ސައްޙަ ވިސާނެތި އުޅޭ ބިދޭސީން ދެނެގަތުމުގެ އޮޕަރޭޝަން އަތޮޅުތަކަށް ފުޅާކުރަނީ

ޤަވާއިދާ ޚިލާފަށް ވިޔަފާރިކޮށް، ސައްޙަ ވިސާއެއްނެތި އުޅެމުންދާ ބިދޭސީން ދެނެގަތުމަށް ކުރިއަށްގެންދާ އޮޕަރޭޝަން، އަތޮޅުތަކަށް ފުޅާކުރެއްވުމަށް މަސައްކަތްކުރައްވަމުން ގެންދަވާކަމަށް ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު ވިދާޅުވެއްޖެއެވެ. ކޮންޓްރޯލަރ ޖެނެރަލް މިހެން ވިދާޅުވީ، މާލެ ސަރަޙައްދުގައި ކުރިއަށްގެންދިޔަ ޤަވާއިދާ ޚިލާފަށް އުޅޭ ބިދޭސީން ހޯދައި އަދި އުޅޭ ސަރަހައްދުތައް ދެނެގަތުމުގެ އޮޕަރޭޝަނާ ގުޅޭ މަޢުލޫމާތު މީޑީއާއާ ޙިއްސާކުރައްވަމުންނެވެ.

ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު ވިދާޅުވީ، ޤަވާއިދާ ޚިލާފަށް ރާއްޖޭގައި ދިރިއުޅެމުންދާ ބިދޭސީން ގަވާއިދުގެ ތެރެއަށް ވެއްދުމަށްޓަކައި ގިނަގުނަ މަސައްކަތްތަކެއް ކުރެވެމުންދާކަމަށެވެ. މި ގޮތުން ފެއްޓެވި ޚާއްޞަ އޮޕަރޭޝަނަކީ މި މައްސަލަ ޙައްލުކުރުމަށް އެޅުނު އެންމެ މުހިންމު ފިޔަވަޅުތަކުގެ ތެރެއިން އެއް ފިޔަވަޅު ކަމުގައި ޝަމްޢާން ފާހަގަކުރެއްވިއެވެ.

ޝަމްޢާން ވިދާޅުވީ އިމިގްރޭޝަނުގެ 211 އޮފިސަރުން މަގުތަކަށް ނިކުމެ ކުރިއަށްގެންދިޔަ މާސް އިންސްޕެކްޝަނުން ގަވާއިދާ ޚިލާފަށް ޢަމަލުކުރަމުންދާ ގިނަ ޢަދަދެއްގެ ބިދޭސީން ފާހަގަކުރެވިފައިވާކަމަށެވެ. މީގެ ތެރެއިން ބައެއް މީހުން އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށްވެސް ޝަމްޢާން ވިދާޅުވިއެވެ. އަދި ގަވާއިދާ ޚިލާފަށް ހިންގަމުންދިޔަ ބައެއް ވިޔަފާރިތަކަށް ގަވާއިދުގެ ތެރެއަށް ވަނުމަށް 1 މަސްދުވަހުގެ މުއްދަތެއް ދެވިފައިވާ ކަމަށާއި، މި މުއްދަތު ހަމަވާއިރު އެ އެތަންތަން ގަވާއިދާ އެއްގޮތަށް ޢަމަލުކުރަން ނުފަށައިފިނަމަ، އެ ފިޔަވަޅުއަޅާނެކަމުގެ އިންޒާރުވެސް ދީފައިވާކަމަށް ކޮންޓްރޯލަރ ޖެނެރަލް އޮފް އިމިގްރޭޝަން ވިދާޅުވިއެވެ.

ގަވާއިދާ ޚިލާފަށް މާލެ ސަރަހައްދުގައި ދިރިއުޅެމުންދާ ބިދޭސީން، ފިލުމުގެ މަސައްކަތްކުރަމުންދާކަމަށްވެސް ކޮންޓްރޯލަރ ވިދާޅުވިއެވެ. އެގޮތުން ބައެއް ބިދޭސީން ކުޅުދުއްފުށްޓަށް ހިޖުރަކުރަމުންދާކަމުގެ މަޢުލޫމާތު ކައުންސިލުން ދީފައިވާކަންވެސް ޝަމްޢާން ފާހަގަކުރިއެވެ.

ޝަމްޢާން ވިދާޅުވީ، ޤަވާއިދާ ޚިލާފަށް ވިޔަފާރިކޮށް، ސައްޙަ ވިސާއެއްނެތި އުޅެމުންދާ ބިދޭސީން ދެނެގަތުމަށް ކުރިއަށްގެންދާ އޮޕަރޭޝަން، އަތޮޅުތަކަށް ފުޅާކުރުމުގެ މަސައްކަތް ކުރަމުންދާކަމަށެވެ.

"އަޅުގަނޑުމެންނަށް މައުލޫމާތު ލިބިފައިވޭ ބައެއް ބިދޭސީން ކުޅުދުއްފުއްޓައް މިހާރު ދާކަމަށް. ކުޅުދުއްފުށި ކައުންސިލުންވެސް ވަނީ އަޅުގަނޑުމެންނަށް މައުލޫމާތު ދީފައި." ކޮންޓްރޯލަރ ޖެނެރަލް އޮފް އިމިގްރޭޝަން ވިދާޅުވިއެވެ.

ޤަވައިދާ ޚިލާފަށް ރާއްޖޭގައި އުޅެމުންދާ ބިދޭސީން ހޯދައި، މިހާތަނަށް 3300 އަށްވުރެ ގިނަ ބިދޭސީން ޑީޕޯޓް ކުރިކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝައްމާން ވަހީދު ވަނީ ވިދާޅުވެފައެވެ.

ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެކެވެ. އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތްވެސް ދަނީ ކުރަމުންނެވެ.