މާލީ ދަތިތައް ހުރިނަމަވެސް ރައީސް ދެއްވީ ވަޢުދުތައް ފުއްދަވާނެކަމުގެ ޔަގީންކަން

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރުގެ ނޮވެމްބަރު މަހުގެ 17ވަނަ ދުވަހު ރާއްޖޭގެ ވެރިކަމާ ހަވާލުވެވަޑައިގެންނެވިއިރު އިޖުތިމަޢީ ގޮތުންނާއި އިގްތިސާދީ ގޮތުން ރާއްޖޭގެ ހާލަތު އޮތްގޮތް އެމަނިކުފާނު ވަނީ ވަރަށް ސާފުކޮށް ރައްޔިތުންނަށް ބަޔާންކޮށްދެއްވާފައެވެ. ކުރީ ސަރުކާރުން ފައިސާ ޗާޕުކުރުމާއި ދަރަނިބޮޑުކުރުމުގެ ސަބަބުން އިގްތިސާދީ އަނދަވަޅަކަށް ޤައުމު ވެއްޓިފައިވާއިރު އެކަން ހައްލުކުރައްވައި ޤައުމުގެ އިގްތިސާދު އަލުން އަނބުރާ ކޮޅައް ޖައްސަވާނެކަމަށާއި ޤައުމުގެ މިނިވަންކަން ރައްކާތެރިކުރައްވައި އިޖުތިމާއީ ގޮތުން ހުރި ކަންކަން ހައްލުކުރައްވާނެކަމަށް އެމަނިކުފާނު ވަނީ ވިދާޅުވެފައެވެ.

ޤައުމުގެ ހާލަތު ރަނގަޅުކުރުމުގެ މަސައްކަތް ސަރުކާރުން އަންނަނީ ކުރަމުންނެވެ. އެގޮތުން، އިގްތިސާދީގޮތުން ދިމާވެފައިވާ ދަތިތަކަށް އަންނަ ނޮވެމްބަރު މަސް އަންނަންވާއިރަށް ހައްލު ހޯއްދަވައިދެވޭނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި ސަރުކާރުގެ ކޮންމެ ނިންމެވުމެއްގައި ރައްޔިތުންނާއި ޤައުމަށް ފައިދާވާނެ ގޮތް އިހްތިޔާރުކުރައްވާނެކަމުގެ ފުރިހަމަ ޔަގީންކަންވެސް އެމަނިކުފާނު ދެއްވައެވެ.

އިގްތިސާދީ ގޮތުން ދިމާވެފައިވާ މައްސަލަތަކުގެ އިތުރުން އިޖުތިމާޢީ ގޮތުން ދިމާވެފައިވާ ކަންކަން ހައްލުކުރެއްވުމަށް ޒުވާނުން ބާރުވެރިކުރުވުމަކީވެސް ރައީސުލްޖުމްހޫރިއްޔާގެ ވައުދުފުޅެކެވެ. އަދި ޒުވާނުންނަށް އިޤްތިސާދީ ފުދުންތެރިކަން ހޯދައިދީ ހެޔޮ ދިރިއުޅުމެއް ފޯރުކޮށްދިނުމަށް ގެދޮރުވެރިކަމާއި ވަޒީފާ ހޯދައިދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ދެއްވައެވެ.

"ޒުވާނުންނަކީ އަޅުގަނޑުމެންގެ ސަރުކާރުގައި އެންމެ އިސްކަމެއްދޭ އެއް ފަރަތް ސޮސައިޓީގައި. ޒުވާނުން ބާރުވެރިކުރުވުމާއި ޒުވާނުންނަށް އިގްތިސާދީ ފުދުންތެރިކަން ހޯދައިދިނުމާއި އެ ޒުވާނުންނަށް ހެޔޮ ދިރިއުޅުމެއް ހޯދައިދީ، ގެދޮރުވެރިކަމާއި ވަޒީފާއާއި މިކަންކަން ހޯދައިދިނުމަކީ އަޅުގަނޑުމެންގެ މެނިފެސްޓޯގައި ބޮޑު ބައެއް ހިއްސާ ކުރާކަމެއް. އަދި އަމަލީ ގޮތުން ސަރުކާރުގެ ސިޔާސަތުގަވެސް ވަރަށްބޮޑު ބައެއް އޮންނާނީ އެކަމުގަ،" ރައީސް ވިދާޅުވިއެވެ.

