ކުރާ ކޮންމެ މަސައްކަތަކީ، އޭގެ ފައިދާއާ ލުއިފަސޭހަކަން އެހެން މީހުންނަށް ލިބޭނެ މަސައްކަތަކަށް ހެދުމުގެ ފަލްސަފާ ސިވިލްސަރވިސްގެ މުވައްޒަފުން ގެންގުޅެން ޖެހޭކަމަށް ކުރީގެ ރައީސް ޑރ. މުޙައްމަދު ވަހީދު ހަސަންމަނިކު ވިދާޅުވެއްޖެއެވެ.
މި މި މަހާސިންތާ ފެށުމުގެ ޖަލްސާ ޝަރަފްވެރިކޮށްދެއްވާ ވާހަކަފުޅު ދައްކަވަމުން ކުރީގެ ރައީސް ޑރ މުހައްމަދު ވަހީދު ހަސަންމަނިކު ވިދާޅުވީ ސިވިލްސަރވިސްގެ މައިގަނޑު މަސައްކަތަކަށް ވާންވާނީ ސަރުކާރުގެ ސިޔާސަތުތައް ތަންފީޒުކުރުންކަމަށެވެ. އަދި ހަރުދަނާ ވަރުގަދަ ސިވިލް ސަރވިސްއަކީ ޑިމޮކްރަސީއެއް އުފައްދާ ދެމެހެއްޓުމުގެ އެންމެ މުހިންމު އަސާސްކަން ޑރ ވަހީދު ފާހަގަކުރެއްވިއެވެ.
މުޢައްޒަފުންގެ މަސައްކަތުގައި އަބަދުވެސް އީޖާބީ ގޮތްތައް ހޯދައިގެން މަސައްކަތްކުރަންޖެހޭކަން ރައީސް ވަހީދު ފާހަގަކުރެއްވިއެވެ. އަނެއްކޮޅުން އަލަށް ސިވިލް ސަރވިސްއަށް ވަންނަ ފަރާތްތަކުންވެސް ސިވިލް ސަރވިސްއަކީ އެހެންވަޒީފާއެއް ލިބެންދެން ވަގުތީގޮތުން މަޑުކުރާތަނެއްގެ ގޮތުގައި ދެކޭދެކުން ބަދަލުކޮށް ސިވިލް ސަރވިސްއަކީ ޚިދުމަތެއްކަމަށް ޤަބޫލުކޮށް ވަޒީފާގައި ދެމިތިބެންޖެހޭކަން ރައީސް ވަހީދުގެ ވާހަކަފުޅުގައި ފާހަގަކުރެއްވިއެވެ.
img:http://s4.psmnews.mv/images/660x400/14629584018838.jpg|ސިވިލް ސަރވިސް ކޮންފަރެންސްގެ ތެރެއިން / ފޮޓޯ: ޕީއެސްއެމް
މި ޖަލްސާގައި ވާހަކަފުޅުދައްކަވަމުން ސިވިލްސަރވިސް ކޮމިޝަނުގެ ރައީސް ޑރ އަލީ ޝަމީމް ވިދާޅުވީ ފުރަތަމަ ބޭއްވުނު މަހާސިންތާއިން ފާހަގަކުރެވުނު ކަންކަމުގެ އަލީގައި މިހާރުވެސް ސިވިލްސަރވިސްއަށް ގިނަ ތަރައްޤީތައް ގެނެވިފައިވާކަމަށެވެ. އަދި މިފަހަރުގެ މަހާސިންތާގައި ޖުމްލަ ހަ ދާއިރާއަކުން ކަރުދާސްތައް ހުށައެޅި މަޝްވަރާކުރެވޭނެކަން ޑރ. ޝަމީމް ފާހަގަކުރެއްވިއެވެ.
ސިވިލްސާވިސްގެ ޚިދުމަތްތައް ތަރައްޤީކޮށް ކުރިއެރުވުމަށް ކުރެވިދާނެ ކަންކަމާގުޅޭގޮތުން މަޝްވަރާކުރުމަށް ފެށުނު ސިވިލްސާވިސްގެ ދެވަނަ މަހާސިންތާގައި ސަކަރުކާރުގެ އެކި އިދާރާތަކާއި މިނިވަން މުއައްސަސާތަކުގެ މަންދޫބުންނާ، މިނިސްޓްރީތަކާއި އަތޮޅުކައުންސިލްތަކުން ބައިވެރިވާ ޕާމަނަންޓް ސެކެޓްރީންނާއެކު ޖުމްލަ ސަތޭކަ ބާރަ ފަރާތަކުން ބައިވެރިވެއެވެ. ސިވިލް ސަރވިސްގެ ފުރަތަމަ މަހާސިންތާ ދެހާސް ސާދަވަނަ އަހަރު ބާއްވާފައިވާއިރު އެފަހަރުގެ މަހާސިންތާގައި ތިންދާއިރާއެއްގެ މައްޗަށް ދިހަ ކަރުދާސް ހުށައަޅާ މަޝްވަރާކޮށްފައިވެއެވެ. ދެހާސް ސާދަވަނަ އަހަރުގެ މަހާސިންތާގައިވެސް ސަރުކާރުގެ އިދާރާތަކުގެ އިސްފަންތީގެ ޖުމްލަ އަށްޑިހަ ހަ މަންދޫބަކު ބައިވެރިވިއެވެ.