ކުރީގެ ވެރިކަމެއްގައި ރާއްޖޭގެ ބައިނަލްއަޤްވާމީ ވައިގެ ބަނދަރު އިންޑިއާގެ ޖީއެމްއާރު ކުންފުންޏަށް ދެއްވުމަކީ، އިޤްތިޞާދީ ގޮތުން ހިންގެވި ބޮޑު ޖަރީމާއެއްގެ ގޮތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ސިފަކުރައްވައިފިއެވެ. އިބްރާހީމް ނާޞިރު އިންޓަރނޭޝަނަލް އެއަރޕޯޓުގެ ރަންޔޫބީލް ފާހަގަކުރުމަށް ބޭއްވި ރަސްމިއްޔާތުގައި ރައީސް ވަނީ ކުރީގެ ސަރުކާރަކުން ބޭރުގެ ފަރާތަކަށް އެއަރޕޯޓް ދޫކޮށްލެއްވުމުން ރައްޔިތުންނަށާއި، ދައުލަތަށް ލިބުނު ބޮޑު ގެއްލުމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ.
ދިވެހިންގެ އެއްބައިވަންތަކަމާއި، މިނިވަންކަމާއި އިޤްތިޞާދުގެ އެންމެ ބޮޑު ރަމްޒަކީ ދިވެހިންގެ ބައިނަލްއަޤުވާމީ އެއަރޕޯޓެވެ. ދިވެހިންގެ ފުރަތަމަ ވައިގެބަނދަރު ހުޅުވާފައިވަނީ 1966 ވަނަ އަހަރުގެ އޭޕްރީލް މަހުގެ 12 ވަނަ ދުވަހުއެވެ. މި ވައިގެބަނދަރު ނުވަތަ އިބްރާހީމް ނާޞިރު އިންޓަރނޭޝަނަލް އެއަރޕޯޓަށް ބައިޤަރުނު މިއަހަރު މިދަނީ ފާހަގަކުރަމުންނެވެ. މިކަން ފާހަގަކުރުމަށް ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ އޭރުގެ ސަރުކާރުން އެއަރޕޯޓް ބޭރުގެ ފަރާތަކަށް ދެއްވުން އެއީ އިޤްތިޞާދީގޮތުން ހިންގެވި ޖަރީމާއެއްގެ ގޮތުގައި ސިފަކުރައްވާފައެވެ. އަދި ޖީއެމްއާރ އަތުން އެއަރޕޯޓް އަނބުރާ ހޯދުމަށް މަސައްކަތްކުރި އެންމެންނަކީ މިނިވަންކަމަށް މުހިންމު މަސައްކަތްތަކެއް ކުރި ބައެއްކަން ރައީސް ފާހަގަކުރެއްވިއެވެ. އެމަނިކުފާނު ވިދާޅުވީ، ކުރީގެ ސަރުކާރަކުން ދިވެހިންގެ ފަޚުރެއްކަމަށް ދެކޭ އެއަރޕޯޓް ކުއްޔަށް ދެއްވައިގެން އަހަރު ދުވަހުގެ ތެރޭގައި ދައުލަތަށް ލިބުނީ އެންމެ 16 މިލިއަން ރުފިޔާކަމަށެވެ. އެއީ އެންމެ އާދައިގެ ވިޔަފާރިއަކުންވެސް އަހަރު ދުވަހުގެ ތެރޭގައި ލިބޭހާ މަދު މިންވަރެއްކަން ރައީސް ފާހަގަކުރައްވިއެވެ.
