ފަލަސްތީނާއެކު ސުލްޙަ ޤާއިމްކުރުމަށް އިސްރާއީލުން މަސައްކަތް ކުރާނެކަމަށް އެ ޤައުމުގެ ހަރުކަށި ބޮޑުވަޒީރު ބެންޖަމިން ނަތަންޔާހޫ ވިދާޅުވެއްޖެއެވެ.
އިސްރާއީލުގެ ދިފާއީ ވަޒީރު މޯޝޭ ޔާލޯން މަޤާމުން އިސްތިއުފާ ދެއްވުމާއި ގުޅިގެން ދެއްވި ބަޔާނެއްގައި ނަތަންޔާހޫ ވިދާޅުވީ އިސްރާއީލުގެ ދިފާޢީ ވަޒީރުކަމުގައި ކޮންމެ ބޭފުޅަކު ހުންނެވި ނަމަވެސް ފަލަސްތީނާއެކު ސުލްޙަ ޤާއިމްކުރުމަށް އޭނާގެ ސަރުކާރުން މަސައްކަތް ކުރާނެކަމަށެވެ.
img:http://s1.psmnews.mv/images/660x400/14639885665034.jpg|މަޤާމުން އިސްތިއުފާ ދީފައިވާ އިސްރާއީލުގެ ކުރީގެ ދިފާއީ ވަޒީރު މޯޝޭ ޔާލޯން(މ)- ފޮޓޯ: ޒިންހުއާ
އިސްރާއީލުގެ ދިފާއީ ވަޒީރު މޯޝޭ ޔާލޯން މަގާމުން އިސްތިއުފާ ދެއްވީ ނަތަނިޔާހޫގެ ހަރުކަށި ސަރުކާރަށް ވަރަށް ބޮޑަށް ފާޑުވިދާޅުވުމާ ގުޅިގެން ނަތަނިޔާހޫގެ ފަރާތުން ކުރިމަތިވި ފިއްތުންތަކާ ގުޅިގެންނެވެ. ޔާލޯން ވިދާޅުވީ ނަތަނިޔާހޫގެ ސަރުކާރު ކޮންޓްރޯލްކުރަނީ ހައްދުފަހަނަޅާފައިވާ މީހުންނާއި ނުރައްކާތެރި ފަރާތްތަކުން ކަމަށާ އެކަމުގެ ސަބަބުން ހުޅަނގުގެ ގައުމުތަކާއި ބައިނަލްއަގްވާމީ މުޖްތަމައުގެ އިތުބާރު އިސްރާއީލަށް ގެއްލެމުން ދާކަމަށެވެ.
މިބަޔާނަށްފަހު ކުރިމަތިވި ފިއްތުންތަކާ ގުޅިގެން ޔާލޯން މިދިޔަ ހުކުރުދުވަހު މަގާމުން އިސްތިއުފާ ދެއްވުމަށްފަހު އިސްރާއީލުގެ ދިފާއީ ވުޒާރާ ދޫކުރައްވައި ރަސްމީގޮތުން ގެއަށް ވަޑައިގެންފައިވަނީ އާދީއްތަ ދުވަހުގައެވެ. ޔާލޯން އިސްރާއީލުގެ ދިފާއީ ވުޒާރާ ދޫކުރެއްވީ އޭނާގެ ޝަރަފުގައި ބޭއްވި ރަސްމިއްޔާތަކަށްފަހުގައެވެ.
