ހައްޖުވެރިން ފުރާ ދުވަސްތަކުގައި އިތުރު ފުލުހުން އެއަޕޯޓުގައި ހަރަކާތެރިވާނެ

ހައްޖުގެ މަތިވެރި އަޅުކަން އާދަކުރުމަށް ރާއްޖެއިން ފުރުމަށް ހަމަޖެހިފައިވާ ހައްޖުވެރިންނަށް ފަސޭހަކުރުމުގެ ގޮތުން މިފަހަރުވެސް އެއަރޕޯޓްގެ ޓްރެޕިކް ބެލެހެއްޓުމަށް ފުލުހުން ނިންމައިފިއެވެ.

ހައްޖުގެ މަތިވެރި އަޅުކަމަށް ހައްޖުވެރިން މާދަމާ އަދި ޖޫން 3 އަދި 7 ވަނަ ދުވަހު ފުރުމަށް ވަނީ ހަމަޖެހިފައެވެ. އެގޮތުން އެދުވަސްތަކުގައި އެއަރޕޯޓްގައި ތޮއްޖެހުން ކުޑަކުރުމަށް ޓްރެފިކް ފްލޯ ކުރިއަތް ގެންދިޔުމުގައި އިތުރު ފުލުހުން އެއަރޕޯޓްގައި ހަރަކާތްތެރިވާނެކަމަށް ފުލުހުންގެ ޚިދުމަތުން ވިދާޅުވިއެވެ.

ފުލުހުން ވިދާޅުވީ މި ދުވަސްތަކުގައި އެއާރޕޯޓުން ފުރާ އެހެން މީހުންނަށްވެސް ޓްރެފިކް ތޮއްޖެހުންގެ ސަބަބުން ލަސްތަކެއް ކުރިމަތިވުމަކީ އެކަށީގެންވާ ކަމެއްކަމަށެވެ. އެހެންކަމުން އެ ދުވަސްތަކުގައި ފުރާ މީހުންވެސް ދުރާލާއި އެއާޕޯޓައް ގޮސް ފުރުމުގެ އިންތިޒާމްތައް ނިންމުމަށް ފުލުހުން ވަނީ އިލްތިމާސްކުރައްވާފައެވެ.

ފުލުހުން ވިދާޅުވީ ހައްޖުވެރިންނާއެކު އެއަރޕޯޓަށް ވަޑައިގަންނަވާ ގާތްތިމާގެ މީހުންނާއި އެއާރޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާއްތަކުންވެސް ކަނޑައެޅިފައިވާ އިރުޝާދުތަކާ އެއްގޮތައް އަމަލު ކުރެއްވުމަށް ފުލުހުން ވަނީ ނަސޭހަތްތެރިވެފައެވެ.

1445 ވަނަ އަހަރު ދިވެހިރާއްޖެއަށް ލިބިފައިވާ ރަސްމީ ކޯޓާގެ އަދަދަކީ 1000 ކޯޓާއެވެ. މާދަމާ 298 ބައިވެރިން ހައްޖަށް ފުރާނެއެވެ. މީގެ ތެރޭގައި 26 އެހީތެރިން ހިމެނެއެވެ. 3 ޖޫންގައި 330 ހައްޖުވެރިންނާއި 23 އެހީތެރިން ހައްޖައް ފުރާއިރު 07 ޖޫންގައި 316 ހައްޖުވެރިންނާއި 23 އެހީތެރިން ހައްޖުގެ އަޅުކަމަށް ފުރާނެއެވެ. މި އިން ކޮންމެ ފަލައިޓެއް ފުރަން ހަމަ ޖެހިފައިވަނީ އެދުވަހެއްގެ 15:25ގައެވެ.