ރައްކާތެރި މިންގަނޑަށް ނުފެތޭ މަގުބައްތި 144 ރަށެއްގައި، މިންގަނޑަށް ފެއްތުމަށް އިތުރު މުއްދަތެއް

ރަށްރަށުގައިހުރި މަގު ބައްތިތައް ރައްކާތެރި މިންގަނޑަށް ފައްތަން އިތުރު މުއްދަތެއް ކައުންސިލްތަކަށް ފެނަކަ ކޯޕަރޭޝަނުން ދީފިއެވެ.

މިދިޔަ މެއި މަހުގެ 23 ވަނަ ދުވަހު ރ. އުނގޫފާރުގައި މަގު ބައްތިއަކުން މަގުމަތީ ހެދިފައި އޮތް ފެންގަނޑަކަށް ކަރަންޓު ލީކުވެގެން ޒުވާނަކު ވަނީ ނިޔާވެފައެވެ. އޭނާ ނިޔާވެފައިވަނީ އެ ފެންގަނޑުގައި ކުޅެން އުޅުނު ކުއްޖާއަށް ކަރަންޓު ޖެހުމުން އެ ކުއްޖާ ސަލާމަތްކުރަން އުޅުމުގެ ތެރޭގައި ކަރަންޓު ޖެހި ހާލު ދެރަވެ ފަރުވާ ދެމުން ދަނިކޮށެވެ.

މި ހާދިސާއާ ގުޅިގެން ފެނަކަ ކޯޕަރޭޝަނުން ވަނީ ރަށްރަށުގެ މަގު ބައްތިތައް ހުރީ ރައްކާތެރިގޮތުގައިތޯ ކަށަވަރުކުރަން ރާއްޖޭގެ ހުރިހާ ރަށެއްގައި މަގު ބައްތިތަކުގެ އިންސްޕެކްޝަނެއް ކުރިއަށްގެންދަން ނިންމާފައެވެ.

މި އިންސްޕެކްޝަނަށްފަހު ގިނަ ރަށްރަށުގެ މަގު ބައްތިތައް ހުރީ ރައްކާތެރި މިންގަނޑާ އެއްގޮތަށް ނޫންކަން ފާހަގަކުރެވިފައިވާކަން މީގެ ކުރިން ފެނަކައިން ވަނީ ހާމަކޮށްފައެވެ. އެހެންކަމުން ފެނަކަ ކޯޕަރޭޝަނުން ވަނީ މީގެ ފަހުން ކަރަންޓުގެ ޚިދުމަތް ފޯރުކޮށްދޭނީ ޔޫޓިލިޓީ ރެގިޔުލޭޓަރީ އޮތޯރިޓީ، ޔޫއާރުއޭއިން ކަނޑައަޅާފައިވާ ސަލާމަތީ މިންގަނޑުތަކާ އެއްގޮތަށްހުރި މަގު ބައްތިތަކަށްކަން ކައުންސިލްތަކަށް އަންގާފައެވެ. މިގޮތަށް އެންގީ މިދިޔަ ޖޫން މަހުގެ 9 ވަނަ ދުވަހުއެވެ.

އޭގެފަހުން ޖޫން މަހުގެ 27 ވަނަ ދުވަހުގެ ކުރިން މަގު ބައްތިތަށް ޔޫއާރުއޭގެ މިންގަނޑާ އެއްގޮތަށް ބަދަލުކުރަން ކައުންސިލްތަކަށް މުއްދަތެއް ދިނެވެ.

ފެނަކަ ކޯޕަރޭޝަނުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މެނޭޖިން ޑިރެކްޓަރ މުޢާޒް މުޙައްމަދު ރަޝީދު ވިދާޅުވީ، މަގު ބައްތިތައް ރައްކާތެރި މިންގަނޑަށް ފެއްތުމަށް ކައުންސިލްތަކަށް މުއްދަތެއް ދިނުމަށްފަހު، ރައްކާތެރި މިންގަނޑާ ޚިލާފަށްހުރި މަގު ބައްތިތަކަށް ކަރަންޓުގެ ޚިދުމަތް ކަނޑާލާނެކަމަށް ކައުންސިލްތަކަށް އެންގުނު ކަމަށެވެ. ނަމަވެސް މަގު ބައްތިތައް މިންގަނޑަށް ފައްތަން ގިނަ ކައުންސިލްތަކުން އިތުރު ވަގުތު ބޭނުންވާތީ އިތުރު 1 މަސް ދުވަހަށް މުއްދަތު އިތުރުކޮށްދީފައިވާކަމަށް މުޢާޒް ވިދާޅުވިއެވެ.

މުޢާޒް ވިދާޅުވީ، އިތުރުކޮށްދިން 1 މަސް ދުވަސް މިއަދަށް ހަމަވާ ކަމަށެވެ. ނަމަވެސް އަދިވެސް ކައުންސިލްތަކަށް އިތުރު ވަގުތު ބޭނުންވާތީ މިމަހުގެ 21 ވަނަ ދުވަހާ ހަމައަށް މިހާރު މުއްދަތު އިތުރުކޮށްދީފައިވާކަމަށް އެމްޑީ މުޢާޒް ވިދާޅުވިއެވެ. އަދި އިތުރަށް މުއްދަތު އިތުރު ނުކޮށްދޭނެކަމަށާއި މުއްދަތު ހަމަވާއިރު، ޔޫއާރުއޭގެ މިންގަނޑާ ޚިލާފަށްހުރި މަގު ބައްތިތަކަށް ކަރަންޓުގެ ޚިދުމަތް ކަނޑާލާނެކަމަށް މުޢާޒް ވިދާޅުވިއެވެ.

"ޤާނޫނީ ގޮތުން މަގު ބައްތިތައް ބަލަހައްޓަންޖެހޭނީ ކައުންސިލްތަކުން. މަގު ބައްތިތަކަކީ ރައްކާތެރި އެއްޗެއްކަން ކައުންސިލްތަކުން ކަށަވަރު ކުރަންޖެހޭ." މުޢާޒް ވިދާޅުވިއެވެ.

މުޢާޒް ވިދާޅުވީ، ޔޫއާރުއޭގެ މިންގަނޑާ ޚިލާފަށް މަގު ބައްތިތައް ހަރުކޮށްފައިހުރި 144 ރަށް ފާހަގަކުރެވިފައިވާ ކަމަށެވެ.

މީގެ ކުރިން ފެނެކައިން ބުނެފައިވަނީ ނުރައްކާތެރި ހާދިސާއެއް މެދުވެރިވިޔަ ނުދިނުމަށް އަޅާ ފިޔަވަޅެއްގެ ގޮތުން މަގުބައްތިތަކަށް، މީގެފަހުން ކަރަންޓް ދޭނީ އެކުންފުނިން ދޭ ނަމޫނާ ކުރެހުމާއި އެއްގޮތަށް ސަލާމަތީ މިންގަނޑު ތަކަށް ފެތޭގޮތަށް ހަދާފައި ހުންނަ ސަބް ޑީބީ ހަރުކޮށްފައިވާ ބައްތިތަކަށް އެކަނިކަމަށެވެ. ދީފައިވާ މުއްދަތުގެތެރޭގައި ކައުންސިލްތަކުން ތަކެތި ފޯރުކޮށްދިނުމުން ފެނަކައިން ހިލޭ ސަބް ޑީބީތައް މަގު ބައްތިތަކުގައި އިންސްޓޯލް ކޮށްދޭނެކަމަށް އެކުންފުނިން މީގެ ކުރިން ބުނެފައިވެއެވެ.