ޕާޓާ ޓްރެވެލް މާޓްގައި ރާއްޖެ އިސްތިހާރުކޮށްފި

ޕެސިފިކް އޭޝިއާ ޓްރެވަލް އެސޯސިއޭޝަން (ޕާޓާ) ގެ ޓްރެވަލް މާޓް 2024 ފެއާގައި ދިވެހިރާއްޖޭގެ ފަތުރުވެރިކަމުގެ ތަފާތު ފުރުސަތުތައް އިސްތިހާރުކޮށްފިއެވެ. މި ފެއާގައި ބައިވެރިވެފައިވަނީ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް، މަޓާޓޯ އާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީ ގުޅިގެންނެވެ.

މި ފެއަރ ބާއްވާފައިވަނީ ތައިލެންޑުގެ ބެންކޮކުގައެވެ. މި ފެއަރ ކުރިއަށްދިޔައީ އޮގަސްޓް 27 އިން 29 އަށެވެ.

3 ދުވަހުގެ މުއްދަތަށް ކުރިއަަށްދިޔަ މި ފެއާގައި ދިވެހިރާއްޖޭގެ ގުދުރަތީ ރީތިކަމާއި ކަނޑުއަޑީގެ ހިތްގައިމު މަންޒަރުތަކާއި ދިރުންތަކާއި ދިވެހިރާއްޖޭގައި ޗުއްޓީ ހޭދަކުރަން ހުރި އެކި ފަންތީގެ ތަންތަނާއި، ފުރުސަތުތައް އިސްތިހާރުކޮށްފައިވާކަމަށް އެމްއެމްޕީއާރުސީން ވަނީ ބުނެފައެވެ.

އެމްއެމްޕީއާރުސީން ބުނީ ފެއަރގައި މަޖާ މޫދު ކުޅިވަރުގެ ހަރަކާތްތަކާއި އައިލެންޑް ރިޓްރީޓްތަކުން ފެށިގެން ގޮސް ރާއްޖެއިން ލިބެންހުރި ތަފާތު ތަޖުރިބާތައް ދައްކާލާފައިވާކަމަށެވެ. އަދި "ދިވެހިރާއްޖެ-ސަނީ ސައިޑް އޮފް ލައިފް" އަކީ ހުރިހާ ފަރާތްތަކުން ވެސް ބޭނުންވާފަދަ ތަފާތު ތަޖުރިބާތަކެއް ލިބެންހުރި ފަތުރުވެރި މަންޒިލެއްގެ ގޮތުގައި މިފެއާގައި އިސްތިހާރުކޮށްފައިވާކަމަށެވެ.

އެމްއެމްޕީއާރުސީން ބުނީ ފަތުރުވެރިކަމަކީ ރާއްޖޭގެ މައި ސިނާއަތަށްވާއިރު މި ސިނާއަތަށް ދެމެހެއްޓެނިވި ކުރިއެރުން ހޯދުމަށް ބައިނަލްއަޤްވާމީ ފަރާތްތަކާއެކު މަސައްކަތްކުރުމަށް ރާއްޖެއިން ކުރާ މަސައްކަތަށް އިތުރު ބާރެއް މިފެއާގެ ސަބަބުން ލިބިގެން ދިޔަކަމަށެވެ.

ޕާޓާ ޓްރެވަލް މާޓް 2024ގައި ވަނީ ތައިލެންޑުގައި ޕާޓާ ގާއިމުކުރިތާ 25 އަހަރު ފުރުން ފާހަގަކޮށްފައެވެ.