ޖީއެމްއާރު ކުންފުނިން އެއަރޕޯޓު އަނބުރާ ހޯއްދަވައި، އެތަނުގެ ހިންގުމާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއާ ޙަވާލުކުރެއްވި އަހަރު، އެކުންފުންޏަށް ފައިދާގެ ގޮތުގައި އެއްހާސް މިލިއަން ރުފިޔާ ލިބުނުކަން ރައީސް ފާހަގަކުރެއްވިއެވެ. އެއީ 984 މިލިއަން ރުފިޔާގެ އިތުރުވުމެކެވެ. ރައީސް ވިދާޅުވީ، ސޯޅަ މިލިޔަން ރުފިޔާއިން އެއްހާސް މިލިއަން ރުފިޔާއަށް އެއަރޕޯޓުން އެމްއޭސީއެލްއަށް ލިބުނު ފައިދާ އިތުރު ކުރެވިފައިވާއިރު، އެ ޢަދަދު ޑޮލަރުން ގެނައުމަށް ސަރުކާރުން އުއްމީދު ކުރައްވާ ކަމަށެވެ.
ދިވެހިން އަމިއްލައަށް ކުރި ބުރަ އަދި ގޮންޖެހުންބޮޑު މަސައްކަތުން ހެދި ދިވެހިންގެ އެއަރޕޯޓްކަމުގައިވާ އިބްރާހީމް ނާޞިރު އިންޓަރނޭޝަނަލް އެއަރޕޯޓް ހެއްދެވުމުގައި އޭރުގެ ރައީސް އިބްރާހީމް ނާޞިރު ގެންގުޅުއްވި ހަރުދަނާ ސިޔާސަތަށް ރައީސް ޔާމީން ތަޢުރީފްކުރެއްވިއެވެ. މި އެއަރޕޯޓް ބޭރުގެ ކުންފުންޏަކާ ކުރީގެ ސަރުކާރަކުން ޙަވާލުކުރެއްވީ، ދިވެހިންނަށް ޒަމާނީ ފެންވަރުގެ މިފަދަ އެއަރޕޯޓެއް ތަރައްޤީކުރެވޭނެ ކަމަށް އެ ސަރުކާރަށް ފެނިވަޑައިގެންނެވީމައެވެ. ނަމަވެސް ސަރުކާރުގެ އެ ނިންމެވުމާމެދު ރައްޔިތުންގެ ގިނަބަޔަކު ހިތްހަމަނުޖެހިގެން، އަޑު އުފުލާފައިވެއެވެ. މި އެއަރޕޯރޓް ބޭރުގެ ފަރާތަކަށް ކުއްޔަށް ދެއްވި އެގްރިމަންޓް ނިމުމަކަށް ގެންނަވާފައިވަނީ 7 ޑިސެމްބަރ 2012 ގައި، އޭރުގެ އޮތް ކޯލިޝަން ސަރުކާރުގެ ފަރާތުންނެވެ.
މި އެއަރޕޯޓަށް 50 އަހަރު ފުރުން ފާހަގަކުރުމުގެ އިޙްތިފާލްގައި، ސިންގަޕޫރުން މިސާލު ނަންގަވަމުން ރައީސް ޔާމީން ވިދާޅުވީ، ސިންގަޕޫރުން އެއަރޕޯޓް ތަރައްޤީކުރަމުން އަންނަނީ އަބަދުވެސް 20 އަހަރު ކުރިޔަށް ޕްލޭން ކޮށްގެން ކަމަށެވެ. ހަމަ އެގޮތަށް ރާއްޖެއިން އަމާޒުކުރަނީ 25 ނުވަތަ 50 އަހަރުގެ ތަރައްޤީއަށް ބައްލަވައިގެންކަމަށް އެމަނިކުފާނު ވިދާޅުވިއެވެ. ރައީސް ޔާމީން ވިދާޅުވީ، ދުނިޔޭގެ ތަރައްޤީގެ އެންމެ ބޮޑެތި ރޭހުގައި ރާއްޖެ ބައިވެރިވާން ބޭނުންވާކަމަށާއި، ކުރިއަށް ދިޔުމުގެ ޢަޒުމު އެބަ އޮތްކަމަށެވެ. މިސަރުކާރުން އެއަރޕޯޓް ބޭރު ބައެއްގެ އަތަށް ނުދެއްވައި ދިވެހިންގެ އެއަރޕޯޓެއްގެ ގޮތުގައި ބާއްވާނެކަމުގެ ޔަޤީންކަން ރައީސް ވަނީ ދެއްވާފައެވެ.