އެމްއޭސީއެލްގެ 27 ވަނަ ބޭސިކް ފަޔަރ ފައިޓަރ ކޯސް ފަށައިފި
-
ކޯހުގައި 12 ފަޔަރ ފައިޓަރުން ބައިވެރިވޭ
މޯލްޑިވްސް އެއަރޕޯޓްސް ކޮމްޕެނީ، އެމްއޭސީއެލްގެ 27 ވަނަ ބޭސިކް ފަޔަރ ފައިޓަރ ކޯސް ފަށައިފިއެވެ.
މިއީ އެއަރޕޯޓުގައި މަސައްކަތްކުރާ ފަޔަރ ފައިޓަރުން ތަމްރީންކުރުމަށް ހިންގާ ކޯހެކެވެ. މި ކޯހަކީ އިމަރޖެންސީ ހާލަތްތަކުގައި ރައްކާތެރިކަމާއެކު ހަރަކާތްތެރިވާނެ ހުނަރުތައް ކިޔަވައިދޭ މުހިންމު ކޯހެކެވެ.
ވެލާނާ އިންޓަރނޭޝަނަލް އެއަރޕޯޓުގައި 43 ދުވަހުގެ މުއްދަތަށް ކުރިއަށްގެންދާ މިކޯހަކީ މޯލްޑިވްސް ސިވިލް އޭވިއޭޝަން އޮތޯރިޓީން ގަބޫލުކުރާ ފެންވަރުގެ ކޯހެކެވެ. މި ކޯހުގައި 12 ފަޔަރ ފައިޓަރުން ބައިވެރިވާ ކަމަށް އެމްއޭސީއެލުން މައުލޫމާތު ދެއެވެ.
އެއަރޕޯޓުގައި ރައްކާތެރިކަން ކަށަވަރުކުރުމަށް އެމްއޭސީއެލްއިން ވަނީ ދާދިފަހުން އައު ފަޔަރ ސްޓޭޝަނެއްވެސް ހުޅުވާފައެވެ. އައު ފަޔަރ ސްޓޭޝަން ޤާއިމުކޮށްފައިވަނީ އަލަށް ބޭނުންކުރަން ފެށި ރަންވޭއާ ދިމާލުގައެވެ. 2230 އަކަ ފޫޓުގެ ސަރަޙައްދެއްގައި ތަރައްޤީކުރި މި ފަޔަރ ސްޓޭޝަން މިހާރު ޤާއިމުކޮށްފައިވަނީ މުޅި ވީއައިއޭގެ ހުރިހާ ސަރަޙައްދެއް ބަލަހައްޓައި އަދި ކަމެއް ދިމާވާ ޙާލަތުގައި އަވަސް ޚިދުމަތް ދެވޭނެ ރަނގަޅު ތަނެއްގައިކަން އެމްއޭސީއެލުން ފާހަގަކުރެއެވެ.