ރާއްޖެއާއި ޗައިނާގެ އިސްތިރާޖީ ގުޅުން އިތުރަށް ހަރުދަނާކުރަން ބޭނުންވޭ: ޝީ

ރާއްޖެއާއި ޗައިނާއާ ދެމެދު އިސްތިރާޖީ ގުޅުން އިތުރަށް ހަރުދަނާކުރުމަށް ބޭނުންފުޅުވާކަމަށް ޗައިނާގެ ރައީސް ޝީ ޖިންޕިންގ ވިދާޅުވެއްޖެއެވެ.

ޗައިނާގެ ރައީސް މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އުފަންދުވަހުގެ ތަޙުނިޔާ ވިދާޅުވެ ފޮނުއްވެވި ސިޓީފުޅުގައެވެ. މި ސިޓީފުޅު ރައީސުލްޖުމްހޫރިއްޔާއަށް އަރުވާފައިވަނީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިން އެމަނިކުފާނުގެ އަރިހަށް ކުރެއްވި އިހުތިރާމުގެ ޒިޔާރަތުގައެވެ.

ޗައިނާގެ ރައީސް ޝީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ފޮނުއްވެވި ސިޓީފުޅުގައި ވަނީ އެމަނިކުފާނަށް އުފަންދުވަހުގެ ތަޙުނިޔާ ވިދާޅުވެފައެވެ. އަދި ދެ ޤައުމުގެ ގުޅުން އިތުރަށް ބަދަހިކުރުމުގެ މުހިންމުކަމަށް އަލިއަޅުއްވާލައްވައި ދެ ޤައުމުގެ އިސްތިޖާރީ ގުޅުން އިތުރަށް ހަރުދަނާ ކުރުމަށް ބޭނުންފުޅުވާކަމަށް އެމަނިކުފާނު ވަނީ ވިދާޅުވެފައެވެ.

މީގެ އިތުރުން ދެ ޤައުމު ގުޅިގެން ހިއްސާވާނެ މުސްތަގުބަލެއް ބިނާކުރުމަށް މުޖުތަމައެއް އުފެއްދުމާގުޅޭގޮތުންވެސް އެމަނިކުފާނު ވަނީ ސިޓީފުޅުގައި އަލިއަޅުއްވާލައްވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެ ސިޓީ ލިބިވަޑައިގަތުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށް ވިދާޅުވެ ޝުކުރު އަދާކުރައްވާފައެވެ. އަދި ރައީސުލްޖުމްހޫރިއްޔާ ވަނީ މިއަދު އެމަނިކުފާނާއެކު އުފަންދުވަސް ހިއްސާކުރައްވާ ޗައިނާގެ ރައީސަށްވެސް އުފަންދުވަހުގެ ތަހުނިޔާ ވިދާޅުވެ ސިޓީފުޅެއް ފޮނުއްވާފައެވެ.

ޗައިނާގެ ސަފީރު ރައީސުލްޖުމްހޫރިއްޔާގެ އަރިހަށް ކުރެއްވި ޒިޔާރަތުގައި ދެ ޤައުމުގެ ގުޅުން އިތުރަށް ބަދަހިކުރުމާ ގުޅޭގޮތުން ވަނީ މަޝްވަރާކުރައްވާފައެވެ. އެގޮތުން، ރާއްޖޭގެ އިގްތިސާދީ ތަރައްގީއަށާއި ސަރުކާރަށް އެހީތެރިކަން ބޭނުންވާ އެކި ދާއިރާތަކުން ޗައިނާގެ އެހީތެރިކަން ލިބޭނެކަމަށް ޗައިނާގެ ސަފީރު ވަނީ ވިދާޅުވެފައެވެ.