ކުރީ ސަރުކާރުން ރައްޔިތުންނަށް ދެއްކީ ދައުލަތަށް ނުތަކާވަރުގެ ޢިމާރާތްތަކެއްގެ ކުރެހުންތަކެއް: ސިއްޙީ ވަޒީރު
-
މަޝްރޫޢުތައް ކުރިއަށްގެންދިއުމުގައި ބަޖެޓުގެ ދަތިކަން އެބައޮތް
-
ކުރީ ސަރުކާރުން ޢިމާރާތްކޮށްފައި ހުރީ އޮފީސް ޢިމާރާތްތަކެއް
ހޮސްޕިޓަލްތައް އެޅުމަށް ކުރީ ސަރުކާރުން ރައްޔިތުންނަށް ދައްކާފައިވަނީ ދައުލަތަށް ނުތަކާވަރުގެ ޢިމާރާތްތަކެއްގެ ޑިޒައިންތަކެއްކަމަށް ސިއްޙީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ. ވަޒީރު މިހެން ވިދާޅުވީ ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. މެންބަރުންވަނީ ކުރީ ސަރުކާރުން އެކި ރަށްތަކުގައި އެޅުމަށް ނިންމި ހޮސްޕިޓަލްތަކާއި ސިއްޙީ މަރުކަޒުތަކުގެ މަސައްކަތްތަކާ ގުޅޭގޮތުން ސުވާލުކުރައްވާފައެވެ.
ވެލިދޫ ދާއިރާގެ މެންބަރު މުޙައްމަދު ޢައްބާސް، މިނިސްޓަރ އޮފް ހެލްތް ޑޮކްޓަރ ޢަބްދުﷲ ޚަލީލްއާ ސުވާލު ކުރެއްވުން pic.twitter.com/fz7EMvXK9I
— People's Majlis (@mvpeoplesmajlis) August 6, 2024
މެންބަރުންގެ އެސުވާލުތަކަށް ޖަވާބުދެއްވަމުން ސިއްޙީ ވަޒީރު ޑރ. ޢަބްދުﷲ ޚަލީލް ވިދާޅުވީ މަޝްރޫޢުތައް ކުރިއަށްގެންދިއުމުގައި ބަޖެޓުގެ ދަތިކަން ދިމާވާ ކަމަށެވެ. އެގޮތުން، ބަޖެޓުގައި މަޝްރުޢުތަކަށް ކަނޑައަޅާފައިވަނީ އެކަށީގެންވާ ޢަދަދުތަކެއް ނޫންކަން ވަޒީރު ފާހަގަކުރެއްވިއެވެ.
ޑރ. ޚަލީލް ވިދާޅުވީ ސިއްޙީ ޚިދުމަތްދޭ ތަންތަނުގައި ތަރައްގީ ކުރަންޖެހޭނީ ރައްޔިތުންނަށް ޚިދުމަތްދެވޭނެ ތަންތަން ކަމަށާއި، ނަމަވެސް އޭގެބަދަލުގައި ކުރީ ސަރުކާރުން ޢިމާރާތްކޮށްފައި ހުރީ އޮފީސް ޢިމާރާތްތައް ކަމަށް ވަޒީރު ވިދާޅުވިއެވެ. އެކަމުގެ ކަންބޮޑުވުން ފާޅުކުރައްވަމުން ވަޒީރުވަނީ މި ސަރުކާރުން ޢިމާރާތްކުރާނީ ރައްޔިތުންނަށް ޚިދުމަތްދެވޭނެ ތަންތަންކަމަށް ވިދާޅުވެފައެވެ.
"އަޅުގަނޑުމެންގެ ވިސްނުމަކީ ރައްޔިތުން އައިސް ވަންނަ ޢިމާރާތް ވާންޖެހޭނީ ޚިދުމަތްދޭ އެންމެ އައު ޢިމާރާތް ކަމަށް. ޑިޒައިނަށް ބަދަލު ގެނައުމަށްފަހު ދެން ޢިމާރާތް ކުރެވިގެންދާނީ އިރާދަކުރެއްވިއްޔާ ޚިދުމަތްދޭ އިމާރާތްތައް. އޭގެ މާނައަކީ ޑޮކްޓަރަށް ދައްކާ ފެސިލިޓީ ހުންނާނީ އެތާނގައި. ލެބޯޓްރީގެ ފެސިލިޓީ ހުންނާނީ އެތާނގައި. ބައު ޢިމާރާތް ބޭނުންކުރެވޭނީ ރީފާބިޝް ކުރުމަށްފަހު އެހެން ބޭނުންތަކަށް،" ވަޒީރު ވިދާޅުވިއެވެ.
ވަޒީރު ވިދާޅުވީ ކުރީ ސަރުކާރުން ސިއްޙީ ޚިދުމަތްދޭ ތަންތަނުގެ ކުރެހުންތައް ކުރަހާފައިހުރީ ރައްޔިތުންނަށް ދޭންޖެހޭ ޚިދުމަތްތަކާ ނުބައްދަލު ގޮތަކަށް ކަމަށެވެ. އެހެންވެ، އެހެން ޚިދުމަތެއް ހުއްޓާލުމަށްފަހު އެ އިމާރާތުގެ މަސައްކަތް ކުރަންޖެހޭކަން ވަޒީރު ފާހަގަކުރެއްވިއެވެ.
"ރައްޔިތުން ބޭނުންވަނީ ޚިދުމަތް. އަޅުގަނޑުމެން ފޯރުކޮށްދޭން މިއުޅެނީ ޚިދުމަތްތައް. އެހެންވީމަ ރައްޔިތުން ބޭނުންވާ އެއްވެސް ޚިދުމަތަކަށް ބުރޫ ނާރާގޮތަށް އަޅުގަނޑުމެން އިރާދަކުރެއްވިއްޔާ ޑިޒައިންތައް ކުރަމުން މިގެންދަނީ،" ވަޒީރު ވިދާޅުވިއެވެ.
ސިއްޙީ ވަޒީރު އަބްދުﷲ ޚާލީލް ވަނީ ކުރީ ސަރުކާރުން ފަށާފައިވާ ސިއްހީ މަރުކަޒުތަކާއި ހޮސްޕިޓަލުތަކުގެ މަސައްކަތް ފެށުމުގައި ހުރި ދަތިތައް ހައްލުކޮށް ވީހާވެސް އަވަހަށް ފެށުމަށް މި ސަރުކާރުން މަސައްކަތް ކުރައްވަމުންދާކަމަށް ވިދާޅުވެފައެވެ.