ދިވެހިރާއްޖޭގެ އެންމެ އަލިގަދަ ތަރިއަށް ބައި މިލިއަން ރުފިޔާ !

ބައި މިލިއަން ރުފިޔާގެ ފައިސާގެ އިނާމަކާއެކު، ދިވެހިރާއްޖޭގެ އެންމެ އަލިގަދަ ތަރި ޕްރޮގްރާމް ލޯންޗުކޮށްފިއެވެ. 

ދިވެހިރާއްޖޭގެ އެންމެ އަލިގަދަ ތަރި ޕްރޮގްރާމަކީ ޕަބްލިކް ސަރވިސް މީޑިއާއިން ކޮންމެ ރަމަޟާންމަހު ގެނެސްދޭ ޤުރުއާން ކިޔެވުމުގެ މުބާރާތެކެވެ. މި ޕްރޮގްރާމަކީ ޤުރުއާން ކިޔެވުމުގެ ހުނަރާއި، ޤުރާއާނާމެދު މުޖުތަމަޢުގައި އޮންނަ ޤަދަރު މަތިކޮށް، ޤުރުއާނާމެދު އާންމުންގެ ހިތްތަކުގައި ލޯބި ޖެއްސުމުގެ ގޮތުން ގެނެސްދޭ ޕްރޮގްރާމެކެވެ. އެންމެ އަލިގަދަ ތަރި ޕްރޮގްރާމްގެ އެއްވަނަ، ދެވަނަ، ތިންވަނައަށް ހޮވޭ ފަރާތްތަކަށް އަގު ބޮޑެތި އިނާމުތަކެއް މިއަހަރު ހުށަހަޅާފައިވާއިރު، އޭގެ ތެރޭގައި އިސްލާމިކް ޔުނިވަރސިޓީން ދެއްވާ ފުލް ސޮކްލަރޝިޕް ހިމެނެއެވެ. މީގެ އިތުރުން ޙައްޖު ދަތުރާއި، ޢުމްރާ ދަތުރުގެ އިތުރުން ތިން ހަރަމަށް ކުރުމަށް ހަމަޖެހިފައިވާ ޢުމްރާ ދަތުރުވެސް މި ޕްރޮގްރާމްގެ އެއްވަނަ، ދެވަނަ އަދި ތިންވަނަޔަށް ހޮވޭ ފަރާތަށް އިނާމެއްގެ ގޮތުގައި ބައެއް ފަރާތުން މިހާރު ވަނީ ހުށަހަޅާފައެވެ. މީގެ އިތުރުން އިސްލާމީ ޤައުމުތަކުންވެސް މިމުބާރާތަށް އިނާމު ހުށަހަޅުއްވާނެ ކަމުގެ ޔަޤީންކަން ދެއްވާފައިވެއެވެ. މިޕްރޮގްރާމް ލޯންޗުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ޕަބްލިކް ސަރވިސް މީޑިއާގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް އަބްދުލް ލަތީފް ވިދާޅުވީ، މި ޕްރޮގްރާމަކީ ޤުރުއާނާ އިސްލާމީ ފަންނު ކުރިއެރުވުމަށް ޕީއެސްއެމްގެ ފަރާތުން ކުރާ ބޮޑު މަސައްކަތެއް ކަމަށެވެ. އިކްރާމް ވިދާޅުވީ، މި ޕްރޮގްރާމަކީ ގިނަބަޔަކު ބަލާ ޕްރޮގްރާމަކަށް ހެދުމަށް ގިނަ މަސައްކަތެއް ކުރައްވަމުން ގެންދަވާ ކަމަށާއި އެގޮތުން މިއަހަރުގެ ޕްރޮގްރާމްގައި އެންމެ ބޮޑު ބަދަލަކަށް ފެނިގެންދާނީ ރާއްޖޭގެ ތިން ސަރަޙައްދެއްގައި އޮޑިޝަންތައް ބޭއްވިގެން ޕްރޮގްރާމް ގެނެސްދިނުންކަން އިކްރާމް ފާހަގަކުރެއްވިއެވެ.

img:http://s3.psmnews.mv/images/660x400/14634224323219.jpg|ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ މުހައްމަދު އިކްރާމް / ފޮޓޯ: ޕީއެސްއެމް

