ކާރިސީ ހިރާސްތައް ކުޑަކުރުމަށް މުޅި ރާއްޖެ ހިމެނޭހެން މަސައްކަތްތަކެއް ފަށައިފި
-
އެންޑީއެމްއޭއިން ވަނީ ކުރިއަށް އޮތް 4 އަހަރުގެ ސްޓްރެޓެޖިކް ޕްލޭން އެކުލަވާލާފައި
-
ރައްޔިތުންނަށް ފޯރުކޮށްދޭ އެމަރޖެންސީ ރެސްޕޮންސް ހަރުދަނާކުރުމަކީ އަމާޒެއް
ކާރިސީ ހިރާސްތައް ކުޑަކުރުމަށް މުޅި ރާއްޖެ ހިމެނޭހެން މަސައްކަތްކުރުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީއެމް.އޭއިން އައު ސްޓްރެޓެޖިކް ޕްލޭނެއް އެކުލަވާލާ އިފްތިތާޙުކޮށްފައެވެ.
އެން.ޑީ.އެމް.އޭގެ އައު ސްޓްރެޓެޖިކް ޕްލޭން އިފްތިތާޙުކޮށްދެއްވީ އެކަމަށްޓާ މީރުމާ ހޯޓެލްގައި ބޭއްވި ޚާއްސަ ރަސްމިއްޔާތުގައި ދިފާއި ވުޒާރާގެ ސްޓޭޓް މިނިސްޓަރ އައިޝަތު ސަފޫރާއެވެ.
މި ރަސްމިއްޔާތުގައި ވާހަކަދައްކަވަމުން ދިފާއި ވުޒާރާގެ ސްޓޭޓް މިނިސްޓަރ އައިޝަތު ސަފޫރާ ވިދާޅުވީ، އެން.ޑީ.އެމްގެ ޕްލޭންގައި ވާ ކަންކަން ތަންފީޒުކުރުމަށް ބޮޑު އަހައްމިއްޔަތުކަމެއް ދޭނެކަމަށެވެ. އަދި މޫސުމީ ބަދަލުތަކުގެ ސަބަބުން ކުރިމަތިވާ ގުދުރަތީ ކާރިސާތައް އިތުރުވަމުންދާތީ، މި ޕްލޭންގެ ދަށުން މިކަމަށް ޚާއްސަ ސަމާލުކަމެއް ދޭނެކަމަށްވެސް ސަފޫރާ ވިދާޅުވިއެވެ.
ސަފޫރާ ވިދާޅުވީ ދިވެހިރާއްޖެއަކީ ނާޒޫކު ތިމާވެއްޓެއް އޮންނަ ޤައުމަކަށްވާއިރު މޫސުމީ ބަދަލުތަކުގެ ސަބަބުން އެކި ނުރައްކަލާ ކުރިމަތިވާކަމަށެވެ. އެހެންކަމުން މިކަމަކީ ވަގުތުން ވަގުތަށް ފިޔަވަޅު އަޅަންޖެހޭ ކަމެއްކަމަށް އޭނާ ވިދާޅުވިއެވެ.
"ރާއްޖޭގެ ކޮންމެ ރަށަކީވެސް ކުއްލިހާލަތުގައި އިޖާބަދެވޭނެ ވަސީލައްތައް ގާއިމްވެފައި ހުރި ތަނަކަށް ހަދަން ޖެހޭ. އަދި ވަސީލައްތައް ގާއިމްކޮށް އިތުރަށް މުޖްތަމައު ހޭލުންތެރިކަން އިތުރުކުރަންޖެހޭ" ސަފޫރާ ވިދާޅުވިއެވެ.
މި ރަސްމިއްޔާތުގައި ވާހަކަދައްކަމުން އެން.ޑީ.އެމް.އޭގެ ޗީފް އެގްޒެކެޓިވް ހިސާން ހުސައިން ވިދާޅުވީ، ރާއްޖޭގައި ކާރިސާތައް މެނޭޖްކުރުމުގެ މަސްއޫލިއްޔަތު އުފުލާ މުއައްސަސާއަކީ އެން.ޑީ.އެމް.އޭކަމަށްވާއިރު މުޖުތަމައުގައި ހުރި ނާޒުކުކަން އަބަދުވެސް ފެންނަމުންދާކަމަށެވެ. އަދި އެން.ޑީ.އެމް.އޭއާއި ކަމާއި ގުޅުންހުރި އިދާރާތަކަށް ކާރިސާތަކުގެ ނުރައްކާތެރިކަމާއި، ނާޒުކުކަމުގެ ސަބަބުން ތަކުރާރުކޮށް ލިބޭ ގެއްލުންތަކުގެ ބޮޑުކަން ރަނގަޅަށް އެނގިވަޑައިގަންނަވާކަމަށެވެ.
