ގުޅިފަޅުގެ ލޭންޑުޔޫސް ޕްލޭނަށް ބަދަލުގެނެސް އަލުން ގުރުއަތުނަގަން ނިންމައިފި

ގުޅިފަޅުގެ ލޭންޔޫސްޕްލަށް ބަދަލު ގެނެސްފައިވާތީ އެތަނުން ދޫކުރި ގޯތީގެ ގުރުއަތުލުން އަލުން ކުރިއަށް ގެންދިޔުމަށް ނިންމާފައިވާކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ. ގުޅިފަޅުން ފުރަތަމަ ދޫކުރަން ނިންމާފައިވަނީ 2218 ގޯއްޗެވެ،

ގެދޮރުވެރިކަމާއި، ބިމާއި އުމްރާނީ ތަރައްގީއާ ބެހޭ ވުޒާރާއިން ގިރާވަރު ފަޅުން ގުޅީފަޅަށް ގޯތި ބަދަލުކުރުމުގެ ފުރުޞަތުދޭން ނިންމީ ކުރީ ސަރުކާރުން ގިރާވަރުފަޅުން ގޯތި ދޫކޮށްފައިވާ ސަރަހައްދަށް ކޮންމެހެން ބޭނުންވާ މުހިންމު ޚިދުމަތްތަކަށް އެކަށީގެންވާ ވަރަށް ބިން އެކަށައެޅުމެއް ނެތި ދޫކޮށްފައިވާތީއެވެ. އެހެންކަމުން އެފަދަ ޚިދުމަތްތަކާއެކު ގިރާވަރުފަޅުގެ ލޭންޑް ޔޫސްޕްލޭނަށް ބަދަލު ގެނައުމުން އެތަނުން ދޫކޮށްފައިވާ އަދަދަށް ގޯތި ދެވެން ނެތް ކަމަށް އެ ވުޒާރާއިން ކުރިން ވަނީ ވިދާޅުވެފައެވެ.

ގުރުއަތުލުމާއި ގުޅޭގޮތުން ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވުޒާރާއިން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އެ ވުޒާރާގެ ސްޓޭޓް މިނިސްޓަރ ދިލްޝާން އަބްދުﷲ ވިދާޅުވީ ގޯތި ބަދަލުކުރުމަށް 2 ފަހަރެއްގެ މަތިން ފުރުޞަތު ހުޅުވާލިކަމަށެވެ. އެންމެ ފުރަތަމަ ހުޅުވާލީ އޭޕްރީލް 7 އިން 14 އަށް ކަމަށާއި މުއްދަތު އިތުރުކޮށްދޭން އެތައްބަޔަކު އެދެމުންދާތީ 18 އޭޕްރިލްއާއި ހަމަޔައް މުއްދަތު އިތުރު ކުރީކަމަށް ސްޓޭޓް މިނިސްޓަރު ވިދާޅުވިއެވެ.

ދިލްޝާން ވިދާޅުވީ މާދަމާ ގުރުއަތު ލަނީ 1650 އާއި 1250 އަކަފޫޓުގެ ގޯއްޗައްކަމަށެވެ. މީގެ ތެރޭގައި 1250 އަކަފޫޓުގެ 196 ގޯއްޗައް ކުރިމަތިލި 1093 މީހުންނާއި 1650 އަކަފޫތުގެ 683 ގޯއްޗައް ކުރިމަތިލި 880 މީހުން ހިމެނޭކަމަށެވެ.

ދިލްޝާން ވިދާޅުވީ މާދަމާ ހެނދުނު 9 އަކުން 10އަކަށް އެ ބޭފުޅަކު އަމިއްލަފުޅަށް ގުރުއަތުލާން ގަނޑުކޮޅު ލުމުގެ ފުރުސަތު އޮންނާނެކަމަށެވެ. ހާޒިރު ނުވެވޭ ފަރާއްތަކުން އެހެން ބޭފުޅަކު މެދުވެރިކޮށްވެސް ގުރުއަތުގައި ބައިވެރިވެވޭނެކަމަށް އޭނާ ވިދާޅުވިއެވެ. ދެން ތިބި މީހުންގެ ކަރުދާސް އެ ވުޒާރާގެ މުވައްޒަފުން މެދުވެރިކޮށް ގުރު ނެގުމުގައި ހިމަނާނެކަމަށެވެ.

"އެ ބޭފުޅުން މި ތަނުގައި ނެތަސް އަޅުގަނޑުމެންގެ މުވައްޒަފުން މެދުވެރިކޮށް ނެއް ބޭފުޅުންގެ ނަންތައް ހިމެނޭނެ. އަޅުގަނޑުމެން ހަމަ އެކަނި ހުޅުވާލި މި ފުރުސަތަކީ އެ ބޭފުޅުން އަމިއްލަފުޅަށް އެ ތަނަށް ވަޑައިގެން ފޮއްޓަށް ނަން ލުމުގެ ފުރުޞަތު އެކަނި" ދިލްޝާން ވިދާޅުވިއެވެ.

ކުރީ ސަރުކާރުން ގިރާވަރު ފަޅުން 5432 ގޯތި ދޫކުރުމަށް ނިންމާ އޭގެ ލިޔުން ހަވާލުކޮށްފައިވެއެވެ. ނަމަވެސް އެއަދަދަށް އެތަނުން ގޯތި ނެގެން ނެތުމުން، މި ސަރުކާރުންވަނީ ހާހަކަށްވުރެ ގިނަ ގޯތި ގުޅިފަޅަށް ބަދަލުކުރުމުގެ ފުރުޞަތު ދީފައެވެ.

ގުޅިފަޅުން ހިއްކާފައިވަނީ 160 ހެކްޓަރުގެ ބިމެވެ. އެ ފަޅުގައި ބާކީ އޮތް 85 ހެކްޓަރުގެ ބިން ހިއްކުމަށް ސަރުކާރުން މިހާރު ވަނީ އެކަމާ ގުޅޭ މަސައްކަތްތައް އެމްޓީސީސީއާ ހަވާލުކުރައްވާފައެވެ.