އަންނަ މަސް ނިމުމުގެ ކުރިން ރާއްޖޭގައި ރުޕޭ ކާޑު ބޭނުންކުރަން ފެށޭނެ: ވަޒީރު ސަޢީދު

އޮގަސްޓް މަސް ނިމުމުގެ ކުރިން ރާއްޖޭގައި ރުޕޭ ކާޑު ބޭނުންކުރަން ފެށޭނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

މިއީ ރާއްޖޭގައި ކްރިއޭޓަރ އިކޮނޮމީއެއް ޤާއިމްކުރުމަށް ސަރުކާރުން ކުރަމުންދާ މަސައްކަތުގެ ދަށުން ފަށާފައިވާ މަސައްކަތެކެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވަނީ މި ސަރުކާރުގެ ފުރަތަމަ 8 މަސްދުވަހުގެ ތެރޭގައި ރާއްޖޭގައި ކްރިއޭޓަރ އިކޮނޮމީއެއް ޤާއިމްކުރުމަށް ކުރެވުނު މުހިންމު މަސައްކަތްތައް ހިއްސާކުރައްވާފައެވެ.

ވަޒީރު ވިދާޅުވީ މި މަސައްކަތުގެ ދަށުން ރާއްޖޭގައި ވަރަށް އަވަހަށް ރުޕޭ ކާޑު ބޭނުންކުރަން ފެށޭނެކަމަށެވެ. އަދި ނޭޝަނަލް ޕޭމަންޓް ޕްލެޓްފޯމްއެއް ޤާއިމްކޮށް ސަރަޙައްދީ ބައެއް ބޮޑެތި ބާޒާރުތަކާއިއެކު ކްލަބް ކުރުމުގެ މަސައްކަތް ކުރަމުންދާކަމަށެވެ.

"އިންޑިއާގެ ރުޕޭ ކާޑު ބޭނުންކުރަން އިރާދަކުރެއްވިއްޔާ އަންނަ މަސް ނިމުމުގެ ކުރިން އަޅުގަނޑުމެންނަށް ފެށޭނެ ރާއްޖޭގައި. ހަމައެއާއިއެކުގައި އަޅުގަނޑުމެން މިގެންދަނީ ނޭޝަނަލް ޕޭމަންޓް ޕްލެޓްފޯމްއެއް ޤާއިމްކޮށް ސަރަހައްދީ ބައެއް ބޮޑެތި ބާޒާރުތަކާއިއެކު އަޅުގަނޑުމެން ކްލަބް ކުރުމުގެ މަސައްކަތް ކުރަން. އެހެން ހެދީމަ މިވާގޮތަކީ އަޅުގަނޑުމެންނަށް މާކެޓް ކުޑަވެގެން މާކެޓްގައި ހުރި ހަނިކަން އަޅުގަނޑުމެންގެ ޑިސްއެޑްވާންޓޭޖަކަށް އަޅުގަނޑުމެންނަށް ފޭވަރަބަލް ހާލަތަކަށް ނޯންނަގޮތައް އަޅުގަނޑުމެންނަށް އެހެން ޤައުމުތަކާއި ކްލަބް ކޮށްގެން މިކަން ކުރެވޭނެ. މިކަމުގެ ވަރަށް ފެހި ސިގްނަލްއެއް އާޅުގަނޑުމެންނަށް މިވަނީ އިންޑިއާއިން ލިބިފައި." ވަޒީރު ވިދާޅުވިއެވެ.

ރާއްޖޭގައި ގިނަ އަދަދެއްގެ އުފެއްދުންތެރިން އެބަތިބިކަމަށާއި، ސޯޝަލް މީޑިއާގެ އެކި ޕްލެޓްފޯމްތަކަކީވެސް އާމްދަނީ ހޯދޭނެ ވަސީލަތްތަކެއްކަން ވަޒީރު ވިދާޅުވިއެވެ. ރާއްޖޭގައި މިކަން ނުކުރެވޭ ސަބަބީ ރާއްޖެއަށް މިހާރު އޮތް ނިޒާމުގެ ތެރޭގައި ޕޭމަންޓް ރިސީވް ކުރެވޭނެ ފަސޭހަ ގޮތްތަކެއް ނެތުންކަމަށްވެސް ވަޒީރު ވިދާޅުވިއެވެ.

އަލަށް އުފެދިގެން އަންނަ ކްރިއޭޓިވް އެތައް ބަޔަކު އޮންލައިންކޮށް އެތައް ވިޔަފާރިއެއް ކުރާކަމަށާއި، ރާއްޖޭގެ ޑިޖިޓަލް އީކޮމާސް ވިޔަފާރީގައި ހަރަކާތްތެރިވާ ފަރާތްތަކަށް ވަރަށް ބޮޑު ގޮންޖެހުންތަކެއް ހުރިކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ޕޭޕާލްގެ ޚިދުމަތް ރާއްޖެއަށް ހޯދުމަށްޓަކައި ރައީސް ވިދާޅުވެގެން ވަރަށް ގިނަ ފަރާތްތަކާއި ބައްދަލުކުރެވިފައިވާކަމަށާއި، މިހާރު ސީދާ އެމެރިކާ ސަރުކާރުގެ އެހީތެރިކަމަށް އެދިގެން އެ މަސައްކަތް ކުރަމުންދާކަމަށެވެ.

"ވީޗެޓް ޕޭ ރާއްޖޭގައި މިހާރު ބޭނުންކުރެވޭނެ. އަދި އޭގެއިތުރަށް ބޭންކް އޮފް މޯލްޑިވްސްއާއި އެމްއައިބީގެ ޑޮލަރ ވޮލެޓް އެކްޓިވޭޓްކުރެވިފައި މިހާރު އެހެރީ. އެއީ 8 މަސްދުވަސް ތެރޭގައި ޑރ. މުއިއްޒު ވެރިކަމާއި ހަވާލުވެވަޑައިގެންފަހުން އަޅުގަނޑުމެންނާއި ބައެއް ބޭންކްތަކާއި ވާހަކަދައްކައި ގިނަ މަސައްކަތްތަކެއް މިކަމުގައި ކުރެވިގެންދިޔަ." ވަޒީރު ވިދާޅުވިއެވެ.

މީގެއިތުރުން ޓިކްޓޮކްއިން ރާއްޖެއަށް އެންމެ ފައިދާހުރިގޮތް ހޯދުމަށްޓަކައި ރީޖަނަލް އޮފީސްތަކާވެސް ވާހަކަދައްކަން ފަށާފައިވާކަމަށް ވަޒީރު ވިދާޅުވިއެވެ. އަދި އެކަން ކުރާއިރު ޗައިނާގެ ސަރުކާރުގެ އެހީތެރިކަމަށްވެސް މިހާރު އެދިފައިވާކަމަށް ވިދާޅުވިއެވެ.