ޙާފިޒްގެ ހަނދާނުގައި ތަޢުޒިޔާގެ ދަފްތަރެއް ހުޅުވައިފި
-
ދަފްތަރު ހުޅުވާފައިވަނީ އަޙްމަދިއްޔާ އިންޓަރނޭޝަނަލް ސްކޫލުގެ ހަނދާނީ ގެލަރީގައި
-
ޙާފިޒަކީ ސަރުކާރަށް ގިނަ ޚިދުމަތްތައް ކުރައްވާފައިވާ ބޭފުޅެއް
-
އަވަހާރަވީ ޢުމުރުފުޅުން 62 އަހަރުގައި
ބާސްކެޓްބޯލް އެސޯސިއޭޝަން އޮފް މޯލްޑިވްސް (އެމްބީއޭ) އާއި ރާއްޖޭގެ މަސްވެރިކަމުގެ ދާއިރާއަށް ގިނަގުނަ ޚިދުމަތްތަކެއްކޮށްދެއްވި މ. ޒިޔާރަތްދޮށުގޭ އަޙްމަދު ޙާފިޒްގެ ހަނދާނުގައި ތަޢުޒިޔާގެ ދަފްތަރެއް ހުޅުވައިފިއެވެ.
ޙާފިޒްގެ ހަނދާނުގައި ތަޢުޒިޔާގެ ދަފްތަރު ހުޅުވާފައިވަނީ، އަޙްމަދިއްޔާ އިންޓަރނޭޝަނަލް ސްކޫލުގެ ހަނދާނީ ގެލަރީގައެވެ. މި ދަފްތަރު ހުޅުވައިދެއްވީ މަސްވެރިކަމާއި ކަނޑުގެ ވަސީލްތަތަކާބެހޭ ވަޒީރު އަޙްމަދު ޝިޔާމެވެ.
ޙާފިޒް ވަނީ ބާސްކެޓު ބޯޅައާއި މަސްވެރިކަމުގެ ދާއިރާގެ އިތުރުން އަޙްމަދިއްޔާ އިންޓަރނޭޝަނަލް ސްކޫލުގެ ސީނިއަރ އެސިސްޓެންޓް ޕްރިންސިޕަލްގެ މަގާމުވެސް އަދާކުރައްވާފައެވެ.
މި ތައުޒިޔާގެ ދަފްތަރަކީ އީޕީއެސް ފައުންޑޭޝަނުން ހުޅުވި ދަފްތަރެކެވެ. ދަފްތަރު ހުޅުވާލީ ޙާފިޒަކީ އީޕީއެސް ސްކޫލުގެ ފަޚުރުވެރި ދަރިވަރަކަށްވާތީ އެމަނިކުފާނުގެ އަގުހުރި ޚިދުމަތްތަކުގެ އަގުވަޒަންކޮށް، ޒިކުރާ އައު ކުރުމުގެ މަގުސަދުގައިކަމަށް އެ ފައުންޑޭޝަނުން ބުންޏެވެ.
ޙާފިޒުގެ ހަނދާނުގައި ތަޢުޒިޔާގައި ލިޔަން ބޭނުންވާ ފަރާތްތަކަށާއި، އާއިލާއަށް ތައުޒިޔާކިޔަން ބޭނުންވާ މީހުންނަށް މި ދަފްތަރު ހުޅުވާލާފައިވާކަމަށް އީޕީއެސް ފައުންޑޭޝަނުން ބުންޏެވެ.
ޙާފިޒް އަވަހާރަވީ ކެންސަރު ބަލީގައި ފަރުވާހޯދަމުންދަނިކޮށް މިދިޔަ މަހުގެ 29 ވަނަ ދުވަހުއެވެ. އަވަހާރަވީއިރު އުމުރުފުޅަކީ 62 އަހަރެވެ.