މަޖިލީހުން ޕާޓީތަކަށް ސްލޮޓްދީ، އަންހެނުންނަށް ކޯޓާއެއް ކަނޑައަޅަން ހުށަހަޅައިފި

ރައްޔިތުންގެ މަޖިލީހުން ސިޔާސީ ޕާޓީތަކަށް ސްލޮޓުތައް ދިނުމަށާއި އަންހެނުންނަށް ކޯޓާ ކަނޑައެޅުމަށް ސިޔާސީ ޕާޓީތަކުން ހުށަހަޅައިފިއެވެ.

މިގޮތަށް ހުށަހަޅާފައިވަނީ ދަ ޑިމޮކްރެޓްސް އާއި އަދާލަތު ޕާޓީ އާއި އެމްއާރުއެމް އާއި އެމްޑީއޭ އަދި އެމްއެންޕީ، ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހާޒިރުކުރުމުންނެވެ. އެ ޕާޓީތައް ހާޒިރުކޮށްފައިވަނީ މަޖިލީހުގެ މެންބަރުންގެ އަދަދު ލިމިޓު ކުރުމާ ގުޅޭގޮތުން ބާރަށު ދާއިރާގެ މެންބަރު އިބްރާހިމް ޝުޖާއު ހުށަހަޅުއްވާފައިވާ ގަރާރާ ގުޅިގެންނެވެ.

ރައްޔިތުންގެ މަޖިލީހުގެ ކޮމިޓީގައި ސިޔާސީ ޕާޓީތަކުން ވަނީ ރައްޔިތުންގެ މަޖިލީހުގެ މެންބަރުންގެ އަދަދު ލިމިޓު ކުރުމަކީ ރަނގަޅު ކަމެއްކަން ފާހަގަކޮށްފައެވެ. އެގޮތުން، ދަ ޑިމޮކްރެޓްސްގެ ފަރާތުން އެ ޕާޓީގެ ނައިބު ރައީސް އައިޝަތު އަލައިކާ އަދުނާން ވިދާޅުވީ މެންބަރުންގެ އަދަދު އިތުރުވުމުގެ ސަބަބުން ދައުލަތުން ބޮޑު ބުރައެއް އުފުލަންޖެހޭ ކަމަށާއި އެކަން ހައްލުކުރަން އެ ޕާޓީގެ މެނިފެސްޓޯގައިވެސް ހިމެނިކަމަށެވެ.

މެންބަރުންގެ އަދަދު ލިމިޓު ކުރުމަށް ޤާނޫނު އިސްލާހުކުރާނަމަ މިހާރު ހުރި ދަތިތައް ހައްލުކުރަން ޖެހޭ ކަމަށް އަލައިކާ ވިދާޅުވިއެވެ. އެގޮތުން، މުޅި އަތޮޅުގެ ރައްޔިތުން އިންތިޚާބުކުރާ މެންބަރުން ހޮވުމާއި ސިޔާސީ ޕާޓީތަކަށް މަޖިލީހުން ވަކި ސްލޮޓުތަކެއް ދޭގޮތަށް ހަދަންޖެހޭކަމަށް ވިދާޅުވިއެވެ.

"ވޯޓިން ކަރުދާހުގައި ޕާޓީއަށް ވޯޓުލެވޭ ގޮތް ހަދާފައި އަދި މެންބަރަކަށް ވޯޓުލެވޭ ގޮތް ހެދުން. އެންޑް އޮފް ދަޑޭގަ ވޯޓު ގުނާއިރު އެނގޭނެ ކޮންމެ ޕާޓީއަކަށްވެސް ލިބިފައިވާ ރެޕްރެޒެންޓޭޝަން. އޭރުން ޕާޓީތަކަށް އެބަލިބޭ އެ މީހުން ރެޕްރެޒެންޓް ކުރާނެ ސްލޮޓެއް،" ޑިމޮކްރެޓްސްގެ ފަރާތުން އަލައިކާ ވިދާޅުވިއެވެ.