މިކަން ހައްލުކުރުމަށް ބޮޑު މަސައްކަތްތަކެއް ކޮށްފައިވީނަމަވެސް، އަދިވެސް ކުރަންޖެހޭ މަސައްކަތްތައް ގިނަކަމަށް ހިސާން ވިދާޅުވިއެވެ.
ހިސާން ވިދާޅުވީ ކުރިމަތިލާންޖެހިފައިވާ ގޮންޖެހުންތަކާއި އަދި ކުރިމަގުގައި ދިމާވެދާނެ ކަންތައްތަކުން އަރައިގަތުމަށްޓަކައި، އެކުގައި މަސައްކަތްކުރުމާއި، ދުރު މުސްތަޤުބަލަށް ވިސްނުމާއި، އަދި ކާރިސާގެ ނުރައްކާތެރިކަން ކުޑަކުރުމުގެ ކަންތައްތައް ޤައުމީ ޕްލޭންތަކާއި މަޝްރޫޢުތަކުގައި ހިމެނުމަކީ ކޮންމެހެން މުހިންމު ކަމެކެވެ.
"މި ސްޓްރެޓެޖިކް ޕްލޭން އެކުލަވާލުމުގައި، ރާއްޖޭގައި ކާރިސާ ބެލެހެއްޓުމުގެ މަސައްކަތް އިތުރަށް ހަރުދަނާކުރުމަށް ބޭނުންވާ ކަންތައްތައް ދެނެގަނެ، އެކަންކަމަށް ހައްލު ހޯދުމަށް ވަރަށް ފުންކޮށް ދިރާސާކުރެވިފައިވޭ. މި ޕްލޭން ތަންފީޒުކުރުމާއި މަޤްޞަދު ޙާޞިލުކުރެވޭނެކަމުގެ އުންމީދު އަޅުގަނޑުގެ ހިތުގައި އެބައޮތް." ހިސާން ވިދާޅުވިއެވެ.
އެން.ޑީ.އެމް.އޭއިން 2024 އިން 2029 އަށް އެކުލަވާލި އައު ސްޓްރެޓެޖިކް ޕްލޭންގައި އެންމެ މުހިންމުކަމެއްކަމުގައި ފާހަގަކޮށްފައިވަނީ އެ އޮތޯރިޓީން ރައްޔިތުންނަށް މިހާރު ފޯރުކޮށްދޭ އެމަރޖެންސީ ރެސްޕޯންސް އަދި އިންސާނީ ޚިދުމަތްގެ ފެންވަރު މަތިކޮށް، ކާރިސީ ހީރާސް ކުޑަކުރުމުގެ މަސައްކަތުގައި ހުރިހާ ދާއިރާތަކެއްގެ ބައިވެރިވުމާއެކު ވިލުންވެރި މުޖުތަމައުއެއް ބިނާކުރުންކަމަށް އެން.ޑީ.އެމް.އޭއިން ވިދާޅުވެއެވެ.
އެން.ޑީ.އެމް.އޭއިން ވިދާޅުވީ، މި ސްޓްރެޓެޖިކް ޕްލޭންގެ މަޤްޞަދުތައް ހާސިލުކޮށް، ކާރިސާގެ ނުރައްކާ ކުޑަކުރުމުގެ މަސައްކަތްތައް ހަރުދަނާކޮށް އަދި ޤައުމީ ފެންވަރުގައި ކާރިސާތަކާ ކުރިމަތިލުމުގެ ޤާބިލުކަން އިތުރުކުރުމަށްޓަކައި ކަނޑައެޅިފައިވާ ނިޒާމުތައް ތަންފީޒުކުރުމަކީ އަމާޒެއްކަމަށެވެ.