އިކްރާމްގެ ވާހަކައިގައި، އަންނަ އަހަރު މިމުބާރާތް ބާއްވާއިރު މިއަހަރުގެ މުބާރާތަށްވުރެ ތަފާތުކޮށް، ޤުރުއާނާބެހޭ ޢިލްމު އޭގައި ހިމެނޭ ގޮތަށް ސެގްމަންޓު މުބާރާތް ފަރުމާކުރަން ނިންމަވާފައިވާ ކަމަށް ވިދާޅުވިއެވެ. ސްޕޮންސަރޝިޕް އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން ޕަބްލިކް ސަރވިސް މީޑިއާގެ، މެނޭޖިންގ ޑިރެކްޓަރ އިބްރާޙީމް ޚަލީލް ވަނީ، ކުރިޔަށް އޮތް ރަމަޟާން މަހު ޕީއެސްއެމްއިން ކީރިތި ޤުރުއާންގެ ދިވެހި ތަރުޖަމާގެ އޯޑިއޯ، ވީޑިއޯ ބެލުންތެރިންނާ ހަމަޔަށް ގެނެސްދިނުމަށް ހަމަޖެހިފައިވާ ކަން އިޢުލާންކުރައްވާފައެވެ. ޚަލީލް ވިދާޅުވީ، ޤުރުއާންގެ ދިވެހި ތަރުޖަމާގެ އޯޑިއޯ ވީޑިއޯ ރައްޔިތުންނާ ހަމަޔަށް ގެނެސްދިއުމަށްޓަކައި މިހާރު ކުރަމުންދަނީ އޭގެ އެންމެ ފަހުގެ މަސައްކަތްތަށް ކަމަށެވެ.

img:http://s2.psmnews.mv/images/660x400/14634224772535.jpg|ޕީއެސްއެމްގެ މެނޭޖިންގ ޑިރެކްޓަރ އިބްރާހިމް ޚަލީލް / ފޮޓޯ: ޕީއެސްއެމް

މިރަސްމިއްޔާތުގައި ވާހަކަދައްކަވަމުން އެލައިޑް އިންޝުއަރެންސް ކުންފުނީގެ މެނޭޖިންގ ޑިރެކްޓަރ އަޙުމަދު އަމީލް ދެއްކެވި ވާހަކަގައި، މުޖުމަތަމަޢަށް ފައިދާކުރަނިވި މިފަދަ ޕްރޮގްރާމްތަށް ގެނެސްދިނުމުގައި އެހީތެރިކަން ފޯރުކޮށްދިނުމަށް އެކުންފުނިން ޚާއްސަ އިސްކަމެއް ދެއްވުމަށް ނިންމަވާފައިވާ ކަމަށް ވިދާޅުވިއެވެ. 

img:http://s4.psmnews.mv/images/660x400/14634225257145.jpg|އެލައިންޑް އިންޝުއަރެންސްގެ މެނޭޖިންގ ޑިރެކްޓަރ އަޙުމަދު އަމީލް / ފޮޓޯ: ޕީއެސްއެމް

ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވި ރަސްމިއްޔާތުގައި ދިވެހިރާއްޖޭގެ އެންމެ އަލިގަދަ ތަރީގެ ސްޕޮންސަރޝިޕް އެއްބަސްވުމުގައި ޕަބްލިކް ސަރވިސް މީޑިއާގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އިބްރާޙީމް ޚަލީލް، އަދި ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް އަބްދުލް ލަތީފްއެވެ. އަޔާދީ ތަކާފުލްގެ ފަރާތުން ސޮއިކުރެއްވީ އެލައިޑް އިންޝުއަރެންސްގެ މެނޭޖިންގ ޑިރެކްޓަރ އަޙުމަދު އަމީލްއެވެ. އަދި ޑެޕިއުޓީ މެނޭޖިންގ ޑިރެކްޓަރ މުޙައްމަދު ޝަފާޒްއެވެ.

ޕީއެސްއެމްއިން މިހާތަނަށް އަލިގަދަ ތަރީގެ ތިން ޕްރޮގްރާމެއް ގެނެސްދީފައިވާއިރު، މިއަހަރުގެ ޕްރޮގްރާމް ގެނެސްދިނުމަށް ހަމަޖެހިފައިވަނީ ބޮޑެތި ބަދަލުތަކާއެކުއެވެ. އެގޮތުން މި ޕްރޮގްރާމްގެ އޮޑިޝަންތަށް ރާއްޖޭގެ ތިން ސަރަޙައްދެއްގައި ބޭއްވުމަށް ވަނީ ހަމަޖެހިފައެވެ. އޭގެ ތެރޭގައި ފުވައްމުލަކާއި، ގދ. ތިނަދޫއާއި، ހއ.އިހަވަންދޫ އަދި މާލެ ހިމެނެއެވެ. 

އެލައިޑް އިންޝުއަރެންސްގެ އިސްލާމިކް ވިންޑޯ، އަޔާދީ ތަކާފުލް އިން ދިވެހިރާއްޖޭގެ އެންމެ އަލިގަދަ ތަރީގެ މިއަހަރުގެ ޕްރޮގްރާމް ސޮޕްންސަރ ކޮށްފައިވަނީ އެކެއް ޕޮއިންޓް އަށެއް މިލިއަން ރުފިޔާއަށެވެ. ފާއިތުވި އަހަރުތަކުގައި މި ޕްރޮގްރާމްއިން އެއްވަނަ ހޯދާފައިވާ ފަރާތްތަކަށް އިނާމެއްގެ ގޮތުގައި އެއްލައްކަ ރުފިޔާ ދެއްވިއެވެ.