ކުދިންގެ ކުރިއެރުމަށް މުޅި މުޖުތަމަޢުން ކުދިންނާއެކު ރަނގަޅު ގުޅުމެއް ބާއްވަންޖެހޭ: ޢާއިލީ ތަރައްޤީއާބެހޭ ވަޒީރު

ކުދިން ކުރިއަރައި، ފޯދިގެން ދިއުމަށްޓަކައި މުޅި މުޖުތަމަޢުން ކުދިންނާއެކު ރަނގަޅު ގުޅުމެއް ބާއްވަންޖެހޭކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ.ޢައިޝަތު ޝިހާމް ވިދާޅުވެއްޖެއެވެ.

ވަޒީރު މިހެން ވިދާޅުވީ ކުޑަކުދިންގެ ޙައްގުތައް ކަށަވަރުކޮށް، އަނިޔާ ލިބިފައިވާ ކުދިންނަށް ރައްކާތެރިކަން ފޯރުކޮށްދިނުމަށް އެކުލަވާލާފައިވާ ޤައުމީ އެކްޝަން ޕްލޭން އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަމުންނެއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢައިޝަތު ޝިހާމް ވިދާޅުވީ، ޚިދުމަތް ފޯރުކޮށްދިނުމާއި، ނިޒާމު ހަރުދަނާކުރުމާއި، އަދި ކުޑަކުދިންގެ ބޭނުންތަކާއި ރައްކާތެރިކަމާ ބެހޭގޮތުން ހޭލުންތެރިކަން އިތުރުކުރުމުގެ ދާއިރާގައި ޤައުމެއްގެ ހައިސިއްޔަތުން ވަރަށް ގިނަ ކަންތައްތަކެއް ޙާޞިލުކޮށްފައިވާކަމަށެވެ.

ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯގައި ކުޑަކުދިން އަނިޔާއިން ރައްކާތެރިކުރުމުގެ މުހިންމުކަމާއި، ކޮންމެ ކުއްޖަކަށްވެސް ޞިއްޙަތު ރަނގަޅު އަދި ލޯބިދޭ ޢާއިލާތަކެއްގެ ބެލުމުގެ ދަށުން ރައްކާތެރިކަމާއި ޢިއްޒަތާއެކު ބޮޑުވެ ބޯހިޔާވަހިކަން ލިބޭނެ މާޙައުލެއް ޤާއިމުކުރުމުގެ މުހިންމުކަން ފާހަގަކޮށްފައިވާކަމަށެވެ. އެގޮތުން މި ނޭޝަނަލް އެކްޝަން ޕްލޭނަކީ އެކަމަށް ޢަމަލުކުރުމަށް ގޮވާލުންކަމުގައި ވަޒީރު ފާހަގަކުރެއްވިއެވެ.

ވަޒީރު ޑރ .ޢައިޝަތު ޝިހާމް ވިދާޅުވީ، ކުޑަކުދިންނާ ދެކޮޅަށް ކުރެވޭ އަނިޔާތައް ހުއްޓުވުމަށާއި އެފަދަ ކަންކަމަށް އެކަށީގެންވާ ގޮތެއްގައި އިޖާބަދިނުމަށްޓަކައި، ފުޅާ އަދި އެއްބާރުލުން ދޭ އުސޫލެއް ގެންގުޅެން ޖެހޭކަމަށެވެ.

މީގެ ތެރޭގައި ކަމާގުޅުންހުރި ހުރިހާ ފަރާތްތަކަކާއި، މުޖުތަމަޢުގެ ޖަމިއްޔާތަކާއި، އަމިއްލަ ފަރުދުން އެއް ސަފެއްގައި ގުޅިގެން މަސައްކަތްކުރުން ހިމެނޭކަމަށް ވަޒީރު ވިދާޅުވިއެވެ.

"އެފްރިކާގެ ޙިކުމަތްތެރި ބަހެއްގައި ވާގޮތުން، 'ދަރިއެއް ތަރުބިއްޔަތުކުރުމަށް މުޅި ރަށެއް ބޭނުންވެއެވެ.' މިއިން ފާހަގަކޮށްދެނީ ކުދިން ކުރިއަރައި، ފޯދިގެން ދިއުމަށްޓަކައި މުޅި މުޖުތަމަޢުން ކުދިންނާއެކު ރަނގަޅު ގުޅުމެއް ބާއްވަންޖެހޭކަން. އަޅުގަނޑުމެން ގަބޫލުކުރާ ގޮތުގައި ރައްކާތެރިކަމުގެ އެންމެ ވަރުގަދަ ދިފާޢަކީ ކުރިއާލާ ހުއްޓުވުން. އެއީ އެންމެ މައްސަލަ ކުޑަ އަދި މުޖުތަމަޢު ބައިވެރިކުރުވާ ގޮތް. އަދި ކުޑަކުދިން ރައްކާތެރިކުރުމުގައި މުޖުތަމަޢު ބައިވެރިކުރުވުމަކީ އަޅުގަނޑުމެންގެ އުސޫލުގެ އަސާސް." ވަޒީރު ވިދާޅުވިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢައިޝަތު ޝިހާމް ވިދާޅުވީ، ދުނިޔޭގެ ހުރިހާ ކަންކޮޅުތަކެއްގައި، ހުރިހާ މުޖުތަމަޢުތަކެއްގައި އަދި ހުރިހާ ސަގާފަތްތަކެއްގައިވެސް ހުރިހާ ކުދިންނަށް ރައްކާތެރި އަދި އޯގާތެރި މާހައުލެއް ލިބުމުގެ ހައްގު އެބައޮތްކަމަށެވެ. ކުދިންނަށް ދިމާވާ ގޮންޖެހުންތަކަށް ހައްލު ހޯދުމަށް ގިނަ ދާއިރާތަކުން މަސައްކަތްތަކެއް ކުރަމުން ދިޔަ ނަމަވެސް، ދުނިޔޭގެ އެތައް ތަނެއްގައި މި މަސައްކަތްތަކަށް ބޮޑެތި ގޮންޖެހުންތައް ކުރިމަތިވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ކުޑަކުދިންގެ މުސްތަޤުބަލު ރައްކާތެރިކުރުމަށް އަލުން އަޒުމު ކަނޑައަޅަން ޖެހޭކަމަށައެވެ. އަދި ސަރުކާރާއި، މުޖުތަމަޢުތަކާއި، ވަކިވަކި ފަރުދުން ގުޅިގެން ކޮންމެ ކުއްޖަކުވެސް ރައްކާތެރިކޮށް، އަގުވަޒަންކޮށް، ބާރުވެރިކުރުވާ މުޖުތަމަޢުއެއް ބިނާކުރުމަށް މަސައްކަތްކުރުރަން ޖެހޭކަމަށެވެ.