ހައުސިންގ ޔުނިޓްތަކުގެ ކުލި ކުޑަކުރުމުންވެސް ފައިސާ ނުދައްކާ: ގެދޮރުވެރިކަމާބެހޭ ވުޒާރާ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް މާލެ އާއި ރަށްރަށުގައި ތަރައްގީކޮށްފައިވާ ހައުސިން ޔުނިޓުތަކުގެ މަހު ކުލިން 20 އިންސައްތަ މާފުކޮށްދިނުމުންވެސް ފައިސާ ނުދައްކާކަމަށް ގެދޮރުވެރިކަމާއި ބިމާއި، އުމްރާނީ ތަރައްގީއާބެހޭ ވުޒާރާއިން ވިދާޅުވެއްޖެއެވެ.

އެ ވުޒާރާއިން މިހެން ވިދާޅުވީ މިރޭ ނެރެއްވި ބަޔާނެއްގައި ވިދާޅުވީ ހައުސިންގ ޔުނިޓުތަކުގެ މަހުން މަހަށް ދައްކަން ޖެހޭ ފައިސާ ނުވަތަ، އީއެމްއައިއިން 20 އިންސައްތަ މާފުކޮށްދީފައިވާ ކަމަށެވެ. އަދި މިއަހަރުގެ ޖެނުއަރީ މަހުން ފެށިގެން ފައިސާ ދެއްކުމަށް ޔުނިޓުތަކުގެ ވެރިފަރާތްތަކަށް އަންގާފައިވާކަމަށް އެ ވުޒާރާއިން ވިދާޅުވެއެވެ. ނަމަވެސް ގިނަ ފަރާތްތަކުން އަދިވެސް ފައިސާ ނުދައްކާ ކަމަށް ގެދޮރުވެރިކަމާބެހޭ ވުޒާރާއިން ވިދާޅުވެއެވެ. އެހެންކަމުން މަހުން މަހަށް ދައްކަންޖެހޭ ފައިސާ ގަވާއިދުން ދެއްކުމަށް އެ ވުޒާރާއިން ވަނީ އިލްތިމާސްކުރައްވާފައެވެ.

ގެދޮރުވެރިކަމާބެހޭ ވުޒާރާއިން ވިދާޅުވީ ގަވާއިދުން ފައިސާ ދައްކަމުން ނުދާ ފަރާތްތަކާއި ކަނޑައެޅިފައިވާ ބޭނުން ނޫން އެހެން ބޭނުންތަކަށް ޔުނިޓު ބޭނުން ކުރުމާއި، ގަވާއިދާ ހިލާފަށް ތަނަށް ބަދަލުގެނެއުމުގެ އިތުރުން ކުއްޔަށް ދިނުމާއި ގުޅޭ ކަންކަން އެ ވުޒާރާއިން ބަލަމުންދާ ކަމަށެވެ. އަދި ގަވާއިދާ ޚިލާފަށް އަމަލު ކުރަމުންދާ ފަރާތްތަކާމެދު އެއްބަސްވުމާ އެއްގޮތަށް ފިޔަވަޅު އަޅުއްވާނެ ކަމަށްވެސް އެ ވުޒާރާއިން ނެރުނު ބަޔާނުގައި ވަނީ ވިދާޅުވެފައެވެ.

ސަރުކާރުން ހިންގާ ބޯހިޔާވަހިކަމުގެ މަޝްރޫއުތަކުގެ ތެރެއިން ދޫކުރާ ހައުސިންގ ޔުނިޓުތަކަށް ގަވާއިދުން ފައިސާ ނުދައްކާ މައްސަލައަކީ އަބަދުވެސް ފާހަގަކުރެވެމުންދާ މައްސަލައެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެމަނިކުފާނުގެ ވަޢުދުފުޅާއެއްގޮތަށް އަތޮޅު ތެރޭގައި ހުރި ހައުސިން ޔުނިޓްތަކުގެ މަހު ކުލި 3330 ރުފިޔާއަށް ކުޑަކުރައްވާފައެވެ. އަދި ހިޔާ ފްލެޓްތައް މަރާމާތު ކުރުމަށް ރައްޔިތުންގެ އަތުން ދިޔަ ޚަރަދުތަކަށްވާ ދެލައްކަ ރުފިޔާގެ ފައިސާ 7 އަހަރަށް ބަހާލައިގެން ކުލިން ކުޑަ ކުރާ ގޮތަށްވެސް ނިންމެވިއެވެ. އެގޮތުން އެމަނިކުފާނު ވަނީ ހިޔާ ފްލެޓްތަކުން މަހުން މަހަށް ދައްކާ ކުލި 3984 ރުފިޔާއަށް ކުޑަކުރައްވާފައެވެ.