މަސްވެރިންނަށް މިހާތަނަށް 1.1 ބިލިޔަން ރުފިޔާ ދޫކޮށްފި

މި ސަރުކާރުން މިހާތަނަށް މަސްވެރިންނަށް 1.1 ބިލިޔަން ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯއިން ވިދާޅުވެއްޖެއެވެ. މިއީ 3 ސެޕްޓެމްބަރާއި ހަމައަށް މަސްވެރިންނަށް ދޫކޮށްފައިވާ ފައިސާއެވެ.

މިސަރުކާރު ވެރިކަމާ ހަވާލުވެވަޑައިގެންނެވި އިރުވެސް މަސްވެރިންނަށް ދިވެހި ސަރުކާރުން ދައްކަންޖެހޭ ގިނަ ޢަދަދެއްގެ ފައިސާ ހުއްޓެވެ. ނުދައްކައި ހުރި ފައިސާ މިސަރުކާރުން ވަނީ މިހާރު ދައްކައި ޚަލާސްކޮށްފައެވެ.

މަސްވެރިން ސަރުކާރުގެ މަސްކުންފުނި މިފްކޯއަށް ކިރުވާ މަހަށް އެންމެ ލަސްވެގެން 2 ހަފްތާގެ ތެރޭގައި ފައިސާ ދޫކުރުމަށް ސަރުކާރުން މިހާރު ވަނީ ނިންމާފައެވެ. އެގޮތުން އޮގަސްޓް މަހުގެ 9 އަކުން 23 އަށް މަސްވެރިން ކިރާފައިވާ 445 ޓަނަށްވާ 5.4 މިލިޔަން ރުފިޔާ މިއަދު ވަނީ ޖަމާކޮށްފައެވެ.

މިފްކޯއިން ވިދާޅުވީ، 17 ނޮމެވްބަރ 2023 އިން ފެށިގެން 3 ސެޕްޓެމްބަރ 2024 އާއި ހަމައަށް މަސްވެރިންނަށް މިހާތަނަށް 1.1 ބިލިޔަން ރުފިޔާ ދޫކޮށްފައިވާކަމަށެވެ. މިއީ ޖުމްލަ 45،262 މެޓްރިކް ޓަނުގެ މަހަށް ދޫކޮށްފައިވާ ފައިސާއެވެ.

މިހާރު މަސްވެރިންނަށް ދޫކުރަންޖެހޭ ފައިސާގެ ތެރެއިން ޕެންޑިންގައި ހުރީ 24 އޮގަސްޓް އިން ފެށިގެން 2 ސެޕްޓެމްބަރ އަށް ދޫކުރަންޖެހޭ 6.1 މިލިޔަން ރުފިޔާކަމަށް މިފްކޯއިން ވިދާޅުވެއެވެ. އަދި އިއްޔެ އެކަނިވެސް އެ ކުންފުންޏަށް 43 ދޯންޏަކުން 121.8 މެޓްރިކް ޓަނުގެ މަސް ކިރާފައިވާކަމަށް އެކުންފުނިން ވިދާޅުވިއެވެ.

މިފްކޯއިން ވިދާޅުވީ، އެ ކުންފުނީގެ ހިންގުން ހަރުދަނާކޮށް އާމްދަނީ އިތުރުކުރެވޭނެ އިތުރު ގޮތްތައް ބަލައި، ޚަރަދުތައް ކުޑަކުރުމަށް ހަރުދަނާ ފިޔަވަޅުތައް އަޅަމުންދާނެކަމަށެވެ.