މާލޭ 2 ނަމްބަރު ކުނިކޮށި ކުރިމަތީގައި އޮންނަ ކުނި އަޅާދޯނި ޕެޓްރޯލް ޖެޓީ ސަރަޙައްދަށް ބަދަލުކޮށްފިއެވެ.
ވޭސްޓް މެނޭޖްމެންޓް ކޯޕަރޭޝަނުން ވިދާޅުވީ ކުނިއުކާލާ ދޯނިތައް ރޭ ބާރަޖެހުމާއި ހަމައިން ފެށިގެން ޓީޖެޓީގެ ޕެޓްރޯލް ޖެޓީއަށް ބަދަލުކުރައްވާފައިވާ ކަމަށެވެ. އަދި ދޯނިތައް މިސަރަޙައްދަށް ބަދަލުކުރެއްވީ އިންޑަސްޓްރިއަލް ވިލެޖް ހެއްދެވުމުގެ މަސައްކަތުގެ ތެރެއިން އިރުދެކުނު ސަރަޙައްދުގެ ނެރުކެނޑުމުގެ މަސައްކަތް ހިނގަމުންދާތީ އެ މަސައްކަތް ނިމެންދެން ކަމަށް ވޭސްޓް މެނޭޖްމެންޓް ކޯޕަރޭޝަނުން މަޢުލޫމާތު ދެއްވައެވެ.
މާލޭގެ އިރުމަތީފަރާތުގައި ހައްދަވާ އިންޑަސްޓްރިއަލް ވިލެޖަކީ މާލޭގެ އެކި ސަރަޙައްދުތަކުގައި މިހާރު ހުރި ގަރާޖް، ވޯކްޝޮޕް ފަދަ ތަންތަނާއި، އިންޑަސްޓްރިއަލް މަސައްކަތްތައް އެސަރަޙައްދަށް ބަދަލުކުރެއްވުމާއި، ކުނިމެނޭޖްކުރުމުގެ އިންތިޒާމް ހަމަޖެއްސެވުމުގެ އިތުރުން، ބަރުވެހިކަލްތައް ބެހެއްޓެވުމަށް ސަރުކާރުން ތަރައްޤީކުރައްވަން ނިންމަވާފައިވާ ސަރަޙައްދެކެވެ. މިތަނުގެ މަސައްކަތްތައް ސަރުކާރުން ކޮންޓްރެކްޓް އުޞޫލުން ޙަވާލުކުރައްވާފައިވަނީ އެމްޓީސީސީއާއެވެ. އިންޑަސްޓްރިއަލް ވިލެޖް ޤާއިމު ކުރައްވާއިރު މާލޭގެ އިރުދެކުނު ފަރާތު ފަޅަށް ވަދެނިކުމެ ހެދުމަށް އިތުރު ނެރެއް ކެނޑުމުގެ މަސައްކަތްވެސް ދަނީ ކުރެވެމުންނެވެ.