ދައުލަތަށް އެންމެ ގިނަ ދުވަހު ޚިދުމަތްކުރެއްވުމުގެ ޝަރަފް މިފަހަރު ޝަހީމާ މޫސާއަށް

ދައުލަތައް ގިނަ ދުވަހު ޚިދުމަތް ކުރެއްވުމުގެ ޝަރަފްގެ ބެޖާއި އައްޑަނަ މިއަހަރު ލިބިވަޑައިގަތް ބޭފުޅުންގެ ތެރެއިން އެންމެ ގިނަ ދުވަހު ޚިދުމަތް ކުރެއްވުމުގެ ޝަރަފް ލިބިވަޑައިގެންފައިވަނީ މ. ލަންސިމޫގެ އާގެ/ ޝަހީމާ މޫސާއަށެވެ. ޝަރަފްގެ ބެޖާއި އައްޑަނަ އަރުވާފައިވަނީ މިނިވަންދުވަހުގެ ރަސްމީ ޖަލްސާގައެވެ.

މިނިވަންދުވަހުގެ ރަސްމީ ޖަލްސާގައި ދައުލަތައް ގިނަ ދުވަހު ޚިދުމަތް ކުރެއްވި 138 ބޭފުޅަކަށް ވަނީ ޝަރަފްގެ ބެޖާއި އައްޑަނަ އަރުވާފައެވެ. އެބޭފުޅުންނަށް ފިލައާއި އައްޑަނަ އަރުވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއެވެ.

މިނިވަން ދުވަހުގެ ޖަލްސާގައި މިފަހަރު އެންމެ ދިގު މުއްދަތަކަށް ދައުލަތައް ޚިދުމަތް ކުރައްވައިގެން ޝަރަފްގެ ބެޖާއި އައްޑަނަ ހާސިލްކުރެއްވުމުގެ ޝަރަފް ލިބިވަޑައިގަތީ މ. ލަންސިމޫގެއާގެ ޝަހީމާ މުޙައްމަދަށެވެ. އޭނާގެ ބަދަލުގައި މި އިނާމާއި ހަވާލުވެވަޑައިގަތީ ދަރިކަލުންނެވެ.

ޝަހީމާ މުޙައްމަދު ދިވެހި ދައުލަތައް ޚިދުމަތް ކުރައްވަމުން ގެންދަވާތާ 47 އަހަރާއި 7 މަހަށްވުރެ ދިގު މުއްދަތެއް ވަނީ ވެފައެވެ. އޭނާއަށް ވަނީ ސިވިލް ކޯޓުގެ އެންމެ ހީވާގި މުވައްޒަފުގެ ޝަރަފު ލިބިވަޑައިގެންފައެވެ. އަދި ކުރިން މަސައްކަތްކުރި އޮފީސްތަކުންވެސް އެކި ފަހަރުމަތިން ހަނދާނީ ލިޔުން ވަނީ ލިބިވަޑައިގެންފައެވެ. ޝަހީމާ މިހާރު ހުންނެވީ ސިވިލް ކޯޓުގެ އެސިސްޓަންޓް ޑިރެކްޓަރުކަމުގެ މަޤާމުގައެވެ.

ދައުލަތައް ގިނަ ދުވަހު ޚިދުމަތް ކުރެއްވުމުގެ އިނާމު ދެއްވަނީ 35 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައިވާ ބޭފުޅުންނަށެވެ. މިއަހަރުގެ މިނިވަން ދުވަހުގެ ޖަލްސާގައި ދައުލަތައް 43 އަހަރަށްވުރެ ދިގު މުއްދަތަކަށް ޚިދުމަތް ކުރައްވައިގެން 70 ބޭފުޅުން ވަނީ ޝަރަފްގެ ބެޖާއި އައްޑަނަ ހާސިލްކުރައްވާފައެވެ.