އިސްރާއީލަކީ ފަލަސްތީނުގެ ބިންތަކާ އަދި ސޫރިޔާއާއި އުރުދުންގެ ބައެއް ބިންތައްވެސް ގަދަބާރުން ހިފައިގެން އޮންނަ އިސްތިއުމާރީ ގައުމަކަށްވާތީ އިސްރާއީލަކީ އަބަދުވެސް ހަނގުރާމައިގެ ޙާލަތުގައި އޮންނަ ޤައުމެކެވެ. މިކަމަށްޓަކައި އިސްރާއީލުގެ ދިފާއީ ވުޒަރާއާއި އެވުޒާރާގައި ހުންނަވާ ވަޒީރަކީ އިސްރާއީލުގެ ކޮންމެ ސަރުކާރެއްގެވެސް އެންމެ ބާރުގަދަ ފަރާތެވެ. އިސްރާއީލު ގަދަބާރުން ހިފައި ވެރިވެގެންފައިވާ ފަލަސްތީނުގެ ހުޅަނގު އައްސޭރީގެ ބިންތައް ކޮންޓްރޯލް ކުރަނީވެސް ދިފާއީ ވުޒާރާއިންނެވެ.
މޯޝޭ ޔާލޯން މަޤާމުން އިސްތިއުފާ ދެއްވުމާ ގުޅިގެން އިސްރާއީލުގެ ހަރުކަށި ބޮޑުވަޒީރު ބެންޖަމިން ނަތަނިޔާހޫ ވިދާޅުވީ އޭނާގެ ސަރުކާރުން މަސައްކަތް ކުރަނީ ފުޅާދާއިރާއެއްގެ ކޯލިޝަން ސަރުކާރަކަށް ކަމަށާ ސަރުކާރު ހިންގާ ކޯލިޝަންގެ ދާއިރާ ފުޅާކުރުމަކީ އިސްރާއީލަށް މުހިއްމު ކަމެއްކަމަށެވެ.
img:http://s1.psmnews.mv/images/660x400/14639891411479.jpg|އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ(ކ)، އަވިގެޑޯރ ލިބަރމެން(ވ)- ފޮޓޯ: ޒިންހުއާ
މޯޝޭ ޔާލޯން އިސްރާއީލުގެ ދިފާއީ ވަޒީރުކަމުގެ މަގާމުން އިސްތިއުފާ ދެއްވުމުން ދެން އެމަޤާމަށް ގެނައުމަށް ނަތަނިޔާހޫ ބޭނުންވަނީ އިސްރާއީލުގެ ވަރަށް ހަރުކަށި އަދި ފަލަސްތީނުގެ ހައްގުތަކަށް ވަރަށް ބޮޑަށް އިންކާރުކުރައްވާ އިދިކޮޅު ސިޔާސީ ލީޑަރެއްކަމަށްވާ އަވިގެޑޯރ ލިބަރމެން ކަމަށް ޚަބަރު ލިބެއެވެ. އިސްރާއީލުގެ ކަނާތުފިޔައިގެ ހަރުކަށި ވިސްނުމުގެ ޕާޓީއެއްކަމަށްވާ "ޔިސްރާއީލު ބައިތުނާ" ޕާޓީގެ ޒައީމް އަވިގެޑޯރ ލިބަރމެންއަކީ ނަތަނިޔާހޫގެ ސިޔާސީ ވާދަވެރިއެކެވެ. ނަމަވެސް ނަތަނިޔާހޫގެ ކޯލިޝަން ސަރުކާރުގެ ދިފާއީ ވަޒީރުކަމުގެ މަގާމު ލިބަރމެން އަށް މިހާރު ހުށަހަޅާފައިވާކަމަށާ ނަމަވެސް އެކަމަށް އޭނާގެ އާނބަސް އަދި ނުލިބޭކަމަށް ޚަބަރުތައް ބުނެއެވެ.
ލިބަރމެން އަކީ އިސްރާއީލު ހިފާފައިވާ ފަލަސްތީނުގެ ބިންތަކުން ފޭބުމާ ދެކޮޅު ހައްދަވާ އަދި ފަލަސްތީނުގެ ރައްޔިތުންނަށް ފަލަސްތީނުގެ ބިމުގައި މިނިވަން މުސްތަގިއްލު ދައުލަތެއް ގާއިމް ކުރުމާ މުޅިން އިދިކޮޅު ބޭފުޅެކެވެ.