މަޖިލީހުގެ ރައީސާއި ނައިބު ހޮވާ ޖަލްސާގެ ރިޔާސަތު ބަލަހައްޓަވާނީ ސިޔާމް

ރައްޔިތުންގެ މަޖިލީހުގެ 20 ވަނަ ދައުރުގެ ރައީސާއި ނައިބު ރައީސް ހޮވުމަށް ބާއްވާ ޖަލްސާގެ ރިޔާސަތު ބަލަހައްޓަވާނީ މީދޫ ދާއިރާގެ އިންތިޚާބީ މެންބަރު އަހުމަދު ސިޔާމް މުޙައްމަދު ކަމަށް މަޖިލީހުން ބުނެފިއެވެ.

މަޖިލީހުގެ ރައީސާއި ނައިބު ހޮވުމަށް ބާއްވާ ޖަލްސާ އޮންނާނީ މިމަހުގެ 28 ވަނަ ދުވަހުއެވެ. ރައީސާއި ނައިބު ރައީސް އިންތިޚާބުކުރާނީ މެންބަރުން ހުވާ ކުރުމުގެ ރަސްމިއްޔާތަށްފަހުއެވެ.

ރައްޔިތުންގެ މަޖިލީހަށް އަލަށް އިންތިޚާބުވި މެންބަރުން ހުވާ ކުރުމުގެ ރަސްމިއްޔާތު އަންނަ އަންގާރަ ދުވަހުގެ ހެނދުނު 9:00 ގައި ބޭއްވުމަށް ވަނީ ތައާވަލުކޮށްފައެވެ. މި ރަސްމިއްޔާތަށްފަހު މަޖިލީހުގެ ރައީސާއި ނައިބު ރައީސް ހޮވާ ޖަލްސާ ހެނދުނު 10:15 އަށް ތައާވަލުކޮށްފައިވާ ކަމަށް ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަންސް ޑިރެކްޓަރ ޙަސަން ޒިޔާޢު ވިދާޅުވިއެވެ.

ޒިޔާޢު ވިދާޅުވީ މަޖިލީހުގެ ރައީސާއި ނައިބު ހޮވުމުގެ ޖަލްސާގެ ރިޔާސަތު ބަލަހައްޓަވާނީ ދ. މީދޫ ދާއިރާގެ މެންބަރު އަހުމަދު ސިޔާމް މުޙައްމަދު ކަމަށެވެ. 19 ވަނަ މަޖިލިސް ހުވާކުރުވުމުގެ ޖަލްސާގެ ރިޔާސަތުވެސް ބެލެހެއްޓެވީ ސިޔާމެވެ.

މަޖިލީހުގެ ޤަވާއިދުގައިވާ ގޮތުން މަޖިލީހުގެ ރައީސާއި ނައިބު ރައީސް އިންތިޚާބު ކުރެވެންދެން ޖަލްސާގެ ރިޔާސަތު ބަލަހައްޓަވަން ޖެހޭނީ ޖަލްސާއަށް ޙާޒިރުވެވަޑައިގެން ތިއްބަވާ މެންބަރުންގެ ތެރެއިން މަޖިލީހުގެ މެންބަރުކަމުގައި މެދުނުކެނޑި އެންމެ ގިނަ ދުވަސްވީ މެންބަރެވެ. ސިޔާމް މިހާތަނަށް ވަނީ މަޖިލީހުގެ 4 ދައުރު ފުރިހަމަކޮށްފައެވެ. އަދި ފަސްވަނަ ދައުރަކަށް ވަނީ އިންތިޚާބުވެވަޑައިގެންފައެވެ،

ވިހިވަނަ މަޖިލީހުގެ ސުޕަރ މެޖޯރިޓީއެއް ސަރުކާރު ހިންގާ މައި ޕާޓީ، ޕީޕަލްސް ނެޝަނަލް ކޮންގްރެސް، ޕީއެންސީއަށް ވަނީ ލިބިފައެވެ. އެ ޕާޓީގެ ރައީސްގެ ހައިސިއްޔަތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަޖިލީހުގެ ރައީސަކަށް ފޮނަދޫ ދާއިރާގެ އިންތިޚާބީ މެންބަރު އަބްދުރަޙީމް އަބްދުﷲގެ ނަންފުޅާއި، މަޖިލީހުގެ ނައިބަކަށް ދިއްގަރު ދާއިރާގެ އިންތިޚާބީ މެންބަރު އަޙްމަދު ނާޒިމްގެ ނަންފުޅު ހުށަހަޅުއްވާފައެވެ. މި ދެނަންވެސް ޕީއެންސީގެ ޕީޖީގައި ހިމެނޭ އިންތިޚާބީ މެންބަރުންގެ އިއްތިފާގުން ވަނީ ފާސްކޮށްފައެވެ.

މަޖިލީހުގެ ރައީސް އިންތިޚާބުކުރާނީ އެންމެ ފުރަތަމަ ބާއްވާ ޖަލްސާގައި މެންބަރުންގެ މެދުގައި ނަގާ ސިއްރު ވޯޓަކުންނެވެ. އެ ވޯޓު ނެގުމަށްފަހު ވޯޓު ގުނުމަށް ފަސް މެންބަރުންގެ ވަގުތީ ކޮމިޓީއެއް އެކުލަވާލާނެއެވެ. މި ފަސް މެންބަރުން ކަނޑައެޅުމުގައި މަޖިލީހުގައި ހިމެނޭ ހުރިހާ ސިޔާސީ ޕާޓީތަކެއް ހިމެނުމަށް މަޖިލީހުގެ ގަވާއިދު ބާރު އަޅައެވެ.

މަޖިލީހުގެ ރައީސް އިންތިޚާބުވުމާއެކު ޖަލްސާތަކުގައި ރިޔާސަތު ބަލަހައްޓަވާނީ ރައީސެވެ. އަދި ރައީސަށް ރިޔާސަތު ނުބެލެހެއްޓެވޭ ހާލަތްތަކުގައި ރިޔާސަތު ބަލަހައްޓަވާނީ ނައިބު ރައީސެވެ.

ވިހިވަނަ މަޖިލީހުގެ މެންބަރުން ހުވާ ކުރުމުގެ އެންމެ ފަހުގެ ތައްޔާރީތައް ރައްޔިތުންގެ މަޖިލީހުގެ އިދާރާއިން އަންނަނީ ވަމުންނެވެ. އެގޮތުން، އަލަށް އިންތިޚާބުވި މެންބަރުން މަޖިލީހުގެ ވޯޓިން ސިސްޓަމަށް އަހުލުވެރިކުރުވުމަށް ހާއްސަ ސެޝަނެއް ވަނީ ބާއްވާފައެވެ. އަދި މަޖިލީހުގެ އެކި ސެކްޝަންތަކުގެ އިސްވެރިން ވަނީ އެ ސެކްޝަންތަކުން މެންބަރުންނަށް ފޯރުކޮށްދޭ ޚިދުމަތްތަކާ ގުޅޭ މަޢުލޫމާތު ވެސް ހިއްސާ ކުރައްވާފައެވެ.

20 ވަނަ ރައްޔިތުންގެ މަޖިލީހުގައި 93 މެންބަރުން ހިމެނިވަޑައިގަންނަވާނެއެވެ.