ސައުދީ ފަންޑް ފޯރ ޑިވެލޮޕްމަންޓްގެ އިސްވެރިންނާއި ޚާރިޖީ ވަޒީރު ބައްދަލުކުރައްވައިފި
-
މި ބައްދަލުވުން ބޭއްވީ ވަޒީރު ސައުދީއަށް ކުރައްވާ ދަތުރުފުޅުގެ ތެރެއިން
-
އެހީތެރިކަން ބޭނުންވާ ދާއިރާތަކާއި ގުޅޭގޮތުން މަޝްވަރާކުރެއްވި
ރާއްޖެއަށް ބޭނުންވާ މާލީ އެހީތެރިކަން ހޯދުމަށް ސައުދީ ފަންޑް ފޯރ ޑިވެލޮޕްމަންޓްގެ އިސްވެރިންނާއި ޚާރިޖީ ވަޒީރު މޫސާ ޒަމީރު ބައްދަލުކުރައްވައިފިއެވެ. ސައުދީ ފަންޑް ފޯރ ޑިވެލޮޕްމަންޓްގެ ބޭފުޅުންނާއި ޚާރިޖީ ވަޒީރު ބައްދަލުކުރައްވާފައި މިވަނީ ވަޒީރު ސައުދީ އަރަބިއްޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
ޚާރިޖީ ވަޒީރު މޫސާ ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ، ސައުދީ ފަންޑް ފޯރ ޑިވެލޮޕްމަންޓްގެ ސީއީއޯ ސުލްތާން ބިން އަބްދުއްރަހްމާން އަލް މަރޝާދްއާއިއެކު ބޭއްވެވި ބައްދަލުކުރެއްވުމަކީ ކާމިޔާބު ބައްދަލުވުމެއްކަމަށެވެ. މިބައްދަލުވުމުގައި ރާއްޖޭގައި މިހާރު ހިނގަމުންދާ މަޝްރޫއުތަކާއި އަދި ކުރިއަށްރޭވިފައިވާ މަޝްރޫއުތަކުގެ މައުލޫމާތު ހިއްސާކުރައްވާފައިވާކަމަށް ވަޒީރު ވިދާޅުވިއެވެ.
އަދި ރާއްޖެއަށް އެހީތެރިކަން ބޭނުންވާ ދާއިރާތަކާއި ބެހޭގޮތުން މަޝްވަރާކޮށްފައިވެއެވެ. އޭގެތެރޭގައި އިންފްރާސްޓްރަކްޗަރ އަދި ސިއްހީ ދާއިރާ ހިމެނެއެވެ.
މިބައްދަލުކުރެއްވުމުގައި ސައުދީ ފަންޑުން ރާއްޖެއަށް ވެދެއްވަމުން ގެންދަވާ އެހީތެރިކަން ފާހަގަކުރައްވައި ޚާރިޖީ ވަޒީރުވަނީ ޝުކުރުއަދާކުރައްވާފައެވެ. އަދި ދެޤައުގެ ގުޅުން އިތުރަށް ބަދަހިކުރުމާއި ގުޅޭގޮތުންވެސްވަނީ މަޝްވަރާކުރައްވާފައެވެ.
ޚާރިޖީ ވަޒީރު މޫސާ ޒަމީރު ސައުދީ ޢަރަބިއްޔާއަށް ކުރައްވާ މި ދަތުރުފުޅަކީ މިނިސްޓަރ އޮފް ފޮރިން އެފެއަރސް އޮފް ދަ ކިންގްޑަމް އޮފް ސައުދީ ޢަރަބިއްޔާ، ޕްރިންސް ފައިސަލް ބިން ފަރްހާން އަލް-ސަޢުދުގެ ދައުވަތަކަށް ކުރައްވާ ދަތުރުފުޅެކެވެ.
މި ދަތުރުފުޅުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ޚާއްސަ ސިޓީފުޅެއް، ސަޢުދީ ވަލީއަހުދު އަދި ބޮޑުވަޒީރު، ޕްރިންސް މުޙައްމަދު ބިން ސަލްމާން ބިން ޢަބްދުލްއަޒީޒް އަލް-ސަޢުދު އަށް އެރުވުމަށް ހަމަޖެހިފައިވާކަމަށް ޚާރިޖީ ވުޒާރާއިން ވިދާޅުވެއެވެ.