ކުޑަހުވަދޫގެ ގެތަކުގައި ސްމާޓް މީޓަރު ހަރުކޮށް ނިންމާލައިފި

ފެނަކަ ސްމާރޓް މީޓަރ ޕްރޮޖެކްޓްގެ ދަށުން ދ. ކުޑަހުވަދޫގެ ހުރިހައި ގޭބީސީއެއްގައި ސްމާރޓް މީޓަރ ހަރުކޮށް ނިންމާލައިފިއެވެ.

ފެނަކަ ސްމާރޓް މީޓަރ ޕްރޮޖެކްޓަކީ ޓެކްނޮލޮޖީގެ އެހީގައި ލިބޭ ކުރިއެރުންތަކުގެ ލުއިފަސޭހަތައް ކަސްޓަމަރުންނާ ހަމައަށް ފޯރުކޮށްދިނުމުގެ މަޤްސަދުގައި އިފްތިތާޙްކޮށްފައިވާ ޕްރޮޖެކްޓެކެވެ.

ފެނަކައިން ކުރިއަށް ގެންދާ ސްމާރޓް މީޓަރ ޕްރޮޖެކްޓް ދަށުން ބޭނުންކުރާ ސްމާރޓް މީޓަރަކީ، ކުރިން ބޭނުން ކުރަމުންދިޔަ އެނަލޮގް މީޓަރުތަކާއި ޑިޖިޓަލް މީޓަރުތަކުގެ ބަދަލުގައި މުޅިން އޮޓޮމޭޓްކުރެވި، ކަސްޓަމަރުންނަށް ފަސޭހަކަމާއެކު މޮނިޓަރ ކުރެވޭނެ މީޓަރެއްކަމަށް ފެނަކައިން ވަނީ ބުނެފައެވެ.

ފެނަކަ ސްމާރޓް މީޓަރ ޕްރޮޖެކްޓްގެ ދަށުން ދ. ކުޑަހުވަދޫގެ ހުރިހައި ގޭބީސީއެއްގައި ސްމާރޓް މީޓަރ ހަރުކޮށް ނިންމާލުމަށް ބޭއްވި ރަސްމިއްޔާތުގައި ފެނަކައިން ވަނީ، ސްމާރޓް މީޓަރ އެޕްލިކޭޝަންވެސް އިފްތިތާޙްކޮށްފައެވެ. މި އެޕްލިކޭޝަން އިފްތިތާހުކޮށްދެއްވީ މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ތާރިޤް އިބްރާހިމްއެވެ. މިއީ ފެނަކައިގެ ސްމާރޓް މީޓަރުތަކުގެ ޚިދުމަތް ލިބޭ ފަރާތްތަކަށް، އަމިއްލަ ފޯނުން، ގޭގައި ކަރަންޓު ހިނގާ މިންވަރު ދުވަހުން ދުވަހަށް ބަލައި މޮނިޓަރ ކުރެވޭނެ އެޕްލިކޭޝަނެއްކަމަށް ފެނަކައިން ވަނީ ބުނެފައެވެ.

މި ރަސްމިއްޔާތުގައި ވާހަކަދައްކަވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު ވިދާޅުވީ، މިހާރު ހަމައެކަނި ދުވާލަކު ބޭނުންކުރެވޭ މިންވަރު ފެނުނުނަމަވެސް ކުރިއަށްއޮތް ތަނުގައި އެ ކުންފުނީގެ އަމާޒަކީ ކޮންމެ ގަޑިއިރަކު ކަރަންޓް ބޭނުންކުރެވޭ މިންވަރު ކަސްޓަމަރުންނަށް ފެންނާނެ އިންތިޒާމް ހަމަޖެއްސުންކަމަށެވެ.

"އަޅުގަނޑު ދެކޭގޮތުގައި ކަރަންޓް އިގްތިޞާދުކުރުމަށް މި ޕްރޮޖެކްޓްގެ ސަބަބުން ވަރަށް ބޮޑު ފަސޭހައެއް ރައްޔިތުންނަށް ލިބިގެންދާނެ. ރައްޔިތުންނަށް އެ ލިބޭ މިންވަރަކަށް ކަރަންޓް ބޭނުންކުރުމަށް ރައްޔިތުންނަށް ލިބޭ ފުރުސަތަކަށް މި ޕްރޮޖެކްޓް ވެގެންދާނެ. ކުރިއަށްއޮތް ތަނުގައި އަޅުގަނޑުމެންގެ އުންމީދަކީ ފެނަކައިގެ އިރާދަކުރެއްވިއްޔާ ފެނުގެ މީޓަރުތައްވެސް ސްމާރޓްކުރުން. ފެން ބޭނުންކުރާ މިންވަރުވެސް ރައްޔިތުންގެ ފޯނުތަކުން ދުވަހުން ދުވަހަށް ބެލޭނެ އިންތިޒާމް ހަމަޖެހިގެން ދިއުން" މުއާޒް ވިދާޅުވިއެވެ.

ކުޑަހުވަދޫ އާއި ދާލު އަތޮޅުގެ ހުރިހާ ރަށެއްގެ އިތުރުން ވެސް ގިނަ އަތޮޅުތަކެއްގައި މި ޕްރޮޖެކްޓްގެ ދަށުން ސްމާރޓް މީޓަރު ހަރުކުރުމުގެ މަސައްކަތް ފެނަކައިން ދަނީ ކުރަމުންނެވެ. އޭގެތެރޭގައި، ހ.ދ، ބ، މ، ފ، ތ އަތޮޅުގެ އިތުރުން ފުވައްމުލަކު ސިޓީގައިވެސް މި ޕްރޮޖެޓްކް ދަނީ ހިންގަމުންނެވެ.

ޗައިނާގެ ޑޮންފަންގ ކުންފުނީގެ އުފެއްދުމެއްކަމަށްވާ މި ސްމާޓް މީޓަރަކީ، ބައިނަލްއަޤުވާމީ މިންގަނޑުތަކަށް ފެތޭ، ދުނިޔޭގެ އެންމެ ކުރިއަރާފައިވާ ޤައުމުތަކުގައިވެސް ބޭނުންކުރާ މީޓަރެކެވެ. ޔޫޓިލިޓީ ރެގިއުލޭޓަރީ އޮތޯރިޓީގެ ޤަވައިދުތަކަށް ފެތޭ މި ސްމާރޓް މީޓަރ ޓެސްޓު ކުރެވޭނެ ވަޞީލަތްތައް ފެނަކައިގަ ވަނީ ޤާއިމްކޮށްފައެވެ.