިނަ ޤައުމުގައި އެ ޤައުމުތަކުގެ އަމިއްލަވަންތަކަން ދަމަހައްޓާ ގޮތުގެ ދިރާސާތައް ހަދާފައިވާކަމަށް ރައީސް ވިދާޅުވިއެވެ. އަދި ޢިލްމީ ފަންނީ އެކި ދާއިރާތަކުން 800 އަށްވުރެ ގިނަ ބޭފުޅުންނަށް މިހާރު ވަނީ ދިވެހި ޤައުމިއްޔަތުގެ އަސާސީ އަސްލުތައް ޢިލްމީ ގޮތުގާ ފޯރުކޮށްދެވިފައިކަމަށެވެ.

ދިވެހި ޤައުމިއްޔަތު އިއާދަކުރުމުގެ މަސައްކަތުގެ ތެރެއިން ދިވެހި ޤައުމިއްޔަތުގެ އިސްވަރު މިހާރު އުފެދިފައިވާއިރު، މުސްތަޤްބަލުގައި ދިވެހި ޤައުމިއްޔަތުގެ އިސްވަރު ވާނީ ޤާނޫނުން ބާރުލިބިދޭ ދިވެހި ޤައުމީ ތަރިކައިގެ ކޮލެޖަކަށްކަމަށް ރައީސް ވިދާޅުވިއެވެ.

"މިއަދު ދިވެހި ޤައުމިއްޔަތުގެ އިސްވަރު މި ވަނީ އުފެދިފާ. މުސްތަޤުބަލުގައި ދިވެހި ޤައުމިއްޔަތުގެ އިސްވަރު ވާނީ ޤާނޫނުން ބާރުލިބިދޭ ދިވެހި ޤައުމީ ތަރިކައިގެ ކޮލެޖަކަށް. މި ކޮލެޖަކީ ރާއްޖޭގައި މިހާތަނަށް އަދި ނުއުފައްދާ ބާވަތެއްގެ ކޮލެޖެއް. އެއީ މެންބަރ ޝިޕް ކޮލެޖެއް. މެންބަރުންގެ ވިޔުގަތަކެއްގެ މައްޗަށް އެކުލެވިގެންވާނެ ކޮލެޖެއް. މައިގަނޑު ބޭނުމަކީ ދިވެހީންގެ ތަރިކައާއި ސަގާފަތާއި ތާރީޚާ އަމިއްލަވަންތަ އަސްލުތަކަށް ޢިލްމީ ލެންސުތަކުން މީގެ ފަހުން އަބަދުވެސް ބަލަމުން ބަލަހައްޓަމުން ގެންދިޔުން. ދިވެހި ޤައުމިއްޔަތަކީ ދިވެހީންގެ ދިރިއުޅުމުގެ ބައެއްކަމުގައި ހެދުން." ރައީސުލްޖުމްހޫރިއްޔާ ވިދާޅުވިއެވެ.

އަމިއްލަވަންތަކަމަށް ލޯބިނުކުރެވޭ ނަމަ މިނިވަންކަމަށް ލޯތްބެއް ނުކުރެވޭނެކަމަށް ރައީސް ވިދާޅުވިއެވެ. ހަމަ އެހެންމެ އަމިއްލަވަންތަކަން ދިފާޢުނުކުރެވޭ ނަމަ، މިނިވަންކަން ދިފާޢެއްވެސް ނުކުރެވޭނެކަން ވަނީ ފާހަގަކުރައްވާފައެވެ.

އެ ޤައުމަކާ އެއްކޮޅަށް ހުންނަ ކަންކަމާއި އެ ޤައުމަކާ ދެކޮޅަށް ހުންނަ ކަންކަން ކޮންމެ ރައްޔިތަކަށް ޢިލްމާއި ބުއްދީގެ ހަމަތަކުން އޮޅުންފިލުވައިދޭންޖެހޭއިރު މިއީ ރާއްޖެއަށް ވެސް މި ވަގުތަށް ވަރަށް މުހިންމުކަމެއްގެ ގޮތުގައި ރައީސް ސިފަކުރެއްވިއެވެ. ދިވެހި ތަރިކަ ދިރާސާކުރާ ޤައުމީ މަރުކަޒުން އެކަމާ ގުޅޭ ދިރާސާތައް ހަދައި، ކަމާބެހޭ ޢިލްމީ ފޮތްތައް ދިވެހިބަހަށް ތަރުޖަމާކުރަމުންދާނެކަމަށް ރައީސް ވިދާޅުވިއެވެ.

"މުސްތަޤުބަލުގައި އުފެދޭ ދިވެހި ތަރިކައިގެ ކޮލެޖު ނުވަތަ މި ވަގުތު މި އޮތް ދިވެހި ޤައުމިއްޔަތުގެ އިސްވަރު މުޅި ރާއްޖެއަށް އިރާދަކުރެއްވިއްޔާ އިންޤިލާބީ ބަދަލެއް މި ކަމުގައި ގެންނާނެ. މި ގޮތުން ދިވެހި ޤައުމިއްޔަތުގެ އިސްވަރުން ދިވެހި ޤައުމިއްޔަތުގެ ބަހާތަކާ ގުޅުންހުރި އެކި ޢިލްމުތަކުން އެކިފަރާތްތަކަށް ލަފާދެއްވާނެ. ދިވެހި ޤައުމިއްޔަތުގެ ދާއިރާގެ ފުރިހަމަ އެންތޮލޮޖީއެއް އަހަރަކު އެއް ފަހަރު އުފައްދައި ޝާއިޢުކުރާނެ. މީގެ އިތުރަށް ދިވެހި ޤައުމިއްޔަތުގެ ބަހާތަކުގެ ކޮންމެ ދާއިރާއަކުން އެ ދާއިރާގެ ކުރިއެރުމާއި ގޮންޖެހުންތަކުގެ ޢިލްމީ ކަރުދާހެއް ކޮންމެ އަހަރަކު އެއް ފަހަރު ޝާއިޢުކުރާނެ. ދިވެހި ޤައުމިއްޔަތުގެ ދާއިރާތަކާ އަލަށް ގުޅޭ ޒުވާނުންނާއި ކިޔަވާ ކުދީންގެ ވިޔުގަތައް އުފައްދައި ފުޅާކޮށް ދަމަހައްޓާނެ." ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، މިއަދުގެ ދުނިޔޭގައި ބަހާއި ތަރިކައިގެ ދާއިރާއަކީ ވަރަށް ޢިލްމީ ވަރަށް ސައިންޓިފިކް ދާއިރާއެއްކަމަށެވެ. ދުނިޔޭގެ ބައެއް ޤައުމުތަކުގެ ޤައުމީ ތަރިކައިގެ ޝިޢާރުތައް ބުނާ ގޮތުން އެ ޤައުމުތަކުގެ އިޤުތިޞާދާއި ތަރައްޤީގެ ހިތަކީ ތަރިކައާއި ސަގާފަތާއި ތާރީޚުކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ފާހަގަކުރެއްވިއެވެ.