ސުޕަރ ސްޕެޝަލިސްޓު ޑޮކްޓަރުންގެ ޚިދުމަތް ފޯރުކޮށްދެއްވުމުގެ ޕްރޮގްރާމްގެ ދަށުން، ސުޕަރ ސްޕެޝަލިސްޓު ޑޮކްޓަރުން އަންނަ ހަފްތާގައި ހުޅުމާލޭ ހޮސްޕިޓަލުގައި ބަލިމީހުން ބައްލަވަން ފައްޓަވާނެކަމަށް އާސަންދަ ކޮމްޕެނީން ހާމަކޮށްފިއެވެ.
އެ ކުންފުނިން ހާމަކުރާ ގޮތުގައި، ސުޕަރ ސްޕެޝަލިސްޓު ޑޮކްޓަރުން ހުޅުމާލޭ ހޮސްޕިޓަލުގައި މިމަހުގެ 24 ން 29 އަށް ބަލިމީހުން ބައްލަވާނެ ކަމަށެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން އާސަންދަ ކޮމްޕެނީގެ ޑެޕިއުޓީ މެނޭޖަރ ޢާއިޝަތު ޒަމީރާ ވިދާޅުވީ، ޑޮކްޓަރަށް ދެއްކުމަށް ބޭނުންވާ ފަރާތްތަކުން ރަޖިސްޓްރީކުރުމުގެ ފުރުޞަތު ހުޅުވާލާފައިވާ ކަމަށާއި ހުޅުމާލޭ ހޮސްޕިޓަލްގައިި ޑޮކްޓަރުން ބެއްލެވުމަށް ހަމަޖެހިފައިވަނީ އެތެރެހަށީގެ ބަލިތަކަށް ޚާއްސަ ޑޮކްޓަރުން ކަމަށެވެ.
ސުޕަރ ސްޕެޝަލިސްޓް ޑޮކްޓަރުންނާއި، ސްޕެޝަލިސްޓު ޑޮކްޓަރުން އަތޮޅުތަކަށް ފޮނުއްވުމުގެ ދެވަނަ ޕްރޮގްރާމްގެ ދަށުން، މިހާތަނަށް 4000 އަށްވުރެ ގިނަ ބަލިމީހުން ޑޮކްޓަރަށް ދައްކާފައިވާ ކަމަށް އާސަންދަ ކޮމްޕެނީން މަޢުލޫމާތުދެއެވެ. މިޕްރޮގްރާމްގެ ތެރެއިން އެންމެ ގިނަ މީހުން ޑޮކްޓަރަށް ދައްކާފައިވަނީ ކަރުމަންތީގައާއި، ކަށީގެ އިތުރުން ނާރުގެ ބަލިތަކުގެ ޑޮކްޓަރުންނަށްކަމަށް އާސަންދަ ކޮމްޕެނީން މަޢުލޫމާތުދެއެވެ.
ސްޕެޝަލިސްޓުންނާއި ސުޕަރ ސްޕެޝަލިސްޓުންގެ ޚިދުމަތް ރާއްޖޭގެ އެކިކަންކޮޅުތަކަށް ފޯރުކޮށްދިނުމުގެ ޕްރޮގްރާމްގެ ފުރަތަމަ ބުރު މިދިޔަ އަހަރު ވަނީ ނިމިފައެވެ. މި ޕްރޮގްރާމްގެ ތެރެއިން ދިވެހިންގެ ތެރޭގައި މައިބަދައިގެ މައްސަލަތަކާއި، ކަރުންމަތީގެ ބަލިތަކަށް ދައްކާ ބަލިމީހުންގެ އަދަދު ގިނަ ކަމަށް ފާހަގަކުރެވިފައިވާ ކަމަށް އާސަންދަ ކޮމްޕެނީން މަޢުލޫމާތު ދެއެވެ.
މިޕްރޮގްރާމްގެ ފުރަތަމަ ބުރުގައި 83 ޑޮކްޓަރުން ރާއްޖެއަށް ޒިޔާރަތްކޮށް، 6000 އަށްވުރެ ގިނަ ބަލިމީހުން ބައްލާފައިވެއެވެ. ތަފާތު 18 ދާއިރާއަކުން ޑޮކްޓަރުން ގެނެސްފައިވާއިރު، އޭގެތެރޭގައި ނާރުގެ ބަލިތަކާއި، ކިޑްނީގެ ބަލިތަކާއި، ކެންސަރާއި ލޭގެ ބަލިތަކުގެ އިތުރުން ހިތުގެ ބަލިތަކަށް ޚާއްޞަ ޑޮކްޓަރުން ހިމެނެއެވެ.