މިބައްދަލުކުރެއްވުމުގައި އަދާލަތު ޕާޓީގެ ރެޖިސްޓްރަރ އާދަމް މުޙައްމަދުވެސް ވަނީ ގަރާރަށް ތާއީދު ކުރައްވާކަމަށް ވިދާޅުވެފައެވެ. އެގޮތުން، ދެމެހެއްޓެނިވި ގޮތެއްގައި ބަދަލު ގެންނަން ޖެހޭގޮތަށާއި ކޮންމެ 10 އަހަރަކުން ރިވިއުކުރުމަށް ހުށަހެޅުއްވިއެވެ. އަދި އަންހެނުންނަށް ޚާއްސަ ކޯޓާއެއް ކަނޑައެޅުމަށްވެސް އޭނާ ހުށަހެޅުއްވިއެވެ.

"ރާއްޖޭގެ މިއޮންނަ އާބާދީގެ 50 ޕަސެންޓަށްވުރެ ބޮޑު ބައެއް ޑިމޮކްރެޓިކް ޑިވިޑެންޑް، ނުވަތަ އާބާދީގައި މީހުންނަ އެޑްވާންޓޭޖް ނެގުން، އެ ބޭފުޅުންގެ ރިސޯސް ބޭނުންކުރަން މަޖިލީހުގެ ތެރެއިން ކޯޓާއެއް ކަނޑައަޅުއްވާފައި އެކަން އިމްޕްލިމެންޓް ކުރުން މީގެ ތެރެއިންދާއިރު،" އަދާލަތު ޕާޓީގެ ރަޖިސްޓްރަރ ވިދާޅުވިއެވެ.

އެމްއާރުއެމްގެ ރައީސް އަހުމަދު ފާރިސް މައުމޫން ވިދާޅުވީ މެންބަރުންގެ އަދަދު މަދުކުރުމަށް އެ ޕާޓީންވެސް ތާއީދުކުރާކަމަށާއި އެކަމުގައި ޕާޓީގެ އެއްބާރުލުން ލިބޭނެ ކަމަށެވެ. ފާރިސް ވިދާޅުވީ ކުދި އާބާދީއަށް މެންބަރުން އިންތިޚާބުކުރުމުގެ ސަބަބުން އިންތިޚާބުތަކުގެ ނަޒާހަތްތެރިކަން ގެއްލިގެންދާ ކަމަށެވެ.

ރައްޔިތުންގެ މަޖިލީހަކީ ބައިކެމަރަލް ތަނަކަށް ހަދައި މަތި ގެއަކާއި ދަށު ގެއެއް އޮންނަން ޖެހޭ ކަމަށް ގަބޫލުކުރައްވާ ކަމަށާއި ނޭޝަނަލް ލިސްޓެއް އުފައްދައި އޭގެ ތެރެއިން އަންހެނުންނާއި ފަންނީ ބޭފުޅުންނަށް ކޯޓާއެއް ކަނޑައަޅަން މުހިންމު ކަމަށްވެސް ފާރިސް ވިދާޅުވިއެވެ.

"އަޅުގަނޑުމެން މިކަން ކުރާއިރު އެބަ ވިސްނަންޖެހޭ މުސްތަގުބަލަށް. މިހާރު އާބާދީ ބެހިފައިވާގޮތުން މާލެއަށް ނިސްބަތްވާ 15 މެންބަރުން މި ތިބެނީ. އެހެންނަމަވެސް މާލޭގައި ދިރިއުޅޭ އާބާދީ ވަރަށް ބޮޑު. ވަރަށް ގިނަ ބަޔަކު ވޯޓުލާ އެ މީހުންނާ ސީދާ ގުޅުމެއް ނެތް ދާއިރާތަކަށް. މިވެސް މިފަދަ ނިންމުމެއް ނިންމާއިރު ވިސްނަންޖެހޭ ކަމެއް،" ފާރިސް ވިދާޅުވިއެވެ.

މިކޮމިޓީގައި އެމްޑީއޭ އާއި އެމްއެންޕީންވެސް ވަނީ މެންބަރުންގެ އަދަދު ލިމިޓު ކުރަން ތާއީދު ކުރާކަމަށް ބުނެފައެވެ. އެގޮތުން މަޖިލީހުގެ މެންބަރުންގެ އަދަދު 77އަށް ލިމިޓުކުރުމަށް އެމްއެންޕީން ހުށަހެޅިއެވެ.