ފާއިތުވި 24 ގަޑިއިރަށްވުރެ މިއަދު ވައިގަދަވެ ކަނޑުތައްވެސް ގަދަވާނެ: މެޓު
-
މެންދުރު 1 ޖެހުމާއި ހަމައަށް އުތުރުގެ އަތޮޅުތަކަށް ރީނދޫ އިންޒާރު ވަނީ ނެރެފައި
-
ވިލާގަނޑުގައި 45 މޭލަށް ވައި ގަދަވާނެ
ރާއްޖެއަށް މިހާރުކުރަމުންދާ ހުޅަނގު މޫސުމުގެ ވިއްސާރާގައި ހުރިހާ ހިސާބަކަށްވެސް ވިއްސާރަ ކުރާނެކަމަށާއި، ޚާއްޞަކޮށް މެދުރާއްޖެތެރެއާއި އުތުރުގެ އަތޮޅުތަކަށް މިއަދު ކަނޑުތައް ވަރަށް ގަދަވާނެކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ.
ކަނޑުތައް ގަދަވުމުގެ ސަބަބުން މިއަދު މެންދުރު 1 ޖެހުމާއި ހަމައަށް އުތުރުގެ އަތޮޅުތަކަށް ރީނދޫ އިންޒާރު ވަނީ ނެރެފައެވެ. އެއީ ބޯކޮށް ވާރޭ ވެހުމާއެކު ގުގުރުން އަދި ގަޑިއަކު 25 މޭލާއި 30 މޭލާއި ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 50 މޭލަށް ވައިގަދަވެ ކަނޑުތައް ވަރަށް ގަދަވާނެކަމަށް ލަފާކުރެވޭތީކަމަށް މޫސުމާބެހޭ ޤައުމީ އިދާރާއިން ވިދާޅުވިއެވެ.
އެ އިދާރާއިން ވިދާޅުވީ، ދެކުނުގެ އަތޮޅުތަކަށް ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެކަމަށެވެ. އަދި ކުރިއަށްއޮތް 24 ގަޑިއިރުވެސް ރާއްޖޭގެ އެކި ހިސާބުތަކަށް ވިއްސާރަކުރާނެކަމަށާއި ބައެއް ސަރަހައްދުތަކަށް ގުގުރުމާއިއެކު ބޯކޮށް ބާރޭ ވެހޭނެކަމަށްވެސް މޫސުމާބެހޭ ޤައުމީ އިދާރާއިން ވިދާޅުވިއެވެ.
އެ އިދާރާއިން ވިދާޅުވީ، ފާއިތުވި 24 ގަޑިއިރަށްވުރެ މިއަދު ވައި ގަދަވާނެކަމަށެވެ. ވައިޖެހޭނީ މެދުރާއްޖެތެރެއާއި އުތުރުގެ އަތޮޅުތަކަށް ހުޅަނގާއި ހުޅަނގު އުތުރުން 17 މޭލާއި 27 މޭލާއި ދެމެދުގެ ބާރުމިނުގައެވެ. އަދި ދެކުނުގެ އަތޮޅުތަކަށް ހުޅަނގު ދެނުކާއި ހުޅަނގުން 10 މޭލާއި 20 މޭލުގެ ބާރު މިނުގައެވެ. ވިލާގަނޑުގައި 45 މޭލަށް ވައި ގަދަވާނެކަމަށް މޫސުމާ ބެހޭ އިދާރާއިން ވިދާޅުވިއެވެ.
ކުރިއަށްއޮތް 5 ދުވަހުވެސް ވައިގަދަވާނެކަމަށް ލަފާކުރައްވައެވެ. ނަމަވެސް ވާރޭ ވެހޭ މިންވަރު މިއަދުން ފެށިގެން މަދުވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވިއެވެ.
މޫސުން ގޯސްވާނެތީ ކަނޑުދަތުރުފަތުރުކުރައްވާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކުރައްވާފައެވެ. އަދި ކޮންމެހެން ކުރަންޖެހޭ ދަތުރެއް ފިޔަވައި ފަސްކޮށްލުމަށް ކަމާ ގުޅުންހުރި އިދާރާތަކުން އެދިވަޑައިގަންނަވައެވެ. އަދި ދަތުރަށް ފެށުމުގެ ކުރިން މޫސުމާއި ގުޅޭ އެންމެ ފަހުގެ މައުލޫމާތު ހޯދުމަކީ ވަރަށް މުހިންމުކަމެއްކަންވެސް އެ އިދާރާތަކުން ފާހަގަކުރައްވައެވެ.