ސަރުކާރުގެ އެއްވެސް މަޤާމެއްގައި ހުރި މީހަކު ޖުޑީޝަރީއަށް ނުފޫޒު ނުފޯރުވާނެ: ރައީސް

މިސަރުކާރުގެ އެއްވެސް މަޤާމެއްގައި ހުރި މީހަކު ޖުޑީޝަރީއަށް ނުފޫޒު ނުފޯރުވާނެކަމަށާއި އެފަދަ ކަމެއް ކުރާމީހަކު ވަގުތުން މަޤާމުން ވަކިކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ، މާލެ ސިޓީ ކައުންސިލްގެ ބައްދަލުވުމަށްފަހު ނޫސްވެރިންނާއި ބައްދަލުކުރައްވައި ވާހަކަދައްކަވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، މި ސަރުކާރު އުފެދިގެން އައި ހިސާބުން އެއްވެސް މުއައްސަސާއަކުން އަދި ރައީސް އައްޔަންކުރައްވާފައިވާ އެއްވެސް މަޤާމެއްގައި ހުރި މީހަކު ޝަރުއީ ނިޒާމަށް ނުފޫޒު ނުފޯރުވާނެކަމަށެވެ. އެއީ އެމަނިކުފާނު ބަލައިގަންނާނެ ކަމެއް ނޫންކަމަށާއި އެފަދަ ކަމެއް ކުރާ މީހަކު ވަގުތުން މަޤާމުން ވަކިކުރައްވާނެކަމަށް ރައީސް ވިދާޅުވިއެވެ.

"އަޅުގަނޑުގެ ސަރުކާރެއް އުފެދިގެން އަންނަ ހިސާބުން ރައީސް އޮފީހުންނެއް އަދި ސަރުކާރުގެ އެއްވެސް ލެވެލްއަކުން ޖުޑީޝަރީއަށް އަދި ޝަރުއީ ނިޒާމުގެ ތެރެއަށް އެއްވެސް ވަރެއްގެ ނުފޫޒެއް ނުފޯރުވާނެ. އެފަދަ ކަމެއް ކުރާ މީހަކު އަޅުގަނޑުމެން މިވަގުތުން ފެށިގެންވެސް އެއީ މަގާމެއްގައި ހުރި މީހެއްނަމަ ވަގުތުން ވަކިވެސް ކުރާނަން. އަޅުގަނޑުގެ ކިބައިން އަދި އަޅުގަނޑު އައްޔަންކޮށްފައި ހުރި މަޤާމެއްގައި ހުރި މީހެއްގެ ކިބައިންވެސް ޝަރީޢަތަށް އަދި ޝަރުއީ ނިޒާމަށް ނުފޫޒެއް ފޯރުވުމަކީ އަޅުގަނޑު ޓޮލަރޭޓްކުރާނެކަމެއް ނޫން." ރައީސް ވިދާޅުވިއެވެ.

ރައީސް ވިދާޅުވީ، މިއަދުވެސް އަމަލުކުރަމުން މިދަނީ މެނިފެސްޓޯ އިޢުލާންކުރިރޭ އިޢުލާންކުރި ސިޔާސަތުކަމަށެވެ. އެދުވަހުވެސް ވިދާޅުވިގޮތަށް ރާއްޖޭގެ މަސްލަހަތު އިސްކޮށް ދިވެހި ރައްޔިތުންނަށް އެންމެ ފުރިހަމައަށް މިނިވަންކަމާއި ސިޔާދަތު ހިމާޔަތްކުރެވޭ ގޮތަށް ހުރިހާ ގައުމަކާ އެކީ ތަފާތުކުރުމެއްނެތި ގާތްގުޅުން އޮންނާނެކަމަށް ވިދާޅުވިކަމަށެވެ. މިއަދުވެސް އަމަލުކުރަމުންދަނީ އެ ސިޔާސަތާއި އެއްގޮތަށްކަމަށް ރައީސް ވިދާޅުވިއެވެ.

"އެ ޚާރިޖީ ސިޔާސަތާއި އެއްގޮތަށް އެދުވަހުން ފެށިގެން މިއަދާއި ހަމައަށްވެސް މިދަނީ. އެ ސިޔާސަތު ކަސިޔާރުވެގެން ނުދާނެ. އަޅުގަނޑުމެން މަޢާފަށް އެދެންޖެހޭ ކަމެއް އަދި ނުކުރަން. އަޅުގަނޑުމެން ގެނައި މެނިފެސްޓޯ ރައްޔިތުން ބަލައިގަތީ. އެއާއި އެއްގޮތަށް އަޅުގަނޑުމެން ގާތް ގުޅުމެއް ބާއްވަނީ ހުރިހާ ޤައުމަކާ އެކުގައިވެސް." ރައީސް ވިދާޅުވިއެވެ.

ރައީސް ވިދާޅުވީ، އިންޑިއާއަކީ ރާއްޖެއާއި އަބަދުވެސް ގާތް ރަހުމަތްތެރި ޤައުމެއްކަމަށެވެ. ރައްޔިތުން މި ސަރުކާރުގައި އެދުނު އެންމެ ބޮޑު އެއްކަމަކީ ރާއްޖޭގައި ތިބި އިންޑިއާ ސިފައިން މިތަނުން ގެންގޮސްދިނުންކަމަށެވެ. އެކަން އިންޑިއާއާއެކު ގާތް ގުޅުމުގެ ތެރެއިން ރިވެތި މަޝްވަރާގެ އުސޫލުން ކުރެވިގެން ދިޔަކަން ރައީސް ވަނީ ފާހަގަކުރައްވާފައެވެ.

މިސަރުކާރުގައި އިންޑިއާއާއެކު އޮންނަގުޅުން އެއްކައިރިއަށް ޖެހިފައި ނުވާކަމަށާއި ކުރިއަށްއޮތްތަނުގައިވެސް އެ ގާތްގުޅުން 2 ޤައުމަށް ފައިދާވާގޮތަށް އޮންނާނެކަމަށް ރައީސް ވަނީ ވިދާޅުވެފައެވެ. އެގޮތުން އިންޑިއާއިން ދޭ ކާޑުގެ ކޯޓާވެސް އެހެން އެއްވެސް ޤައުމަކަށް ނުދޭވަރަށް މިހާރު ރާއްޖެއަށް ދީފައި އޮތްކަމާއި އަދި ކުރިއަށް އޮތް ތަނުގައިވެސް ދޭނެކަމަށް ރައީސް ވިދާޅުވިއެވެ. އަދި ރާއްޖެއިން ދައްކަންޖެހޭ ބައެއް ދަރަނިތައްވެސް ރޯލްއައުޓް ކުރުމާއި، އެތައް ކަމެއް އިންޑިއާއިން ރާއްޖެއަށް ކޮށްދެއްވަމުންދާކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ފާހަގަކުރެއްވިއެވެ.