ފޯރިގަދަ ހަރަކާތްތަކަކާއެކު އުރީދޫ ފަން ރަން ލ. އަތޮޅުގައި ބާއްވައިފި

އުރީދޫ މޯލްޑިވްސްގެ ފަން ރަން ލ. އަތޮޅުގައި ބާއްވައިފިއެވެ. މި ރަން ބާއްވާފައިވަނީ ހުކުރު ދުވަހުގެ ހަވީރު 4 އިން 6 އަށެވެ.

އުރީދޫ ފަން ރަން އަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަޤުބޫލު އެއް ހަރަކާތްކަމަށް އެ ކުންފުނިން ވަނީ ބުނެފައެވެ.

ވަކިން ޚާއްސަކޮށް މިއީ ގިނަ އަދަދެއްގެ ކުޑަކުދިންނާއި ޒުވާނުންގެ ބޮޑު ބައިވެރިވުމެއް ލިބިގެންދާ ހަރަކާތެކެވެ. މިއަހަރުގެ އުރީދޫ ފަން ރަން ލާމުގެ މީޑިއާ ޕާޓްނަރަކީ ޕަބްލިކް ސަރވިސް މީޑިއާ، ޕީ.އެސް.އެމްއެވެ.

އުރީދޫ ފަން ރަން ލ. ގައި 1500 އާއި 2000 އާއި ދެމެދުގެ އަދަދަކަށް ބައިވެރިން ބައިވެރިވެފައިވާކަމަށް އުރީދޫއިން ވަނީ ބުނެފައެވެ.

މިއަހަރުގެ ފަން ރަންގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރާއި، ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢުގެ އިތުރުން ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވަނީ ބައިވެރިވެވަޑައިގެންފައެވެ.

މީގެ އިތުރުން މަޝްހޫރު ފުޓުބޯޅަ ކްލަބް "ޕީއެސްޖީ"ގެ ލެޖެންޑް ޖޭޖޭ އޮކޯޗާވެސް މިއަހަރުގެ ދުވުމުގައި ވަނީ ބައިވެރިވެފައެވެ. ޕީއެސްޖީއަކީ 2013 ވަނަ އަހަރުން ފެށިގެން އުރީދޫ ގްރޫޕްގެ ޕްރިމިއަމް ޕާޓްނަރެއްގެ އިތުރުން ގްލޯބަލް ބްރޭންޑް އެމްބެސެޑަރެއްގެ ގޮތުގައި މަސައްކަތް ކުރަމުން އަންނަ ކްލަބެކެވެ.

6 އަހަރުން މަތީގެ ހުރިހާ ފަރާތްތަކަށްވެސް މި ދުވުމުގައި ބައިވެރިވުމުގެ ފުރުސަތު އުރީދޫއިން ހުޅުވާލިއެވެ. މިއީ ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ ދުވުމެކެވެ.

ދުވުން ފަށާފައިވަނީ ލ. ގަމު މުކުރިމަގު އަވަށުގެ ޖެޓީ ސަރަޙައްދުންނެވެ. އެއަށްފަހު މި ދުވުމަށް ޚާއްސަކޮށްފައިވާ ރޫޓުން ތަފާތު 4 އޮޕްސްޓެކަލްއެއް ހުރަސްކުރުމަށްފަހު ބައިވެރިން ދުވުން ނިންމާލާފައިވަނީވެސް ދުވުން ފެށި ސަރަޙައްދަށެވެ.

މިއީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށްވެސް ތަފާތު ތަޖުރިބާތަކެއް ލިބިގެންދާނެ ދުވުމެއްގެ ގޮތުގައި އުރީދޫ މޯލްޑިވްސްއިން ފާހަގަކުރެއެވެ.

އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުމެވެ. އުރީދޫ ފަން ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލަގައިގެ އިތުރުން ފޯމް، ފެން އަދި މަޖާ ހަރަކާތްތަކެއް ކުރިއަށްދާނެއެވެ.

މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުންވެސް މި ދުވުން ނިންމުމުގެ އިޙްތިޔާރު ދުވުމުގެ ބައިވެރިންނަށް އޮވެއެވެ.