ޤައުމުގެ ކޮންމެ ރައްޔިތެއްގެވެސް އެންމެ ބޮޑު ކަންބޮޑުވުމަކީ ބޯހިޔާވަހިކަމެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޑައިގެންނެވީ ކުރިއަށް އޮތް 5 އަހަރު ދުވަހުގެ ތެރޭގައި ރައްޔިތުންގެ މި ކަންބޮޑުވުން ހައްލު ކޮށްދެއްވާނެކަމުގެ ވައުދުފުޅާއެކުގައެވެ. އެގޮތުން، ފަސް އަހަރު ނިމޭއިރު ބޯހިޔާވަހިކަން ނުލިބޭ އެއްވެސް ރައްޔިތަކު ނުހުންނާނެކަމުގެ ޔަގީންކަން އެމަނިކުފާނު ދެއްވައެވެ.

އިގްތިސާދީ ގޮތުން ރާއްޖޭގެ ހާލަތު ދަށްވުމުގެ ސަބަބުން ރައީސުލްޖުމްހޫރިއްޔާގެ ވައުދުތައް ފުއްދެވޭނެ ކަމާމެދު އިދިކޮޅު ފަރާތްތަކުން ސުވާލު އުފައްދައެވެ. ނަމަވެސް އެމަނިކުފާނު އަބަދުވެސް ދެއްވާ ޔަގީންކަމަކީ ރައްޔިތުންނަށް ވެވަޑައިގެންނެވި ވައުދުތައް ފުއްދަވައިދެއްވާނެ ކަމެވެ.

"މިކުރާ މަސައްކަތް އިރާދަކުރެއްވިއްޔާ ކާމިޔާބު ކުރާނަން. އިރާދަކުރެއްވިއްޔާ އިގްތިސާދު ވަރުގަދަކުރާނަމޭ. ރައްޔިތުންގެ ބޯހިޔާވަހިކަން ރައްޔިތުންނަށް ހޯދައިދޭނަމޭ. ވައުދުވިގޮތަށް ރައްޔިތުނަށް ކޮށްދޭންވީ ކަންކަން އަޅުގަނޑުމެން ކުރާނީ ރައްޔިތުންނަށް ބޭނުންވާ ގޮތަށް، އަޅުގަނޑު ވައުދުވިގޮތަށޭ،" ރައީސުލްޖުމްހޫރިއްޔާ ވިދާޅުވިއެވެ.

ރާއްޖޭގައި ދިމާވެފައިވާ އިޖުތިމާޢީ މައްސަލަތަކުގެ ތެރެއިން ބިދޭސީންގެ މައްސަލައާއި މަސްތުވާތަކެތީގެ މައްސަލައަކީވެސް މިހާތަނަށް ހައްލެއް ނުލިބި އޮތް ދެ މައްސަލައެވެ. މި މައްސަލަތައްވެސް ހައްލުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން، ގަވާއިދާއި ޚިލާފަށް އުޅޭ ބިދޭސީން ދެނެގަނެ، އެ މީހުން އަނބުރާ ފޮނުވާލުމާއި ގަވާއިދާ ޚިލާފަށް ކުރަމުން އަންނަ ވިޔަފާރިތައް ހުއްޓުވައި އެތައް ފިޔަވަޅުތަކެއް ސަރުކާރުން އަންނަނީ އަޅުއްވަމުންނެވެ. މީގެ އިތުރުން ގޭންގު ކުށްތަކާއި މަސްތުވާތަކެތީގެ މައްސަލަ ހައްލުކުރުމަށް ޤާނޫނަށް ގެންނަންޖެހޭ މުހިންމު ބަދަލުތައް ގެނައުމުގެ މަސައްކަތްވެސް ސަރުކާރުން މިހާރު ވަނީ ފައްޓަވާފައެވެ.