ކުޑަކުދިންނާއި ޒުވާން ޖީލު ދުންފަތުން ސަލާމަތް ކުރުމަށް "ދަފަރާ" ކެމްޕެއިނެއް އިފްތިތާހުކޮށްފި

ކުޑަކުދިންނާއި ޒުވާން ޖީލު ދުންފަތުން ސަލާމަތް ކުރުމަށް "ދަފަރާ"ގެ ނަމުގައި ހެލްތް ޕްރޮޓަކްޝަން އެޖެންސީ، އެޗްޕީއޭއިން ޚާއްސަ ކެމްޕެއިނެއް އިފްތިތާހުކޮށްފިއެވެ.

މި ކެމްޕެއިން އިފްތިތާހުކޮށްދެއްވީ ދުނިޔޭގެ ދުންފަތުގެ އިސްތިއުމާލު ނުކުރާ ދުވަސް ފާހަގަކުރުމަށް ނ. މަނަދޫގައި ބޭއްވި ޚާއްސަ ޖަލްސާގައި ސިއްޙަތާއި ބެހޭ ވަޒީރު ޑރ. އަބްދުﷲ ޙަލީލްއެވެ.

"ދަފަރާ" ކެމްޕެއިން އަކީ ދުންފަތުގެ ވަބާއިން ކުޑަކުދިންނާއި ޒުވާން ޖީލު ސަލާމަތް ކުރުމަށް ކުރެވޭ މަސައްކަތްޔަކުގެ ތެރެއިން ބެލެނިވެރިން ބާރުވެރި ކުރުމުގެ މަގްސަދުގައި ކުރިއަތް ގެންދިޔުމަށް ނިންމާފައިވާ ކެމްޕެއިނެކެވެ.

މި ކެމްޕެއިން އިފްތިތާހުކޮށްދެއްވާ ވާހަކަ ދައްކަމުން ސިއްހަތާއި ބެހޭ ވަޒީރު ޑރ. އަބްދުﷲ ޙަލީލް ވިދާޅުވީ މި މުޖްތަމައުގައި ދުންފަތުގެ އިސްތިއުމާލް ކުރުން ވަރަށް ބޮޑަށް އާންމު ވެފައިވާކަމަށެވެ. އެގޮތުން ސިންގިރޭޓް ބުއިމާއި ވޭޕް ކުރުން ކުރިއަތް ވުރެއް އާންމު ވެފައިވާކަން ވަޒީރު ވިދާޅުވިއެވެ. މީގެ އިތުރުން ޝީޝާ ބުއިމަކީވެސް ފަހުގެ ޖީލުގެ ޒުވާން ކުދިން މިހާރު ކުރަން ފަށާފައިވާ ވަރަށް ނޭދޭވެ ކަމެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ވޭޕް ކުރާ ނުވަތަ ދުންފަތުގެ އިސްތިއުމާލް ކުރާ ފަރާތްތައް ގިނަވަމުން އާންމުވަމުން އަންނަކަމަށެވެ. މި ކަމަކީ ކަންބޮޑުވާންޖެހޭ ކަމެއްކަން ފާހަގަކުރައްވާ ވަޒީރު ވަނީ ބެލެނިވެރިން މި ކަމާއި މެދު ވިސްނާ ފިކުރުކޮށް ދަރިން އެކަމުން ސަލާމަތްކުރަން މަސައްކަތްކުރުން މުހިއްމުކަން ފާހަގަކުރައްވާފައެވެ. އެގޮތުން ދަރިން ތަރުބިއްޔަތު ކުރުމުގައިވެސް ބެލެނިވެރިން މިހާރަށްވުރެ ވިސްންޖެހޭ ކަންކަން ހުރިކަމަށެވެ.

"ދަރިން ތަރުބިއްޔަތު ކުރުމުގައި ބެލެނިވެރިން ވިސްނާލަން ޖެހޭ ކަންކަން އެބަހުރި. ދަރިން ދުވާލު ގަޑީގައި ކުރަނީ ކޮންމެ ކަމެއްތޯ، ބެލުމާއި ދަރިން އިހްތިޔާރު ކުރާ ރައްޓެހިންނަކީ ކޮންބައެއްތޯ ބަލަން އެބަޖެހޭ. ދަރިން ސުކޫލް މާހައުލުގައި ކުރަނީ ކޮންކަމެއްތޯ ބަލަން ޖެހޭ" ވަޒީރު ވިދާޅުވިއެވެ.

ސިއްޙަތާއި ބެހޭ ވަޒީރު ޑރ. އަބްދުﷲ ޙަލީލް ވަނީ ދަރިންގެ ކިބައިގަ ރަނގަޅު އާދަތައް އަށަގެންނެވުމަށް ބެލެނިވެރިން ގަދައަޅައި މަސައްކަތް ކުރުމަށް އެދިލައްވާފައެވެ. ވަޒީރު ވިދާޅުވީ މި ފަދަގޮތަކަށް މަސައްކަތްކޮށްފިނަމަ ސިއްހަތު ރަނގަޅު ޒުވާން ޖީލެއް ބިނާ ކުރުމަށް މަގުފަހިވެގެން ދާނެކަމަށް ވަޒީރު ވިދާޅުވިއެވެ.

"ދަފަރާ" ކެމްޕެއިން ކުރިއަށް ގެންދިއުމަށް ކޮންމެ އަތޮޅަކުންވެސް ވަކި ފަރާއްތަކެއް ތަމްރީނުކުރުމަށް ޕްރޮގްރާމްތަކެއް ކުރިއަތް ގެންދާނެކަމާށާއި ދުންފަތުން ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ ފަރާއްތަކަށް އެކަމަށް ބޭނުންވާ ފަރުވާ ދިނުމުގެ ނިޒާމް ކޮންމެ އަތޮޅު ހޮސްޕިޓަލެއްގައި ދުރުނޫން މުސްތަގްބަލެއްގައި ގާއިމް ވެގެން ދާނެކަން ސަރުކާރުން ވަނީ ހާމަކުރައްވާފައެވެ.