ގޭތެރޭގެ ދިރިއުޅުން ދަސްކޮށްދިނުމަށް ޚާއްޞާ ވާރޑެއް ގުރައިދޫ މަރުކަޒުގައި ހުޅުވައިފި

ގޭތެރޭގެ ދިރިއުޅުން ދަސްކޮށްދިނުމަށްޓަކައި ރީއިންޓަގްރޭޝަން ވާރޑެއް ކ. ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒުގައި ހުޅުވައިފިއެވެ. މިއީ މުޅިން އަލަށް އެތަނުގައި ހުޅުވި ވާރޑެކެވެ.

އިޖުމަޢީ އަދި ޢާއިލީ ތަރައްޤީއާއި ބެހޭ ވުޒާރާއިން ވިދާޅުވީ، މިއީ ގުރައިދޫ މަރުކަޒުގައި ތިބޭ މީހުންނަށް ޞިއްޙީ، ނަފްސާނީ އަދި އިޖުތިމާޢީ ހުނަރު ޕްރޮގްރާމްތަކާއެކު ފަރުވާ ފުރިހަމަކުރުމަށްފަހު ޢާއިލާތަކަށް ރުޖޫޢަވުމުގެ ކުރިން ގޭތެރޭގެ ދިރިއުޅުން ދަސްކޮށްދިނުމަށް ޤާއިމްކުރި ވާރޑެއްކަމަށެވެ. އަލަށް ހުޅުވި މި ވާރޑް ޚާއްޞަކުރެވިފައިވަނީ ނަފްސާނީ ބައްޔަށް ފަރުވާ ހޯދަމުންދާ، މުޖުތަމަޢަށް ނިކުތުމަށް ތައްޔާރުވެފައިވާ އަންހެނުންނަށެވެ.

މި ވާރޑް ހުޅުވުމުގެ އެންމެ ބޮޑު އެއް މަޤުޞަދަކީ ގޭތެރޭގެ ދިރިއުޅުމުގައި ބޭނުންކުރާ ހުނަރު ތަކާއި އާންމު އިޖުތިމާޢީ ހުނަރުތައް ދަސްކޮށްދިނުންކަމަށް އެ ވުޒާރާއިން ވިދާޅުވެއެވެ.

މި ވާރޑަކީ ގެއެއް ގޮތައް ބަދިގެއާއިއެކު ފަރުމާ ކޮށްފައިވާ 10 މީހުންގެ ޖާގައިގެ ތަނެކެވެ. މިތަން އެޅުމަށް ބީއެމްއެލްއިން ވަނީ އެހީތެރިކަން ފޯރުކޮށްދީފައެވެ. ފިރިހެނުންނަށް ޚާއްޞަ 14 އެނދުގެ މިފަދަ އެހެން ވާރޑެއް އަންނަ މަހު ހުޅުވުމަށް ތައްޔާރުވަމުން އަންނަކަމަށްވެސް އެ ވުޒާރާއިން ވަނީ ވިދާޅުވެފައެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނީ އަމާޒަކީ އެހީތެރިކަން ބޭނުންވާ ފަރާތްތަކަށް ދެވޭ ޚިދުމަތުގެ ފެންވަރު ރަނގަޅުކުރުންކަމަށެވެ.