ދުނިޔޭގައި ސިނާއީ ގޮތުން އެންމެ ބޮޑަށް ކުރިއަރާފައިވާ ޖީ ހަތެއްގެ ޤައުމުތަކުގެ މާލީ ވަޒީރުންގެ ބައްދަލުވުމެއް ޖަޕާނުގެ އިރުއުތުރުގެ ރަށެއްކަމަށްވާ ސެންޑާއީގައި ފަށައިފިއެވެ.
މިއީ އެރަށުގައި ބުދަދުވަހު ފެށުމަށް ހަމަޖެހިފައިވާ ޖީ ހަތެއްގެ ޤައުމުތަކުގެ އިސްވެރިންގެ ސަމިޓަށް ތައްޔާރުވުމުގެ ގޮތުން ބާއްވާ ބައްދަލުވުމެކެވެ. ޖީ ހަތެއްގެ މާލީ ވަޒީރުންގެ ބައްދަލުވުމުގައި މަޝްވަރާ ކުރަމުން ގެންދާ މައްސަލަތަކުގެ ތެރޭގައި މަނީ ލޯންޑެރިން އާއި ފޮރިން އެކްސްޗޭންޖް ރޭޓް ތަކުގެ މައްސަލަތަކުގެ އިތުރުން އެޤައުމުތަކުގެ ފައިސާއާބެހޭ ސިޔާސަތުތަކާ އަދި ދުނިޔޭގެ އިޤްތިޞާދަށް ކުރިމަތިވެފައިވާ ބައެއް މައްސަލަތައްވެސް ހިމެނެއެވެ.
މިބައްދަލުވުމާ ބެހޭގޮތުން ދެއްވި ބަޔާނެއްގައި ޖަޕާނުގެ ޚާރިޖީ ވަޒީރު ޓާރޯ އަސޯ ވިދާޅުވީ ފޮރިން އެކްސްޗޭންޖާއި މާލީ ބާޒާރުތަކަށް ހަމަޖެހުން ގެނައުމުގެ މުހިއްމުކަމާމެދު ޖީ ހަތެއްގެ ޤައުމުތަކުގެ މާލީ ވަޒީރުން އެއްބަސްވެ ވަޑައިގެންފައިވާ ކަމަށެވެ. ބުދަދުވަހު ފެށުމަށް ހަމަޖެހިފައިވާ ޖީ ހަތެއްގެ ޤައުމުތަކުގެ އިސްވެރިންގެ ސަމިޓްގައި ބައިވެރިވެ ވަޑައިގަތުމަށްޓަކައި އެމެރިކާގެ ރައީސް ބަރަކް އޮބާމާ މިއަދު ޖަޕާނަށް ވަޑައިގަންނަވާ ގޮތަށްވަނީ ހަމަޖެހިފައެވެ.
ދުނިޔޭގައި ސިނާއީ ގޮތުން އެންމެ ބޮޑަށް ކުރިއަރާފައިވާ ގްރޫޕް ހަތެއް ނުވަތަ ޖީ ހަތެއްގެ ނަމުން ނަންދީފައިވާ ޖަމާއަތުގައި ހިމެނެނީ އެމެރިކާ، ޖަޕާން، ޖަރުމަނުވިލާތް، ފަރަންސޭސިވިލާތް، އިނގިރޭސިވިލާތް، އިޓަލީވިލާތް އަދި ކެނެޑާއެވެ.