އެންމެ އުފާވަނީ މުޖްތަމަޢުން ޒުވާން ޚަޠީބުން ބަލައިގަނެފައިވާތީ: ވަޒީރު ޝަހީމް

ޒުވާން ޚަޠީބުން ޕްރޮގްރާމުން ސަނަދު ހާސިލްކޮށްފައިވާ ޚަތީބުން މުޖްތަމަޢުން ވަރަށް ބޮޑަށް ބަލައިގަނެފައިވާ ކަމަށް އިސްލާމީ ކަންތައްތަކާއި ބެހޭ ވަޒީރު މުޙައްމަދު ޝަހީމް އަލީ ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ޒުވާން ޚަޠީބުން ތަމްރީންކުރުމުގެ 2 ވަނަ ބުރުގެ ބައިވެރިންނަށް ސަނަދު ދިނުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ޒުވާން ޚަޠީބުން ތަމްރީންކުރުމުގެ 2 ވަނަ ބުރުގައި 209 ކުއްޖަކުވަނީ ސަނަދު ހާސިލްކޮށްފައެވެ. މިރަސްމިއްޔާތުގައި ވާހަކަފުޅުދައްކަވަމުން އިސްލާމީ ކަންތައްތަކާ ބެހޭ ވަޒީރު މުޙައްމަދު ޝަހީމް އަލީ ސައީދު ވިދާޅުވީ، މުޖްތަމަޢަށް ބޭނުންވަނީ ނަމޫނާ ޒުވާނުންކަމަށެވެ. އެންމެ ނަމޫނާ ޒުވާނުންނަކީ ހުކުރު ދުވަހުގެ މިންބަރުން ހެޔޮ ކަންކަމަށް ގޮވާލާ ނުބައި ކަންކަން ނަހީކުރާ ޒުވާނުން
ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، އަމާޒަކީ މިދައުރުތެރޭގައި 1000 ޒުވާން ޚަޠީބުން މުޖްތަމަޢަށް ނެރުންކަމަށެވެ. އެގޮތުން މިހާތަނަށް ހިންގި 2 ޕްރޮގްރާމުން 300އަށްވުރެ ގިނަ ޚަޠީބުންވަނީ ތަމްރީންކޮށްފައެވެ. މިޕްރޮގްރާމަށް ވަރަށް ބޮޑު ތަރުހީބެއް ލިބެމުން އަންނަކަމަށާއި، މިޕްރޮގްރާމުން ސަނަދު ހާސިލްކުރާ ޚަޠީބުން މުޖްތަމަޢުންވެސް ވަރަށް ބޮޑަށް ބަލައިގަނެފައިވާކަމަށެވެ.

މިޕްރޮގްރާމް ނިންމާ ޚަޠީބުން އެހެން ދާއިރާއެއް ޚިޔާރުކުރިނަމަވެސް މިކަން ދޫކޮށްނުލާ ކުރިއަށްދިއުމަށް އިސްލާމީ ކަންތައްތަކާ ބެހޭ ވަޒީރު ގޮވާލެއްވިއެވެ. ޚަޠީބުކަމުގެ ސަނަދު އޮތުމަކީ ޝަހްސިއްޔަތަށް އިތުރުވެގެންދާ އިތުރު ސިފައެއް ނުވަތަ މުއްސަނދިކަމެއްކަމަށް ވަޒީރު ވިދާޅުވިއެވެ.

"އަޅުގަނޑު އެންމެ އުފާވާ އަނެއްކަމަކީ ޒުވާން ޚަޠީބުން އަޅުގަނޑުމެންގެ މުޖްތަމަޢުން އެކަން ބަލައިގަތްކަން. ބައެއް ރަށްރަށުގައި މާބޮނޑިއާއިއެކީގައި މަރުހަބާ ކިޔާ ޒުވާން ޚަޠީބު އެރަށައް ދިޔައީމަ. ޢީދު ނަމާދުގެ ބޮޑު ޖަމާއަތުގައި ނަމާދު ކުރަން އޭނާއާއި ހަވާލުކުރޭ. އަދި ޒުވާން ޚަތީބަކު އެރަށަށް ލިބުނީމަ ކައުންސިލްގެ ފޭސްބުކް ޕޭޖްގައި ލިޔެފައި ހުންނަތަން ފެނޭ. މިކަންކަމުން މި ދޭހަވަނީ އަޅުގަނޑުމެންގެ މުޖްތަމަޢުން އެކަންކަމަށް ބޭނުންވެފައިވާ މިންވަރު." ޝަހީމް ވިދާޅުވިއެވެ.

މިޕްރޮގްރާމްގެ ތެރެއިން ޚަތީބުންނަށް ޚުތުބާ ކިޔުމަށާއި، އިމާމުވެ ނަމާދު ކުރުމަށާއި، ދީނާ ގުޅުން ހުރި އެހެނިހެން ޚާއްޞަ ތަމްރީނުތައް ވަނީ ދީފައެވެ. ޒުވާން ޚަޠީބު ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރު ކުރުމުގެ ހުއްދަ ދިނުމަށް ކުރިއަށްގެންދާ ޕްރޮގްރާމެކެވެ. އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ މިޕްރޮގްރާމަކީ ރައީސް ޑރ. މުހައްމަދު މުޢިއްޒުގެ އިރުޝާދުގެ ދަށުން ކުރިއަށްގެންދާ ޕްރޮގްރާމެކެވެ.